الخميس، 23 يونيو 2011

جلد بيلمع




بيت قديم .. اول ما تدخل ..
 تشم ريحه الحياه .. ريحه عيش ..
ريحه حب ..كل بيت فيه فرن ..
 كل بيت ريحته حلوه .. كل بيت ريحته حياه
بيت جدتى .. سقف عالى ..
 ناس كتير .. بس البيت مكفى ..
فاكره زمان ..وانا صغيره ..
يوم العيد الصبح .. اول ما نروح بيت العيله
اقعد جنب جدتى ..
واقولها بصى .. بابا ادانى عيديه ..
ماما تبصلى .. وتقولى بنت عيب
بس انا مش بيهمنى .. اه بصراحه عاوزاها تدينى عيديه
تقولى روحى هاتى شنطتى من الدولاب
لما كنت فى اولى ابتدائى كانت بتدينى خمسه جنيه
كنت بفرح بيهم جداااا
دولاب جدتى .. ريحته .. شكله.. صوته وهو بيتفتح ويتقفل
مش قادره انساه
شنطه جدتى
سودا جلد بتلمع .. شنطه من بتوع السبعينات دى
الشنطه لوحدها كان ليها ريحه عبقريه
الظاهر انى كنت بشم شنط وانا صغيره
اجرى عليها بالشنطه .. وانسى اقفل الدولاب
تقولى قفلتى الدولاب .. اقولها لا .. مش انا هرجع الشنطه تانى
تقولى لا ..خليها علشان ادى العيديه لولاد عماتك
اول ما اخد العيديه اديلها حضن وبوسه .. لا بوستين
واروح بقى احط الفلوس على بعضها
واقول لبابا عاوزه اتمرجح
هى دى الحاجه الوحيده اللى كنت بعملها فى الشارع
كان امنيتى وانا طفله انى العب فى الشارع
معرفش ليه كان عيب .. ومينفعش
كنت بستنى العيد علشان بابا ياخدنى يمرجحنى
واشترى حاجات حلوه .. وارجع البيت تانى
العيد كان يعنى شنطه ضغننه اوى يادوبك تكفى العيديه
وخناقه كل عيد
ادى الفلوس لماما علشان متضيعش منك
وانا مرضاش
يااااااااااااه .. كانت ايام جميله  اوى
البيت واللمه والجو
وجدتى .. الله يرحمها 

هناك 12 تعليقًا:

غير معرف يقول...

الله يرحمها ويرحم المسلمين كلهم أحياء و أموات
تصدقي انا كمان بحي أوي شكل الجلد اللي بيلمع مش عارفة ليه
جميلة يا سارة ..وصفتي الجو الجميل ده باحساس عالي
ربنا يوفقك دايما يا رب وتكتبي أجمل واجمل
أماني

ساره جمعه يقول...

فعلا يا منمنتى كانت ايام حلوه اوى
يارب يا بنوته
:)

المحطه يقول...

ريحة الزمن الجميل ياساره .. الله يرحم جدتك .. ويرحم الزمن الجميل .. قبل الزكام والجيوب الأنفيه
بس سيبك أسلوبك عمال يتطور .. دعواتى بالتوفيق

إيثار يقول...

جميلة:)

غير معرف يقول...

الله يرحم جدتك والمسلمين جميعا ياترى حنيتى لجدتك ولا للعيديه
فاطمه

ساره جمعه يقول...

@ المحطه
الله يرحمها فعلا ويرحم الزمن الجميل
ربنا يباركلك يارب شكرا شكرا
:)

ساره جمعه يقول...

@ ايثار
شكرا يا جميله
:)

ساره جمعه يقول...

يا فطووووومه ... انتى بتتكلمى فى ايه للعيديه طبعا
ههههههههههههه

غير معرف يقول...

دايما الناس بتحن للزمن الخالى من المسئولية وبعد كام سنة حتحنى للوقت اللى انتى عشتيه قبل كده
Eman karkora

خالد نور يقول...

جميلة يا سارة ما شاء الله

Muhamad Abdulghany يقول...

حقيقيه أوىىىىىىىىىى
حلوه جدااااااااااا

دعاء مواجهات يقول...

كم هى جميله ذكرياتك .. ذكرياتنا جميعاً

تحياتى