الجمعة، 25 مارس 2011

دينا الرقاصه القنبله وأحكام النون الساكنه


بصو بقى علشان متقولوش البت دى بتخرف او بتقول اى كلام
 الموقفين دول حصلو بجد حقيقى والله العظيم
تعالو معايا بقى
 بس اوعو تندمجو اوى خوفا عليكو من العواقب الوخيمه للاندماج
واحده صاحبتى جالها عريس انما ايه اخلاق بقى عاليه وحاجه فل كده
طبعا انا قلت
هييييييييييييييه
اخيرا حد هيتجوز بقى والواحد هيحضر فرح ويهيص
راحلهم العريس فى اليوم المحدد
ومعاه الشيكولاته المتينه  اللى هى اكلاشيه دى فى اى جوازه
ودخل وهوب جت العروسه وقعدت تتكلم معااه
وهنا كانت المفاجأه
سألها العريس انتى بتصلى
قالتله اه الحمد لله
طيب بتحفظى قران
اه كنت بحفظ بس دلوقتى مش بروح
طيب يعنى بتعرفى تجويد كويس
قالتله اه الحمد لله
قالها طيب سمعى ايه احكام النون الساكنه
احكام نون ساكنه ايه يا عم الحاج هى دى من شروط الزواج الناجح يعنى
------------
استنى عندك هنا
ده مش تأليف على فكره ولا من دماغى
ده بجد والنحمه
كاااااااااااااات
 ونروح للموقف التانى الخرافه ده
 استعدو
واحدده صاحبتى تانيه جالها عريس برضه ابن حلال كده
وراحت عشان تقابله بره بقى مع ولاد الحلال برضه اللى جايبينه
كل الناس بقت ولاد حلال واخلاق  لو تلاحظو هه
قعدت صاحبتى مع العريس اللطيف الظريف ده
اللى بيسبلها من ساعه ما شافها
قعد يتكلم وبدأ يتكلم عن الحج والعمره
قالت فى سرها ماشاء الله ده باينه كويس والله ومتدين
فجأه وبدون مقدمات
قال ::: انا وانا رايح العمره اللى فاتت كنت بدعى ربنا من قلبى انى اشوف دينا
صاحبتى قالتله دينا مين اختك
قالها لا دينا الرقاصه
دى قنبله قنبله قنبله
يانهارك اسود ومهبب الهى تنفجر فى وشك يارب
انتى ساكته ليه انتى مش بتحبى دينا  هو فى حد زى دينا وهى بترقص
دى رهييييبه  
ولا الايرانيات اللى فى السعوديه انا اصلا بروح عشان اعاكسهم
انا ولا عمره عملتها اتقبلت اصلا بس ربنا يسامحنى بقى  
ربنا يسامحك ايه يابعيد .. دينا ايه وايرانيات ايه
هوايه اللى بيحصل ده يا بشر
-----
حاولو تتمالكو اعصابكو لو سمحتو
لانى مش عارفه اتمالك اعصابى بصراحه
العريسين فى نفس السن تقريبا
والاتنين لبنتين فى نفس الاخلاق والمستوى
وهو فى حد فى اول لقاء مع عروسه يبقى اووووفر اوى كده
سواء فى التدين او التهيييس
ايه الكائنات الغريبه دى اللى الواحد بيشوفها
ارجوك لو كنت حد من الحالتين اللى فاتو
 حاول تسامح اللى دعا عليك بقى
علشان هما اكيد كتيييييييييير

السبت، 12 مارس 2011

يوميات فى المشروع -- سواق دوت كوم



ياحبيبتى يا مصر يا مصر
يا حبيبتى يا مصر يا مصر
اااااااااااه
يا حبيبتى يا مصر
السواق بيغنى ومندمج جدا
بغض النظر عن صوته الا ان صوته العالى بيدل على وطنيه اكيده نابعه من معاميعه
لفتت نظر الركاب كلهم
فواحد من اللى راكبين قاله كفايه يا اسطى عارفين انك بتحب مصر
قاله مصر – ياسلام  -- هو فى زى مصر 
انا يا استاذ نزلت المظاهرات واتبهدلت وشوف دى رصاصه اخدتها فى دماغى
الراكب قاله مصدقك ياعم والله  بص قدامك بس احسن كلنا نموت دلوقتى .. الا هو انت نزلت المظاهرات ليه يا اسطى
بص يا ريس انا نزلت المظاهرات عشان العيشه اللى احنا عايشينها
والله فى ايام مش بنلاقى ناكل
والعيال والمدارس
كل ده كوم و الذل اللى انا بشوفه من ظباط المرور
تصدق يا باشا انى مره رايح اشوف المخالفات لقيتها ب ميه الف جنيه .. اه والله متستغربش
انا بقى رحت كاتب ورقه للبيه الظابط بتاع المرور قلتله حضرتك تحب اكتب العربيه باسم مين عندكو عشان انا مستغنى عنها  
اه والله اصل ميه الف جنيه ايه  دى عالم هبله باين عليها  دى العربيه متجيبش ربعهم
ضحك السواق  ضحكه استغراب
 واحده راكبه رفعت صوتها اوى – ما هى فرصه بقى اى حد يتكلم  الناس مكبوته ياعم --
 وقالت انا ساكنه قدام قسم وعندى  اتنين جيرانى  ظباط برتب مختلفه
 انا بشوف العساكر بعينى بيطلعو عند الظباط ينضفولهم البيت ويغسلولهم السجاجيد
وعربيات الاقسام بتروح السوق تجيب الخضار وتودى المدام المشاوير
السواق قالها انا كان الظابط يوقفنى وينزل الركاب ويقولى اطلع على المكان الفلانى
ما اكيد عشان عربياتهم مع المدام
كنت اقدر انا بقى اقول لا
كانت تبقى ليلتى سودااااا
تدخلت وبكل قوتى بعد صمت طويل
قلتله بس اوعى يااسطى متنزلش تدى صوتك فى الانتخابات
وقول كمان لكل الناس اللى تعرفهم
وانتخابات مجلش الشعب اوعو حد يديلكو كام الف عشان ياخد صوتكو
قالى لااااا  كلنا حننزل وننتخب
طب تعرفى يا ابله – مع انى بكره ابله دى  بس نعديها للسواق ده من ضمن التغيير يعنى –
 احنا اتجمعنا مع بعض كل السواقين
وهنعمل انتخابات فى نقابه السواقين  ونعمل كبير لينا
امال ايه
كان زمان اى واحد ييجى يتبطلج علينا وياخد مننا جنيه رايح وجنيه جاى
والظابط فى المرور عشه  جنيه – على فكره ال ر منسيتش اكتبها بس هو بينطقها كده -- 
عالصبح عشان يسيبنى فى حالى طول اليوم
انما خلاص بقى كل ده راح لحاله
ده احنا حتى عاملين بتاع ده عالنت
اسمه ايه ده اسمه ايه مش فاكر والله
اللى هو الناس بتدخل تتجمع عليه ويكتبو مطالبهم
كان واحد محامى ابن حلال قالنا عالموضوع ده
مفيش دقيقه والسواق ابن الحلال ده لبس فى عربيه قدامه
وكل الكلام عن التغيييير اتحول لسيمفونيه من احلى الشتايم والصوت العالى والزعيق
واغنيه يا حبيبتى يا مصر  فى ثانيه بقت دقيقه حداد دقيقه حداد بتاعه الراجل اللى بيغنى فى المشاريع بس ده

نصيحه : محدش يركب مع سواق مشروع  بيشغل اغانى وطنيه

بونبونايه وكراميل وسلوفان





بونبونايه جواها كراميل ومتغطيه بسلوفان
الكراميل هو الحب
البونبونايه هى الاحترام والتفاهم اللى بيغلف الحب
السلوفان هو الارتباط الصح اللى بيغلف كل ده
لو الكراميل مش موجود هتبقى البونبونايه مش حلوه اوى هتبقى عاديه جدا
ولو البونبونايه متكسره الكراميل هيطلع بره وهيقل جوه وممكن ميبقاش موجود
ولو السلوفان مش موجود الدبان هياكل البونبونايه وهتبوظ وهيبقى خساره فيها تتلف بعد كده بسلوفان جديد