السبت، 6 مارس، 2010

برىء يا بيه


قلت برىء لحد اثبات الادانه
قالو يلا مجتش على حته الدكانه
ياخدوها ويشبعو بيها الديانه
ما احنا بقالنا ييجى ربع قرن فى دى مهانه
مستنيين اللى ينصفنا ويعملنا كرامه
وبعدين انت جاى تقف على حته دكانه
طيب تقول ايه على باقى حقوقنا المتشاله
ايوه متشاله اوعى تقول مسروقه او منهوبه او حد واخدها غصب او خوانه
لا دى متشاله ومتصانه ومحدش يعرفلها طريق جره ولا حتى الدبانه
علشان احفاد احفاد احفادنا يلاقو لقمه نضيفه وشغلانه مرتاحه ومضمونه
نكته بس باخت لحد ما بقت حمضانه
ومبقاش الواحد ياكل منها اصل احنا مش لسه فى حضانه
اكتر بلد فيها خير بس بيتقال مش مكفيانا
يمكن عشان فى ناس بقت فجعانه
عاوزه تاخد كل حاجه فى بطنها وجيوبها تفضل عمرانه
ومش مهم النا س الغلبانه
اللى مش لاقيه اكل ولا متوى ولا لبس ولا قيمه ولا كرامه
عرفت بقى انها مجتش على حته دكانه احمد ربنا انك لسه وسطينا ومعانا

الخميس، 4 مارس، 2010

deal or no deal

بسذاجه تظهر على الشاشه وهى بتقول وبقها مفتوح من ودنها اليمين لودنها الشمال دييييييل او نووو دييييييييل وحتاخد ربع مليون جنيه جايزه ابقى قابلنى يعنى لو اخدتها وحتى لو اخدتها حتلاقى حد ينصص معاك فيها ما فى واحد بيتصل ولما يتصل كتير يكسب انه يقسم الجايزه معاك
وعلب مقفوله وفيها الفلوس من قرش لربع مليون جنيه
بصراحه كده هى حلوه ودلوعه مزه من الاخر بس البرنامج ده خلانى كرهتها (طبعا المذيعه مش العلبه ) بسبب التخلف اللى بحس انه طالع من البرنامج كل يوم حد جديد يقعد يلعب وده طبعا اللى امه داعياله مش حسب اختيار الكمبيوتر ولا حاجه وتبدا اللعبه اللى هما مسينها لعبه الحياه ياريت والله الحياه كانت تتلعب فى حلقه مكنش حد غلب ولا تعب
المهم تبدا اللعبه ويبدا المتسابق بفتح العلب اللى موجوده مع باقى المشتركين فى البرنامج اللى لسه امهم مدعتلهومش عشان يقعدو مكانه
وطبعا خير وبركه لو فتح عليه فيها مبلغ صغير ومصيبه وكارثه لو فتح عليه فيها مبلغ كبير
ورقص وهيصه لو المبلغ صغير ويروح يسلم على اللى معاه العلبه اللى فيها المبلغ الصغير ومفيش مانع يبوسه او يبوسها كانهم هما اللى حاطين المبلغ الصغير فى العلبه
ويفضل يفتح فى العلب وكل اربع علب التليفون يرن والدلع الزياده من مذيعتنا المزه اللى هى اصلا مذيعه وممثله ومغنيه وكل حاجه
المهم ترد عالتليفون والمفروض انه البنك هو اللى بيتكلم عشان يقول عرض للمتسابق اللى بيفتح العلب وطبعا معد البرنامج هو اللى بيتكلم او المخرج اوبيقسموها عليهم عشان محدش يقول اشمعنى انا متكلمش
وبعد عرض البنك المفروض المتسابق يااما يقبل عرض البنك او يرفض ودى طبعا قمه المغامره من وجهه نظرهم
ويستمر فى فتح العلب لحد ما يوصل لاخر علبتين وغالبا بتبقى واحده فيها رقم صغير والتانيه رقم كبير
عشان تبقى الصدمه ليها لازمه
وغالبا بعد ما مامته دعتله يقعد يلعب دعت عليه يخسر برضه
فبيطلع فى الاخر كسبان المبلغ الصغير
مره متسابقه كسبت قرش
انا بقى كان نفسى اشوف القرش اللى حيدوهولها ده وانهى متصل حظه فل اللى حيقسم معاها وياخد 5 مليم فقط لا غير
والصدمه طبعا والعياط والموسيقى الحزينه وناس يغمى عليها
فى ايه يا جدعان ده لو حد مات مش حيعملو كده
البرنامج ده من وجهه نظرى تافه اوى اوى اوى
وبجد معدتى بتقلب لما بشوف التفاهه دى
طيب كانو يعملو كام سؤال كده عشان يحللو الفلوس اللى بياخدوها
هى الدنيا جرى فيها ايه يا ناس
ناس مش لاقيه تاكل وناس رايحه تلعب بالعلب وتاخد فلوس
خلاص مفيش حاجه تتعمل يتجاب منها فلوس غير اللعب فى العلب
لو لعبو فى مناخيرهم ممكن يصعبو عليا واديلهم فلوس برضه حيبقو مقرفين بس حيصحبو عليا عشان مش لاقيين منديل
ربنا يرحمنا بجد من ام البرامج اللى بقت تجيب المرض دى
وعموما انا بقول no deal