الأربعاء، 29 سبتمبر، 2010

جمال مات



جدى راجع من بره هو وخالتى اللى اصغر من مامتى من عند الدكتور


فى يوم من الايام


ماشيين فى الشارع مروحين البيت


الراديو كان جايب قران


والساعه مش 8 اللى هو الميعاد بتاع اذاعه القاهره اللى بتجيب فيه القران كل يوم


وصلو البيت لقوهم برضه مستغربين ان طول اليوم فى قران فى الراديو


والناس عاوزه تعرف فى ايه


بعدها بساعات اعلنو ان جمال عبد الناصر مات


جمال مات


وناس تصوت


وناس تعيط


واللى يطلع فى الشارع مش مصدق


والناس كلها لبست اسود


شوارع مصر كانت لابسه اسود


ساعتها مكنش فيه وسائل نقل واتصال بالتطور اللى فيه دلوقتى


على ما جه كل رؤساء العالم كان عدى يومين


واتدفن جمال عبد الناصر


وسط دموع مصر كلها


اللى مكنش بيحبه قبل اللى كان بيحبه


اللى مكنش بيحب عبد الناصر قال عليه مكنش فيه زيه


مابالك باللى كانو بيحبوه وفاهمين سياسته


قعدو الناس فى حزن


متخيلين يا جماعه مصر كلها حزينه


الناس كلهم متفقين على الحزن على شخص واحد


جدتى يوم الجنازه معملتلهومش يتغدو قالتلهم لما جنازه عبد الناصر تخلص


والمدارس والمصالح قفلت كام يوم


ومحدش كان بيعمل اى حاجه


كلو كان حزين


ولما الاطفال رجعو المدارس كانو كلهم حاطين شريطه سوده على المرايل بتاعتهم


وفضلو الناس قلقانين ياترى مين اللى حييجى بعديه


ايام بتعدى والناس خايفه ومرعوبه


لحد ما جه السادات
                                                                 يتبع فى ذكرى وفاه السادات :)


الخميس، 23 سبتمبر، 2010

احترم نفسك -- بلاش قله ادب



لما تبقى راكب مواصلات وتلاقى بنت بتزعق فجأه


وبتقول


ايدك يا حيوان


وشتيمه وبهدله واللى بيتشتم فى نص هدومه


وكل الناس تبهدله ومش بعيد ياكل علقه مكلهاش حمار


ده يبقى اسمه ايه


المعاكسات مبقتش يا جميل انت يا اللى ماشى


ولا احلى واحده اللى لابسه جزمه حمرا


واحلى واحده اللى فى النص وهما اتنين بس اصلا


لا بقت بالفاظ متتقالش


ومد ايدين


ورعب للبنت اللى ماشيه فى الشارع


وحاجات بشعه بجد جدا


اه بيبقى فى بنات لبسها زى الزفت


وتخلى اللى قدامها يعمل كده


بس اللى ماشيه محترمه ولابسه كويس لما يتعمل فيها كده


يبقى اسمه ايه


يعنى ايه واحده راكبه مواصلات وقاعده فى حالها وتلاقى واحد حيوان مد ايده عليها


الواحد بقى ميركبش مواصلات


ولا يمشى فى الشارع


وبعدين كلام من نوعيه انت معندكش اخوات بنات


ولا ترضى حد يعمل كده فى اختك


اللى الناس بيقولوه للى بيعمل كده


مبقاش بيأثر خلااااص


هى هى


كان زماان


بجد فى حاله من الاخلاق المهببه متفشيه فى البلد


ايه متفشيه دى -- منتشره يعنى


لا والمصيبه الكبيره اوى بقى


انى شفت بنتين بيعاكسو ولد


اه والله العظيم


البنات اللى بتعاكس


ده ايه الخيبه والوكسه اللى بقينا فيها دى


تؤتؤتؤتؤ


لا تقولى حياء ولا خجل ولا ادب


متحاولش


الكلام ده اتلغى من القاموس


بجد احنا محتاجين دلوقتى سفينه سيدنا نوح ويبقى فيه طوفان ياخد كله


واللى يفضل بس الكويس


عشان كده بقت حاجه


تييييييييييييييييييييييييييييييييت خالص


ولو سمحت احترم نفسك – بلاش قله ادب (اتق الله )

 

الأربعاء، 22 سبتمبر، 2010

احترم نفسك -- بلاش قرف


احترم نفسك



بلاش قرف


نفسى اكتبها فى الشوارع فى كل حته


متمشيش كام خطوه الا وتلاقى حد بيتف على الارض


موضوع مقرف اخر حاجه بس


بجد مش ممكن كده


تمشى تلاقى واحد بيتف على الارض


ده غير بقى منظر الارض


اصلا انا بقيت بمشى باصه فى الارض


مش كسوف لا خلى الكسوف على جنب طبعا بتكسف ( وش بيبربش بعنيه


بس بجد من القرف اللى بقى فيه الشارع


ده الناس ناقص تعمل بيبى فى الشارع


ايه يا ناس اللى بيحصل ده


وفى المواصلات تلاقى الراجل يتف عادى جدا


ولا انزل بقى نفق من الانفاق اللى عالبحر وانت تشوف القرف بنفسه


حاجه مقرفه بجد الواحد بيبقى حيجيب اللى فى معدته خلاص


فى تركيا عملو نظام جديد كده


لسه عارفه الخبر ده النهارده


فى كاميرات بتصور فى الامكان العامه


واللى يتصور بيتف عالارض


يتفضح


تنزل صورته وهو بيتف عالتليفزيون


وفى الشوارع


علشان يحرمو يعملو كده تانى


لكن عندنا هنا


لا حياه لمن تنادى


لو عملنا النظام ده الناس حتف فى الكاميرا اصلا


يعععععععععععععععععععععع


بجد بجد اى حد يشوف حد بيعمل كده يقولو


احترم نفسك و بلاش قرف


الثلاثاء، 21 سبتمبر، 2010

البقاء لله


البقاء لله



ماتت بلدنا


وكان من يومين


الاربعين بتاعها


صوتو صرخو عيطو


بس كمان اضحكو


اصل حاميها حراميها


واللى قتلها مشى فى جنازتها


ولعزاها نصب صوانها


سرقها ونهبها وقتلها


وقال الحقوها مش عارف مالها


جرينا عليها


نلحق اى حاجه فيها


لقيناها فى اخر نفس ليها


ماتت


والله ماتت


واحنا واقفين متنحين قدامها


لا عرفنا نلحقها


ولا حتى حاسبنا اللى قتلها


قعدنا نعيط


نولول


نصوت


ده حتى ما جاش على بالنا ندفنها


وطلعت ريحتها


قرفنا وجرينا


وجه اللى قتلها


وقال ابنى اهو


مافيش زيه اهو


جبته ينجدها


قلناله ماتت


راحت


ضاعت


قال لا دى بس غيبوبه شويه


وحتفوق منها


وانا ابنى اللى هو


حيعرف يغيثها


يقيمها


ينجدها


واصل الحكايه


لا كل الحكايه


انه عاوز يدارى


فضيحته فى عياله


فقال ابنى منى


حيستر عليا


الاثنين، 20 سبتمبر، 2010

عريس اليوم __3 مش هتجوز كده


روحنا المكان اللى هما اقترحوه



نسيت اقولكو ان المكان اللى حيبقى فيه اللقاء المنيل ده


انا كنت رافضاه عشان هما اللى اختاروه


وانا ليه مختارش


انا عاوزه المعاد يبقى فى الكليه


انا بحب الكليه يا جماعه


يا الكليه يا بلاش


طبعا انا كنت بكلم نفسى


باباا وماما مع رأى الست


ودى حاجه مدايقانى جدا


طبعا ملبستش اللى عالحبل


لان ماما مكنتش منشره يوميها ( وش غاسل سنانه


لبست عادى جينز كمان


وكمان قبل المعاد ده كنت فى يوم شغل طويييييل جدا


المهم روحنا المكان المقترح


لقيناهم للاسف مستنيين


كان نفسى يتاخرو ونمشى


او ميعروفوناش اوميشوفوناش


او اى حاجه


او نلاقى المكان ولع


انا عاوزه اعرف حاجه


حكلمه اقوله ايه ده


حتكلم معاه ازاى اصلا وانا مش طايقه اشوفه


لا هو ولا امه بتاعه الكعب دى


طبعا هو شافنى وعجبته فالمفروض انه يعجبنى


لالالالالالالالالالا


عند امه يا ادهم


مسموش ادهم لا


ده فيلم اللمبى :)


المهم


العريس ماشاء الله طول بعرض


لابس الحته اللى على الحبل


بس تقريبا حالق عند حلاق بتاع خرفان


ولما قربنا بقى منهم


ابتسمت ابتسامه رخمه كده


وقعدنا اهلا ازيكو عاملين ايه


قلتلها الحمد لله تمام


كويسين


وماما برضه قالتلها الحمد لله كويسين


تشربو ايه يا جماعه


نخليها شربات بقى


هى هى هى هى هى


ده انتى اللى دمك شربات يا طنط ( فى سرى طبعا


ماما قالتلها تشرب شاى


وانا استنيت لحد ما جه الراجل اللى بياخد الطلبات


وقلتله نسكافيه بلاك لو سمحت


قالتلى ليه كده


والراجل واقف


لالالالا بلاش نسكافيه


قلتلها نعم


حضرتك خدى حاجه غير النسكافيه


انا مش بقوله اللى حضرتك حتشربيه


انا بقوله اللى انا حشربه


قالتلى غلط النسكافيه بالليل


لالالالالالا اشربى عصير ولا حاجه


قلتلها لا


انا حشرب نسكافيه


ولا بلاش بقى خالص ولا ايه


قالتلى خلاص اشربى اللى انتى عاوزاه


وهى طلبت عصير فراوله


وابنها الحيله طلب مانجه


عيله طبيعيه بتحب الناتيورال


ايه رايك بقى ياساره فى ........


ده اسم العريس بس ربنا امر بالستر


قلتلها فى ايه


قالتلى اهو شفتيه


قلتلها والله طيب ما تيجى نكتب الكتاب بقى


قالتلى ايه


قلتلها لا سلامتك ولا حاجه


هى طبعا اتكلمت مخلتش فرصه لابنها يتكلم


وادى اول القصيده


انا ابنى بيصلى


الفرد بفرضه وفى الجامع


انا ابنى عنده شقه


فى الحته الفلانيه


انا ابنى بيشتغل مدرس وبيدى دروس بقى و هى هى هى


هى الدروس بتزغزغ ولاايه


انا ابنى محترم ومؤدب


انا ابنى انا ابنى


ابنها ملاك نازل من السما


واحنا اللى ولاد تيييييييييت


وابنك ما هو متلقح جنبك اهو


ولا هو مبيحبش يتكلم عن نفسه


متواضع جدا طبعا ما هو باين


اللى الست دى عملته كان كفيل بانى اقلب عليها النسكافيه الاسود ده


بس فضلت ساكته


وهى تتكلم


ابنها معملش اى حاجه غير انه كان بيبتسم


جايباه يبتسم ويروح


مقعدش ليه يضحك فى بيتهم براحته


طبعا انا بصيت لماما


لقيتها قالت طيب احنا يادوب كده عشان منتاخرش


ماما قالت الكلمه دى وانا كنت عند المواصلات


الست تقولنا لسه بدرى


وماما تقولها يا دوب والله


انا حقيقى اتنفخت من المقابله دى


بس ضحكت ضحك بعدها


المهم بقى ان الست اتصلت تانى


ههههههههههههههههههههههههههه


بعدها بيوم عاوزه تعرف رايى


ماما قالتله مفيش نصيب بقى


قالتلها ليه بس


دى عاجبه ابنى اوى


ماما اتنرفزت بقى منها


وقالتلها بس هو مش عاجبها


وقفلت مع الست العجيبه دى


واتنهدنا تنهيده الحمد لله خلصنا من الموال الغبى ده


لقينا التليفون بيرن تانى


قلنا لاااااااااااااااااااااااااااااا


مش ممكن


بس الحمد لله طلعت خالتى


الحمد لله
ايه عريس
لاااااااااااااااااااااااااااااااااااااااااااااااا

بتقول لماما انها جايبالى عريس


هى الناس دى عاوزه منى ايه بقاااااااا
عاااااااااااااااااااااااااااااااااااااااااا
انا حروح اعيش فى المريخ


حد جاى






الأحد، 19 سبتمبر، 2010

كبسولاتى

مكتشف___ مبتكر ___مجدد ___صانع



مبدع ___ مخترع ___ محترف___ مختلف


احلى حاجه انك تموت وانت حاجه من الحاجات دى


عشان تبقى فعلا حياتك ليها قيمه حتى بعد ما تموت


وبجد انك تكون حاجه من الحاجات دى مش صعبه ابدا


لازم نسعى نكون حاجه قبل ما نكون ولا حاجه تحت التراب

عريس اليوم __2 تخطيط وتكتيك




قبل اليوم الموعود ده بتاع رمضان بيوم


فضلت رايحه جايه فى البيت
لحد ما خسيت النص
ايه النصب ده انا تخنت اصلا
المهم طلعت بحل كويس جدا
يخلينى ارتاح من موضوع المقابله ده
رحت لماما قلتها ايه بقى
انا مش موافقه
قالتلى انتى عبيطه
مش موافقه على ايه
قلتلها على اللى بيحصل ده
ما هو انا مش حفضل ماشيه وراكو
والاقى نفسى متدبسه فى الاخر
قلت بلاش ارفض كده وخلاص
انا حعرف ازاى ابوظها
وضحكت ضحكه شريره كده من جوايا
قلتلها هو فى حد ير وح فى رمضان يقابل ناس كده
حنضيع وقت ثمين فى العشر ايام الاواخر فى التهريج ده
والشغل والصلاه وانتى اصلا مش قادره تنزلى
سكتت كده
وواضح انها اقتنعت
قالتلى امال امتى قلتلها بعد العيد بقى وعليكى خير
الست اتصلت قبل المعاد بيوم عشان تاكد علينا
ماما ردت عليها
وقال ايه قالتلها ممكن اكلم ساره
راحت ماما عطيتلها ساره
انا يعنى رديت
رديت عليها بقولها السلامو عليكو
قالتلى وعليكم السلام
ازيك يا حبيبتى عامله ايه
قلتلها الحمد لله
قالتلى انتى مش بتسالى ليه
انا حبقى حما طيبه والله
اسأل على مين
ومين اللى وافق اصلا عشان تبقى حماته
ايه اللى بيحصل ده ياناس
قالتلى بقولك ايه بقى
قلتلها خير
قالتلى
لما نتقابل ابقى البسى جزمه بكعب عالى
قلتلها نعم اشمعنى
عشان وقت الزنقه اضرب بيها يعنى ولا ايه ( فى سرى
قالتلى ابنى طويل والبسى كعب بقى
وابقى حطى مكياج بقى وظبطى
قلتلها وتحبى حضرتك البس لون معين
ولا ابن حضرتك بيحب عادى كل الالوان
وبالنسبه لماما تحبى تلبس حاجه معينه
راحت ماما واخده منى التليفون قالتلها
معلش خلينا بعد العيد
ووقت رمضان ضيق وكده
واتفقت على الخميس اللى بعد العيد
طبعا الست دى لزقه باين ولا ايه
حد غيرها كان اتقمص من زمان
بتتصل كتير جدا
قبل العيد وبعد العيد وفى العيد

الصبح وبالليل

ومره ماما مكنتش فى البيت لقيتها بتتصل بيا فى الصيدليه
وده تليفون شغل يا ناس
ناس فاضيه يعنى والله
المهم جه بعد العيد وبكره خلاص الخميس
يادى النيله
انا حتدبس ولا ايه


الست طبعا اتصلت كالعاده للتاكيد واحنا مكناش فى البيت وبابا اللى رد
لما رجعنا قال لماما كلميها
خدت ماماعلى جنب وقلتلها احنا صايمين اليومين دول لما نخلص الست ايام البيض


نبقى نقابلهم
ولا اقولك خليها بعد العيد الكبير
راحت ماما حدفتنى بال....... ء
ولا بلاش عشان برستيجى
لالالالا احسن دماغكو تروح لبعيد
حدفتنى بالقلم
كانت ماسكه قلم ليه ؟؟اهى كانت ماسكه قلم وخلاص
ماما بتحب تمسك اقلام وهى قاعه فى البيت


عشان تحدفنى بيهم


المهم ماما اتصلت بيها


وقالتلها معلش احنا صايمين بكره


وعلى ما نفطر وننزل حيبقى الوقت اتاخر
خلينا يوم تانى راحت الست قالتلها طيب اختارو يوم


راحت ماما قالتلها خلاص يوم السبت باذن الله


طبعا جه يوم السبت


اللى فيه المعاد اللى مش نازلى من زور ده


ونزلنا روحنا المعاد







                                     تبع برضه ....



السبت، 18 سبتمبر، 2010

عريس اليوم ....1


حاجه كده شبه طبق اليوم


بس بصراحه ملهاش اى طعم


اسمعو بقى الحكايه دى لانها طويله


فى حالى والله واقفه فى شغلى بشوف اكل عيشى
لا بلاش كدب كنا فى رمضان اكل عيش ايه فى رمضان


المهم الاقى واحده داخله عليا


زبونه زى الفل


عاوزه تاخد حقنه فيتامين قلتلها مينفعش وحضرتك صايمه


لقيتها بتقولى انتى ساره


قلتلها نعم


اه انا خير


قالتلى انا طنط فلانه زميله طنط فلانه فى الشغل اللى هى تبقى صاحبه خالتك


قلتلها ياااه وهى صيدليتنا مسمعه اوى كده الحمد لله


الست معجبتهاش الافيه اللى انا قلته


قالتلى ما انتى اموره اهو امال ليه متخطبتيش لحد دلوقتى


قلتلها نعم حضرتك وهو كان حد عاطيلك خلفيه انى شبه عبله فى يوميات ونيس ولا ايه


وبعدين حلوه او وحشه حتفرق مع حضرتك فى حاجه


الدوا حيبقى طعمه وحش مثلا لو وحشه ( فى سرى


قالتلى انا عندى ابن مدرس لغه عربيه


قلتلها اهلا وسهلا


قالتلى وبيدور على عروسه


قلتلها ايوه ربنا يستر ( فى سرى برضه


قالتلى وبصراحه فلانه وفلانه دول رشحوكى ليا


قلتلها حضرتك رشحونى لايه بالظبط


عملت عبده يعنى


قالتلى عشان ابنى يخطبك


قلتلها ياااه يخطبنى مره واحده


قالتلى اه هو جه شافك وانتى عجبتيه واتا شفتك اهو وبرضه عجبتينى ونجيلكو بقى البيت


كان نفسى اقولها


بررررررررررررررررررررررررره


صباح الاستفزاز بتاع البنى ادمين


ينى هما شافو ومبسوطين


يشيلو بقى


قلتلها حضرتك بتقولى ايه يعنى عاوزه ايه


قالتلى يعنى انتى وابنى تقعدو تتكلمو وتتعرفو


ولو اتفقتو كده


انا سكت مش عشان السكوت علامه الرضا خااااااااااالص لا


عشان لو كنت فتحت بقى كنت حقول كلام مش ظريف نهائى


قالتلى ها ايه رايك


قلتلها فى ايه


قالتلى انتى شكلك مش معايا خالص


قلتلها اه شغل بقى حضرتك شايفه


لقيتها بتقولى انتى طيبه ولا شريره


تنحتلها وقلتلها وفى حد بيقول على نفسه هو ايه


اعتقد ممكن حد يعرفنى يجاوبك اكتر منى فى الموضوع ده


والناس اللى رشحونى كتر خيرهم بقى ممكن يقولولك


قالتلى طيب هاتى رقمك عشان اكلم ماما


قلتلها رقمى اه رقمى وماله


ونطت فى دماغى فكره انى اديها رقم موبايل مش بستخدمه اصلا
عشان تحل عن نافوخى بقى وارحم نفسى من تبعات الموقف ده


بقول 019


لقيتها بتقولى لالالا رقم البيت


بلمت حبه كده


وقلتلها بيت مين


قالتلى بيتكو


قلتلها ليه


قالتلى مش بحب الموبايلات


قلتلها اه بس تليفون بيتنا بايظ


قالتلى طب وبعدين 
عامه  هاتيه لما يتصلح اكلمكو


الست زنقتنى حته زنقه رحت عاطيالها الرقم


ومشت


وكأن كان فى اعصار وخلص


ياسااااتر على ده موقف


حاجه بجد تييييييييييييييت يعنى


المهم اليوم عدى بدون عواصف تانى


تانى يوم كنت حاسه من الصبح ان فى حاجه حتحصل


الست كانت حاسه تقريبا انى بشتغلها  واتصلت برضه


المهم انى انا اللى رديت


وهى تقولى انا طنط فلانه ام فلان اللى كنت عندك امبارح


قلتلها الرقم غلط وقفلت


اتصلت تانى ماما ردت


انا كنت قايله لماما طبعا


ماما قالتلها اهلا وسهلا


خير


قالتلها الحكايه كلها اللى قالتهالى


وقفلت من غير ما تتقف على اى حاجه
يادى القرف عاوزه ايه الست دى منى


تانى يوم اتصلت تانى


وقالت لماما انهم يجولنا البيت


ماما قالتلها تيجو ليه


قالتها عشان نتعرف عليكو وعلى ساره


كان نفسى ماما تقولها ساره مين


بس ماما للاسف قالتها
ممكن نتقابل بره فى اى حته


طبعا انا كنت شبه نقار الخشب لما بيتنطط


وعاوزه ازعق والست تسمع مش مهم


وماما ولا عاملالى اعتبار


نتقابل ليه وبره فين ومين اللى حيتقابل


لااااااااااااااااااااااااا
انا مش موافقه



بجد مش بحب الطريقه دى ارجوكم


وماما اتفقت معاها على يوم فى رمضان بعد الفطار


                                                                              يتبع ....







الجمعة، 17 سبتمبر، 2010

يوميات فى المشروع 3


طبعا بما انى بنوته رقيقه وهاديه ومش بعمل مشاكل خالص مع سواقين المشاريع ( الميكروباص يعنى )
عشان كده انا يومياتى فى المشروع كتير اوى


مره ركبت مشروع وانا مروحه من مشوار كان بعد الفطار فى رمضان وكان وقت صلاه التراويح


وسواق المشروع كان مشغل اغانى وصوتها عالى اوى وصلاه التراويح شغاله بره فى كل المساجد بصوت عالى طبعا المهم ركب شاب ظريف لطيف ( مش معاكسه طبعا ) وقام مشغل اغانى على موبايله بصوت عالى جدا


كده صوت الكاسيت بتاع السواق


وصوت موبايل الشاب الظريف اللطيف


وصوت الصلاه اللى طبيعى جدا انها تكون كتير وعاليه لاننا فى رمضان يا جدعان


انا بقى لانى هاديه جدا ومش بيطلعلى صوت ((وش بيبربش بعنيه ))


عملت كالتاتى


لو سمحت


لو سمحت


لو سمحت حضرتك صوت الموبايل عالى جدا وكده مينفعش


مش كفايه السواق واللى عامله فينا


راح لافف وباصصلى وقالى انا اعمل ايه يعنى التلفون  صوته مش عالى


وكطبيعه الشعب المصرى كنت انا البدايه


ولقيت الناس بتقوله لا حضرتك الصوت عالى والسواق كمان مشغل اغانى بصوت عالى
قالنا هو كلكو عليا ولا ايه


قلتله ما هو كده ميصحش


اكيد فى ناس مش بتستحمل الصوت العالى


وكمان الصلاه شغاله بره


والسواق مشغل  بصوت عالى اوى برضه


احنا نعمل ايه


لازم الناس تراعى بعضها برضه كده ميصحش


المهم سكت ووقف موبايله وهو بينفخ


انا قلت ماشى ينفخ براحته اهو احسن من الاغانى العجيبه اللى كانت بتتغنى


وكان ماسك موبايل اموت واعرف الفوليوم فيه لحد كام عالى بغباوه مش ممكن


المهم شويه ورايح قايل للسواق على جنب ونزل


ونزل وهو بيبصلى نظره  معناها كده انزليلى وانا اوريكى


وانا نزل عليا الضحك مش عارفه ليه


المهم الشاب ده نزل من هنا


والاقى السواق بيقولى على فكره يا انسه التليفون مكنش عالى


مكنتش عالى يا سواق يا تيييت ما انت مشغل اغانى ومعليها لازم تقول كده


قلتله لا كان عالى جدا واحنا حنلاقيها منك ولا منه


قالى لا يا انسه مكنش عالى اصل هو كان بيبعت حاجات بالبلوتوز
ايوه بالزين متستغربوش
قلتله وهو يبعت حاجات واحنا نصدع


ما كفايه اللى انت مشغله ده
والناس بقت تقوله حرام عليك


ويقولولى هدى نفسك هما السواقين كلهم كده


وانتى حتعملى دماغك بدماغ سواق


والاقيلك السواق طلع فى الست وسابنى انا بقى


قالها وماله السواق يا موودام مش بنى ادم ولا ايه


مش تخلى بالك على كلامك


انا قلتله على جنب ونزلت


والست معرفش عنها اى حاجه


بس ربنا يستر عشان السواق ده كان واخد فى وشه حوالى 80 غرزه


الله يخرب بيت المشاريع


على اللى اخترعها


على الاشكال العجيبه اللى الواحد بيشوفها

وطبعا لحد ما وصلت بيتنا كنت ببص ورايا


مش قد الكلام بتتكلموه ليه
عيال سيس صحيح


:) :)  :)


كبسولاتى

ليه احلى وقت تستمتع فيه بالنوم لما تقوم عشان وراك حاجه وتروح مطنشها ونايم تانى ياااااااااااه احلى حاجه

الثلاثاء، 14 سبتمبر، 2010

ارض الاحزان

موجه من الحزن تجترفنى من مكانى
وتطيح بى فى مكان بعيد
كنت اراها تقترب منى
نعم هربت منها
ولكنها كانت اسرع منى
التهمتنى بداخلها بوحشيه
ورغم انى ظللت اعافر فيها
الا انها كسبت فى النهايه
اطاحت بى فى مكان بعيد
رمتنى فيه فجأه
مكان ملىء بكل الوان الحزن
والأسى
وكل الاشياء المؤلمه
مكان يجعل روحك تختنق بداخلك
تبكى فلا تجد دموع
تصرخ فلا تجد صوت
تجرى فتجد نفسك ما زلت فى مكانك
تجلس فى امل ان يعبر احد
يأخد بيدك الى اى مكان اخر
او ان يعبر فقط
فيؤنس وحدتك
او يخفف من وجعك
لا احد يمر
ولا شىء يحدث
تتمنى الموت
ولكنك فيه
بداخله
بكل تفاصيله
لا تعرف حتى كيف تفكر
تستلم ,,,,,,,
------------------------
لعل الله يحدث بعد ذلك امرا

الاثنين، 13 سبتمبر، 2010

مزاد علنى

مزاد علنى كبير

وانت داخل فيه ايوه انت وانا وكلنا

داخلين فيه مش بمزاجنا ده غصب عننا

بيتوزع عليك وانت داخل كل الحاجات الكويسه اللى فى الدنيا بس ببلاش

زى بالظبط ما الطفل اللى لسه بيتعلم يتكلم ويمشى اهله بيعلموه الصح وبيربوه عليه

واحنا طبعا اللى ببلاش مش بيعجبنا

غاويين منظره

وكمان عشان سهل ناخدها عمرنا ما حنحس بقيمتها

بس الغريب بقى

ان كلنا عارفين ايه اللى بيتباع جوه فى المزاد وملون ويلفت النظر ويخطف العقل

هى الحاجات الوحشه والاخلاق المنيله وكل الغلط اللى ممكن تتوقعه

وبنغامر ونحارب عشان نشترى ونخطف من بعض وناكل حق بعض ومنحترمش بعض

وهو ده اللى بيقابله اى حد فينا فى حياته

بيتزرع فيه من وهو صغير كل حاجه حلوه

وتلاقيه بيختار الوحش برضه ومبسوط بيه وبيعمل المستحيل عشان يوصله لان الوحش متزين قدامه

هى دى الدنيا :(

ما الدنيا الا مزاااد كبير

الحق نفسك قبل ما المزاد يخلص

شوف حتشترى مع اللى حيشترو وبتغرهم الالوان والمظاهر الكدابه والغش

ولا حترضى بالحاجات الكويسه اللى جواك واللى اتزرعت فيك من يوم ما اتولدت


الأحد، 12 سبتمبر، 2010

حدث بالفعل حقيقى والله العظيم

المواقف دى حصلت فعلا وبجد وقدامى

وبالله عليكو محدش يقولى يبقى احنا اكيد فى مصر

عشان كفايه كده بجد انا قرفت خلاااااص



--------------------------------------

شويه ولاد يعنى سنهم ميجبش اعدادى

عيال يعنى سيس خالص

راكبين قدامى فى المشروع

تانى يوم العيد

طبعا خارجين اكيد

تخيلو بيتفقو على ايه

لا وبصوت عالى كده وعادى

انهم حيروحو المعموره

عشان يعاكسو ويعلقو بنات

ايوه هما بيتفقو على كده

المشروع طبعا كله عرف هما رايحين يعملو ايه

وكانهم رايحين فتح الله يعملو شوبنج

ايه القرف ده بجد

يااما الدنيا اتقلب حالها

يااما انا اللى غلط بقى ولا ايه

------------------------------------



تلات ظباط واقفين فى الشارع

ازاى طبعا يقفو فى الشارع زى بقيه الرعاه من الشعب

المهم شاورو لعربيه تقف على جنب

الشاب الى راكب اتخض جدا ونزل

راحو راكبين العربيه

وقالوله اركب وصلنا

ياعينى وقف يستوعب الصدمه شويه

انا تنحت فى الشارع بجد

وركب يا عينى ومشى بيهم

وده لو كان نطق وقال ايه اللى بتعملوه

او قال اى حاجه تانيه

كان راح زى خالد طبعا

طيب ولنفرض ان طريقه غير طريقهم

ايه قله الادب دى

بجد دى وقاحه



------------------------------------

كنت راكبه مشروع (( ميكروباص

مواصله الشعب المصرى

والراجل واقف بيركب ناس

وبينادى هو رايح فين

وباصص على باب المشروع

وفى واحد رايح جاى من نحيه باب السواق

اذ فجاه دخل ايده من الشباك ولقط موبايل السواق

وقال يا فكيك ... جرى طبعا

تخيل تشوف حرامى بيسرق قدام عينك ومتلحقهوش

كل اللى تعمله انك تقول حرامى

وانت لسه مكملتش الكلمه

بيكون هو فى محافظه تانيه اصلا

يعنى الحرامى الغبى ابن التيييييت ده

مش عارف يسرق حد تانى مفترى

جاى عالسواق الغلبان ده ويسرقه

السواق بجد كان هيعيط

وانا حتجنن

عشان معرفتش اعمل اى حاجه للحرامى ده

-------------------------------------------



بجد مش لاقيه حاجه اقولها غير حسبى الله ونعم والوكيل

كبسولاتى

ورقه الشجر وهى بتقع وبتفارق الشجره تحس انها شبه الانسان لما بيتصدم
ولما الهوا بيمرجحها يمين وشمال وهى نازله عالارض شبه الانسان اللى مش قادر يستوعب الصدمه وتايهه
ولما بتلمس الارض زى بالظبط الواقع اللى بيصدم اى شخص لما بيفوق من الصدمه

رباعيه (2)

واحد تايه ومش عارف وماشى
والتانى تايه وعارف وقال ماشى
والتالت لا تايه ولا فاهم ولا ماشى
ورابعهم شافهم ضحك عليهم وقام ماشى

رباعيه ( 1 )

الدنيا قاسيه بس ايه العمل
ما انا يابن ادم متخلقتش جمل
بصبر على قدى واه بحتمل
ما الصبر مفتاح الفرج والامل