الأربعاء، 12 مايو، 2010

الذكريات ولا الواقع ؟


لما عمرك وسنينك وكل ايامك تبقى فى ذكرياتك عباره عن شوارع ولما تمشى فيها تفتكر مشيت فيها امتى ومع مين وكنت وقتها قد ايه وريحه لما تشمها تفتكر اشخاص ووقت معين فى عمرك بكل تفاصيله ولما تاكل اكله بقالك كتير مكلتهاش الا مع حد معين وتفتكر الايام دى والحد ده والمكان اللى كنت فيه ولما يعدى عليك مناسبه او يوم وتفتكرها لما كانت بتعدى عليك كل سنه وايه اللى بيحصل فيها ومع مين وكل التفاصيل الصغيره ولما شريط حياتك يعدى فى بالك وانت ساكت وسرحان تفتكر حاجه تخليك تبتسم وحاجه تانيه تخلي عنيك تدمع وتحس كانك بتسمع موسيقى تصويريه هاديه ونسيم البحر بيخبط فى وشك وحاجه تخليك تقول ياريتنى وحاجه تخليك تقول الحمد لله وايام يبقى نفسك ترجع تعيشها تانى لانها احلى ايام فى عمرك وايام تانيه نفسك ترجعها عشان تغير كل اللى عملته فيها وكل تصرفاتك وقتها وتفتكر ناس عدو عليك فى حياتك نفسك ترجع تشوفهم تانى وناس اتعلمت منهم وناس عرفتهم على حقيقتهم وناس وناس تغمض عنيك وتتنهد اوى وفى عنيك دموع مش عارف هى دموع ندم ولا حيره ولا حزن ولا فرح ولا حنين ولا ايه بالظبط وتفتح عنيك وتفتكر انك فى الواقع اللى لازم تعيشه وان فى ناس حواليك وحياه جديده مستنياك تعيشها صح عشان مترجعش فى يوم تندم على حاجه فيها بس ياترى فعلا ؟؟ احلى يوم لسه معشناهوش ولا خلاص عشناه وبنحاول نقنع نفسنا اننا لسه معشناهوش حلاوه روح يعنى

السبت، 8 مايو، 2010

ليه كده؟؟؟

ليه لما حد يقرب من حد يبعد ولما يبعد عنه يلا قيه بيقرب ليه الناس مش بتحس بقيمه الحاجه اللى فى ايدها الا لما تضيع منها ليه الناس كلها بقت شايفه نفسها صح وليه دايما يكون رد الناس الله يخرب بيتهم بوظو البلد مع ان الموضوع مالوش اى علاقه بالبلد ليه الناس الصبح بتشغل قران وبالليل تشغل قران وطول النهار هلس ومسخره حاجه كويسه ان الناس تبدا يومها وتنهيه بالقران بس ليه فى النص كده ليه الواحد لما بييجى الدنيا بيصوت ولما بيموت بيصوتو عليه ليه لما تكلم حد صاحبك بقالك فتره مكلمتوش يقولك يااااه كنت على بالى حالا ولسه كنت كلمك ليه لما تبقى مستعجل المواصلات تبقى بطيئه ولما تبقى فاضى توصل بدرى ليه لما يبقى في حد طيب الناس بتستغل طيبته عشان عارفين انه بكلمه حيروق ويبقى زى الفل ليه بنقول كتير اوى كلمه معلش مع انها المفروض تتشال من القاموس لان ملهاش اى معنى لما تتقال لحد ما يتوجع ليه الناس بقت بترد ردود تحتمل الف معنى مع ان التوضيح سهل ومريح ليه دايما بنعلق على اخطاء اللى قدامنا وبيبقى فينا نفس الغلط ومش واخدين بالنا ليه ياترى كل ده

الأربعاء، 5 مايو، 2010

الانطباع الأول


الانطباعات الاولى تدوم؟؟؟ولا فى كل مره الانطباع بيختلف وكام مره خدت انطباع عن حد من اول مره وطلع غلط وكام مره طلع صح لو الانطباع الاول دايما هو الصح مكنش حيبقى فيه كلمه صدمه فى حد لانه حيفضل دايما زى اول مره لكن الصدمه معناها انه ظهرلك منه فجاه وش تانى غير اللى قدامك واللى شفته اول مره وبتتصدم وبعدها تفهم الحقيقه وهل فى ناس ممكن تخدعنا بانطباع هى عاوزه توصلهولنا يعنى يبقى للشخص كذا وش ويلبس كل وش فى الموقف اللى يناسبه وهل ده صح ان الواحد يتعامل مع كل واحد زى ما بيعاملهولا الصح ان الانسان يتعامل زى ما هو بشخصيته مع كل الناس ازاى فعلا ناخد انطباع عن حد ؟وبعد كام مره نقدر نقول راينا فيه ونحكم عليه والمفروض نعمل ايه عشان منتصدمش فى حد ؟؟؟