الخميس، 18 فبراير 2010

احلامنا


البحر كبير وواسع ومش كل موجه زى التانيه
فى موجه كبيره تخوفك وهى جايه من بعيد بس الموجه دى قبل ما توصل للشط بتتكسر وتدوب فى الميه
وعمرها ما بتوصل للشط زى ما هى بقوتها
اما الموجه الصغيره بتوصل للشط زى ما هى برقتها وهدوئها وكانها جايه تروى الرمله العطشانه على الشط
البحر واحد والميه واحده بس موجه تخوف وموجه تطمن
موجه فاكره نفسها كبيره وهى اصلا بتتكسر قبل ما توصل وموجه صغيره رقيقه بتروى الشط بكل حنيه
الموج فى البحر عامل زى احلامنا فى دنيتنا
حلم كبير بيتكسر قبل ما يوصل لبر الامان
وحلم صغير جنب حلم صغير بيوصلو لبر الامان
لازم احلامنا تكون على قد ظروفنا اللى حوالينا او اكبر بشويه وكل ما نوصل لحلم نحلم باللى اكبر منه
مينفعش نحلم مره واحده بحلم كبير ونقعد نفكر ازاى يتحقق وفى الاخر نفوق على الحلم بيتكسر قدامنا لازم نحلم بس نحلم صح عشان نعرف نحقق اللى بنحلم بيه ومنندمش بعد ما العمر يضيع فى الاحلام من غير ما تتحقق

السبت، 13 فبراير 2010

ازمااات

كل الناس بقت بتتكلم فى الموضوع ده
وحاسين انه ازمه ومشكله كبيره
وان هى دى الحاجه الخطيره
اللى بتهدد مستقبل الشباب وكمان بعض الناس الكبيره
وبرامج وحوارات واسئله وندوات وحلقات مثيره
وناس عالنت تكتب ومواقع ومنتديات وحاجات كتيره
حوالين الموضوعين اللى بيهددو الشباب فى الفتره الاخيره
والناس بقت مرعوبه مش عارفه ايه اللى جاى ولا ايه العمل وكلهم مسكتهم الحيره
الشباب نفسهم يرتاحو ويلاقو وظايف بمرتبات كبيره
ويتجوزو فتاه احلامهم ويقضو شهر العسل على ابعد جزيره
والبنات نفسها تتستت فى البيت او حتى تشتغل بس تتجوز وتبقى فى بيتها اميره
المهم ان الاتنين شباب وبنات بيفوقو فى الاخر على صدمه مريره
لا شغل ولا جواز ولا جزيره ولا اميره ولا نيله
وده مش لعيب فى الزمن او فى اى حاجه حوالينا لا ده لعيب فينا
لان اصلا المشكله مش للدرجه دى خطيره
فى شغل يا جماعه بس للى يدور بذمه ويشتغل اى حاجه لحد ما يوصل للحاجه اللى نفسه فيها
وكفايه كلام كتير عن مفيش شغل ولا حد بيشتغل بضمير لان فى ناس كتير شغاله فينا
اما الجواز فالناس شايفه انه مصيبه كبيره
مع ان الموضوع ممكن يبقى بسيط لو الناس خلت طلباتها بسيطه
مش مهر وشبكه وشقه وهدايا وكل الحاجات دى لازم تبقى غاليه وكتيره
والا البنت تبقى ملهاش قيمه
مع انه مش ده دليل الراحه والامان والكرم والتفاهم والطيبه
الاعتدال احسن حاجه تخلى كل الازمات هينه ويسيره
لانه اكتر حاجه عامله ازمه ومصيبه اننا بنتكلم كتير عن اى حاجه مرينا بيها
ونعمم اى حاجه حصلت على كل حاجه حوالينا
مع اننا لو فكرنا صح حتلاقى ان ممكن تكون فى مشكله بس سهله وبسيطه
لان عندنا عقل ممكن نغير بيه اى حاجه حوالينا ولا يبقى فى ازمات ومصايب والدنيا تبقى جميله

الثلاثاء، 9 فبراير 2010

القسوه

بجد قسوه الدنيا بقت تجن
تقهر وتوجع وتخلى دماغك تون
والدنيا اهلك وصحابك وناسك
لما القسوه تيجى من دول
يبقى عالدنيا السلامه والموت بيبقى كل الحلول
القسوه اصعب شىء فى الكون
ممكن تطلع بقصد او غصب او ساعه جنون
القسوه يعنى قلب مفيهوش دم ولا نبض
ممكن يوجع ويجرح وميحسش بذنب
القسوه يعنى مفيس احساس
وساعتها ممكن تيجى على اقرب الناس
احساس بمرار والم فظيع
ودموع فى لحظه بتتجمد فى العين
ودقات قلبك بتصرخ بجنان
عاوزه تتكلم وتقول حرام
القسوه بجد اصعب شىء فى الكون
لو اللى بيقسى يحس بجرح المظلوم
وانه ساكت ومش عارف يتكلم ولا يلوم
لو يعرف انه بيموته ميه مره فى اليوم
كان بقى حنين وشال من قلبه القسوه
او حتى حس باقرب الناس ليه وعرف انه بجد حرام انه ييجى عليه