السبت، 31 يوليو، 2010

التناقض

من البدايه كده وعشان نبقى على نور
كل اللى حقوله ده بيحصل معانا كلنا
لو مكنش كله حيبقى حاجه ولا اتنين منه
بس بجد دى حاجه غريبه اوى
ليه الناس كلها بقت متناقضه كده
يااما كلامهم عكس تصرفاتهم
يااما تصرفاهم متركبش على بعضها
حاجات كتير اوى الواحد بيشوفها مليانه تناقض
فى البيت والشارع والشغل والمواصلات وصحابه وجيرانه
لما تلاقى واحد مشغل على موبايله قران ومفيش دقايق وتلاقيه جاب اغانى
واحده ماشيه لابسه حجاب وبنطلون برمودا مبين رجلها
واحد راكب مع بنت واول ما تنزل يشتم فيها
واحد بدقن والصلاه بوقتها فى الجامع وبينصب على الناس وميديهومش فلوسهم
واحد بيدافع عن حقوق الناس وهو مبهدل اقرب الناس ليه بمعاملته الزفت
هو ليه كده بجد
ليه تلاقى فرح فى شارع ومفيش 50 متر وتلاقى صوان عزا
تلاقى اختين ماشيين مع بعض واحده محجبه وملتزمه والتانيه مهيصه ومقضياها
واحد يقعد يقول انا بعمل وانا بعمل وساعه الفعل متلاقيش منه اى حاجه
الناس بقت بتيجى على اللى بيحبهم ويحترمهم ويعملو حساب ويراعو اللى مش فى بالهم
ويقولو انهم مبيجوش على حد ايه قمه التناقض ده
تلاقى واحد لما يبقة قاعد مع حد يبقى زيه
متدين معاك
بيهلس معاك وبيييييس
مره شفت سواق مشروع كانت راكبه جنبه قدام بنت مهيصه شويتين راح مشغل اغانى وعاليه وهيصه
البنت دى نزلت وركبت واحده منتقبه راح مشغل قران

ايه اللى بيحصل ده يابنى ادمين
ليه كل واحد ميبقاش هو وبس
ايه الصراع اللى الواحد بيشوفه ده صراع بين الناس وجواهم
فى ناس بقى بتناقض نفسها قدام حد معين عشان توصل لحاجات
مراكز وفلوس وجوازه
ده ايه النيله دى
التناقض موجود جوانا بس بحدود وميكونش مضر
ميبقاش بالصوره اللى الدنيا بقت فيها دى
كده كتييييييييييييير
ولا ايه ؟!؟!؟

الجمعة، 30 يوليو، 2010

24 ساعه

دايما لولا قدر الله فى حد حالته خطيره تلاقى الدكتور بيقولك لو عدت ال24 ساعه دى على خير يبقى ربنا كتبله عمر جديد (مع انهم ممكن يعدو على خير ويموت برضه))
طبعا الكام ساعه دول بيعدو على اهل المريض سنين مش ساعات
بس انا لقيت ان فى حاجات كتير اوى بتفرق فيهم ال24 ساعه
زى الحاجات الى جايه دى كلها


اخر 24 ساعه فى الشهر لموظف مستنى القبض بفارغ الصبر
اخر 24 ساعه لواحد فى غربه ونازل بلده خلاص
اخر 24 ساعه فى الاجازه للولاد الصغننين قبل المدارس
اول 24 ساعه فى الصدمه لحد بيبقو وحشين اوى
اخر 24 ساعه لواحد فى السجن وحيخرج
اخر 24 ساعه لام حامل خلاص حتشوف ابنها
واول 24 ساعه وابنها بين ايديها
اخر 24 ساعه لواحد عند الكعبه
اخر 24 ساعه فى تقديم اى ورق مهم فى جهه حكوميه
اخر 24 ساعه لواحد خلاص حيطلع معاش
اخر 24 ساعه لعريس وعروسه كل واحد فى بيت اهله قبل ما يبدأو حياه جديده
اخر 24 فى رمضان
اخر 24 ساعه لحد يتيم حيكمل ال21 سنه وياخد فلوسه من عيلته
اخر 24 ساعه لبنت جايلهم عريس البيت
اخر 24 ساعه فى عرض الرسايل اللى بتعمله فودافون
:)
اخر 24 ساعه فى المصيف محدش بينام
اخر 24 ساعه لواحده مطلقه فى عدتها عشان تقدر تتجوز تانى
اخر24 ساعه قبل نتيجه الثانويه العامه
اخر 24 ساعه لواحد محكوم عليه بالاعدام




يارب يبقى اخر 24ساعه فى حياتنا كويسين وربنا يحسن خاتمتنا

الثلاثاء، 27 يوليو، 2010

دعوه للحب

كنت راكبه مواصلات سمعت اتنين بيتكلمو
على واحد صاحبهم مات
وبيقولو انه كان طيب اوى
وانهم كتير زعلوه منهم ودايقوه

جه على بالى حاجه فكرت لو الناس تعملها حتبقى حلوه اوى
طبعا كلنا حنموت
واللى بيزعل اى حد فينا لما حد قريب منه بيموت الفراق مش الموت فى حد ذاته

فكرت ان احنا ليه منتعاملش مع بعض على الاساس ده
يعنى انا بحب صاحبتى اوى اوى ليه ازعلها منى ونتخانق ونيجى على بعض
تخيلت انه لا قدر الله بعد الشر لو صاحبتى دى جرالها حاجه
حقول ياريتها كانت معايا وكنت مش حزعلها ابدا

لو حد فينا لا قدر الله حد من اهله مات وهو كان بيزعله كتير
حقيقى بيتمنى ساعتها انه يرجع ولو ساعه واحده عشان ميزعلهوش ابدا فيها

ليه منتعاملش مع بعض على الاساس ده
قبل ما ازعل حد منى اتخيل انه لاقدر الله لو جراله حاجه حبقى نفسى يرجع وانا اعامله كويس بس يرجع
نحاول مره فى حياتنا منندمش بعد فوات الاوان
مش بعد ما تحصل الحاجه نقول ياريتنا كنا عملنا كذا

احنا فى ايدنا كتييير بجد
فى ايدنا اننا منوجعش بعض
فى ايدنا اننا منزعلش ومندايقش حد مننا
فى ايدنا اننا نقرر عاوزين نمشى صح ولا نندم على تصرفاتنا بعد فوات الاوان

لما نبقى دايما مبتسمين فى وش الناس اللى بنحبهم
ودايما بنحاول منزعلهمش مننا
مش حنخسر اى حاجه
بجد حنكسب كتييير
حنكسب ان احنا حنفرحهم ونسعد قلوبهم
وكمان بسمتك فى وش حد منهم صدقه

نفسى بجد الناس كلها تعمل كده
وكلنا نخاف على بعض ونراعى بعض

ربنا يحبكو كلكو ويحببكو فى بعض ويخلى قلوبكو على بعض
:)

الاثنين، 26 يوليو، 2010

اعتراف

طبعا العنوان مصيبه لوحده
ياترى حتعترف بايه دى وحتقول ايه ربنا يستر
سكتوها يا جماعه دى انا عارفاها
ممكن تبوظ الدنيا :)
سيبوووووووونى اتكلم بقى
انا عاوزه اعترفلكو فى اعتراف مهم جدا

انا بحب مامتى اوى وبابايا كمان
ولما بقعد مع ماما بنتكلم كتير جدا
مش نميمه والله لا
بس بنتناقش فى حاجات كتير اوى
كمان بقى
بحب اوى لما ماما تصحى الصبح بدرى مخصوص عشان تعملى فطار قبل ما اروح الشغل
يااااااااااه بجد احساس مالوش حل
ربنا يخليهالى
بجد انا مش اوفر فى وصفى لاحساسى لانى بجد هوه ده اللى بحسه
بحب بابا وماما اوى

امبارح بقى اخواتى وبابا رجعو من الغردقه
كانو بيصيفو
انا طبعا حقدت عليهم حقد الجعان اللى بيتفرج على واحد قاعد فى مطعم بياكل فراااخ
بس قلت يلا خليهم يريحونا شويه
كأنهم قاعدين على دماغى مثلا
راحو واتفسحو
والمهم انهم وصلو بالسلامه
لما وصلو انا كنت نايمه ولما نورو النور صحيت ولقيتهم
مش عارفه ليه قمت وسلمت عليهم وبوستهم وكانهم بقالهم سنه مسافرين
معرفش كانو واحشنى كده ليه
كان ناقص اغنى بحبك وحشتينى بحبك وانتى نور عينى ده وانتى مطلعه عينى بحبك موت

وقمت وقعدت معاهم وقعدو يحكو مع ان انا عندى شغل بدرى والكلام ده كان الساعه 3 الفجر
ياترى فعلا ليه وحشونى كده ؟؟؟

رحت انا بقى مقرره قرار
قررت بقى ايه ان انا مزعلهمش لا هما ولا ماما وبابا
اه نويت باذن الله مخليهمش يزعلو منى
حتى لو حاجه صغيره
بس لو هما زعلونى انا حاجى اشتكيلكو على طول
:)


بجد الحمد لله على نعمه البيت والاخوات وكل حاجه حلوه الواحد عايش فيها
ده حقيقى اعتراف بفضل ربنا عليا

ربنا يديمها نعمه

الأربعاء، 14 يوليو، 2010

شربت جهينه النهارده ؟؟؟

شربت جهينه النهارده ؟؟؟
ليييييييييه بس
كان لازم تشرب
اصل انت متعرفش
جهينه عامله حمله اعلانيه كبيره اوى
بيطلع ناس فى الاعلانات بيشربو عصير جهينه
وفجاه يقومو قايلين رايهم بكل صراحه فى اى حد
جايبين بنت بتقول رايها فى الشباب السيس اللى بعضلات ومجانص
وولاد بيقولو رايهم فى البنات
والواحد يشرب من هنا ويقوم قايل كل اللى فى نفسه
ايوه صح
هى حبوب الصراحه مدوبينها فى العصير
تشرب العصير من هنا
وتقول كل اللى فى نفسك
فى احلى من كده
بس لو كترت عن عبوتين فى اليوم ممكن تتمسك من كتر اللى حتقوله
او تتضرب علقه محترمه فى الشارع
(طبعا دى من عندى مش فى الاعلان)

لا بجد صحيح هو ايه الحكمه انك لما تشرب عصير جهينه تبقى صريح اوى كده
اكيد فى سبب !!!
انا عاوزه الطب الشرعى يحلل العصير ده
اما نشوف ايه الى فيه


وبعدين فكر فيها كده حتلاقى ان جهينه كده حتقلب نظام الحكم
لالالالالالالالالالا
قصدى تعدله
ما هو مقلوب اصلا
لما كل واحد يقول رايه بصراحه يبقى
اوبااااااااااااااااااااااا
ربنا يستر بقى
كل الحزب الهشتك ده حيبقى معارضه
ده مش بعيد اونكل حسنى بذات نفسه يبص لنفسه فى المرايه ويقول
يعععععععععع انت تانى
عاوزين حد تانى بقى ياعم خنقتنا
دى جهينه غيرت وانت لسه قاعد


متاخدوش على كلامى يا جماعه اصلى شربت من العصيرده
وعماله من الصبح بقول كلام غريب

الثلاثاء، 13 يوليو، 2010

ذكريات الطفوله

عارف لما تشوف حاجه تخليك تعمل فلاش باك لفتره معينه فى حياتك او موقف حصلك زمان
امبارح شفت بنوته صغيره متكملش 4 سنين وماشيه ماسكه فى ايد باباها ومامتها شايله نونو فالبنوته الصغنونه دى شايله شنطه مامتها
الموقف ده فكرنى بيا وانا صغننه(موسيقى تصويريه )
لما كبرت شويه ودخلت اعدادى كده كنت حموت وامسك شنطه زى الستات الكبار
حاجه خيبه يعنى
بس كنت طفله بقى
المهم عشان مطولش عليكو كنت بزن كتير لماما عشان تجيبلى شنطه
وهى تقولى حتعملى ايه بيها
اقولها لما انزل امسكها
تقولى لما تكبرى شويه
لا بقى ماليش دعوه
عاااااااااااااااااااااااااا
انا عاوزاها دلوقتى
المهم
ليا عم عايش فى امريكا وهوه جاى كل سنه بيجيب لباقى العيله كلها من امريكا حاجات
فى الصيف اللى بعد اولى اعدادى
عمى جابلى شنطه
شنطه مش ممكن مش مصدقه نفسى
احمدك يارب حققتلى اللى كنت بحلم بيه
وشنطه رقيقه اوى ورصاصى كمان وانا بحب اللون ده جدا
ده كتير والله كتير
انا طبعا مكدبتش خبر كنت بنزل بالشنطه فاضيه بس امسكها وخلاص
ونفسى اقول لكل الناس فى الشارع انا ماسكه شنطه

ايه العباطه دى
اصلى فعلا كنت ححط فيها ايه
دلوقتى بقى تعالو شوفو شنطتى عامله ازاى مش بقدر اشيلها من اللى فيها
قلت هو انا كنت مستعجله كده ليه انى امسك شنطه
ده ايه الخيبه دى

انا حلملم بقى الذكريات اللى اتبعترت دى فى كل حته
واقابلكو فى حكايه تانيه بقى
:)

الأحد، 11 يوليو، 2010

تعيش القرود



بصو بقى انا حقولكو على حاجه بس متقولوش عليا مجنونه
انا قررت اعمل زى طرزان واروح اعيش فى الغابه
مع القرود
وكل كلامى يبقى ايه بقى
اواواو اه اه اه او او او او اه اوووو
واعيش مع القرود بقى

والله القرود محترمين وزى الفل
على الاقل مفيش قرد شايف نفسه حيقتل قرد اخوه ويقول مات باسفكسيا سباطه الموز

ياعم متحاولش تقنعنى
تؤتؤتؤ اننننننسى
حتقولى القرود مش بتفهم ولا بتميز

طيب ما هى البنى ادمين مش بتفهم ولا بتميز
متبصليش كده
اه مش بيفهمو ولا بيميزو
لما يبقى الامن المركزى اللى شبه الانسان الالى ده يجرى ويضرب الناس وهما اصلا مش عارفين بيعملو كده ليه
يبقى دول بيفهمو او يميزو
لما تلاقى واحد خايف يطلب حقه
يبقى ده بيميز
لما تلاقى ناس واكلاها والعه وناس مش لاقيه اصلا اكل لا والع ولا بارد
يبقى الناس دى بتميز
على الاقل القرد لما يلاقى القرد اخوه جعان حيديله موزايه, سودانايه واهو لا بيميز ولا بيفكر

الغابه بقت ارحم بجد من اللى بنشوفه فى الدنيا ده
دى بقت حاجه اواواه اواه
--دى شتيمه بس بلغه القرود---

امبارح بشوف برنامج من البرامج السيس دى
بيناقشو موضوع ايه بقى
استنو
اقعد لو واقف ولو قاعد اسند كده وخد بالك على حياتك عشان الموضوع ده خطير اوى على القلب وخصوصا الناس اللى ضغطها عالى وطبعا كل الناس بقى ضغطها عالى

بيتناقشو فى الفقر
اه والله بيتكلمو على الطبقه المعدمه من الناس
لا مش ده اللى يشل
اللى يشل لسه جاى
المذيعه اللذيذه بتقول ايه
شويه وحناخد تليفونات من الناس اللى عاوزه تقول شكوتها والناس دى طبعا لازم تكون حالتها تستدعى انها تطلب المساعده او تتناقش فى فى مشاكلها يعنى لازم يكونو مش لاقيين ياكلو

على اساس ان اللى مش لاقى ياكل حيلاقى حق المكالمه للبرنامج عشان يقول انه مش لاقى ياكل
ولا حيكون عنده تليفزيون اصلا ووصله مش حنقول دش
اللى بتقتل ابنها عشان الفقر
واللى بينتحر عشان الفقر
الناس بتموت عشان مش بتلاقى تاكل
هى دى الناس اللى حتكلم البرنامج يا ناس يا تييييت
بيتكلمو عن الناس المعدمه يا جدعان
المعدمين اللى مش لاقيين الهوا
ايه السذاجه والتخلف ده
شفتوش انتو قرد بيقول كلام اهبل كده يا ناس

خلاص يبقى عيشه الغابه احسن
وتعيش القرود ويسقط يسقط او اه او او

:)

الأربعاء، 7 يوليو، 2010

المسطول


صباح الفل قصدى مساء الفل اهو فل عليكو وخلاص

طبعا دى حاجه واحده من الكلام الكتير اللى احنا بنقوله

فل وقشطه وبيس وميه ميه وحاجات كتير

بس انا بقى لاحظت حاجه غريبه جدا غير الكلام وكل ده

وعاوزاكو تقولولى بيتهيألى ولا ده جد وبيحصل فعلا

انا حاسه ان الشباب بقى شكلهم غريب

مسطولين وكأنهم شاربين حاجات كده مش مظبوطه

تلاقى الشاب من دول ماشى فى الشارع وبيعدى الشارع

والعربيه تزمرله عشان حيتخبط وده ماشى ولا حاسس بالدنيا

ماشى سرحان وطالع عينه

يعنى الناس الكبار متلاقيش عليهم الاعراض دى

انما الشباب تنزل الصبح تلاقى شاب راكب المواصلات

ووتقريبا نسى يغسل وشه قبل ما ينزل

ولو حد قاله نص كلمه كأن حد بيرجه زى البيبسى ويفور على طول فى وشه

ييعع

يروح شغله طبعا والشغل طبعا هنا مش شغل ده سخره

زى بالظبط لما حفرو قناه السويس واكتر شغلانه موجوده دلوقتى هى المندوبين

بيبيعو ايه ؟؟

اى حاجه فى اى حاجه

كل شركه تنزل مندوبين فى كل منطقه

تلاقى شباب وبنات ماشيين فى الشوارع ماسكين الشنطه العجيبه بتاعه المندوبين دى

وفى الحر بقى ربنا ما يورى حد بيبقو باينين اوى

ماشيين متنحين كده من الشمس

انا بقترح يعملولهم استراحات بشمسيه كده

ويتعمل عليها يافطه للمندوبين وكبار السن

زى للمعاقين وكبار السن كده

الشاب ده اللى بيلف طول النهار وهو مروح من شغله وراكب المواصلات تلاقيه يناااام

النهارده شفت واحد شكله مروح من شغله وطالع عينه يا عينى طول النهار

نايم وراسه طالعه بره شباك المشروع وفاتح بقه انا قلت ده مات ده ولا ايه

الراجل اللى قاعد جنبه صحاه وقاله دخل راسك جوه وشوف انت نازل فين عشان متروحش عليك نومه

قاله لا انا حصحى لوحدى لما اجى نازل

--متفق مع السواق تقربيا --

بعد كده حتبقى الاجره جنيه ونص عادى

واتنين جنيه مع المنبه

والله وفى بنات بتنام فى المواصلات

وطبعا اللى بينام فى المواصلات بيصحى على المطبات او فرمله العربيه

وتلاقى اللى متعود على النوم فى المواصلات ينام ويصحى بالظبط مكان ما هو نازل

بس ليه الشباب بقو عاملين كده تقريبا فى حد بيحط حاجه فى ميه النيل

حبوب احباط وقرف وبهدله وهلوسه

ولا ليه النيل هو احنا اصلا بنشرب منه

دول بيضحكو علينا ومقوله مصر هبه النيل دى غلط اصلا

احنا بنشرب من الحنفيه

يعنى المفروض يقولو اللى يشرب من حنفيه مصر يرجعلها تانى

بس الظاهر كده ان فؤاد المهندس حطلنا شوال حبوب من اللى كانت فى ارض النفاق

واهى شغاله الله ينور كل الناس تعطس والمفعول يبدأعلى طول


بالمناسبه صح واحد عطس فى قفايا فى المشروع امبارح حسيت انى استحميت

الظاهر ده كان شارب ميه كتير فالعطسه كانت قويه شويه


وبعدين طيب هو السطل ده حيروح امتى؟؟؟

من الناس ولا المفعول ده الى مالا نهايه

ولا حينتهى مع انتهاء الفتره الرئاسيه القادمه


هو ايه اللى انا بقوله ده

واضح انى انا كمان شاربه ميه كتيرالنهارده

هااااااااااااتسى

الحمد لله

الجمعة، 2 يوليو، 2010

السعاده المشروطه


الشمس كانت حاميه اوى اليوم ده والجو كان حر فوق الوصف والناس بتجرى هنا وهناك اللى ماسك حاجه على راسه عشان الشمس واللى بتدور على حته ضل تقف فيها واللى بتدارى ابنها البيبى من الشمس ولفت نظرى منظر غريب جدا منظر البحر ------------ كان بيلمع اوى اوى والشمس كانت عاطياله لون جميل جدا بس البحر كان بيعكس نور الشمس تحس انه زعلان ومش عاوز النور يدخل جواه شكله كان جميل اوى من بره بس اكيد من جوه كان زعلان اوى ومليان هموم ولما الشمس غابت البحر كان منظره حزين اوى واللى كان من جوه طلع من بره كمان وبقى زعلان ومستنى الشروق كل موجه تحس انها بتوصل الشط تسأل هو الشروق امتى بقى لما شفت المنظر ده حسيت انه شبهنا اوى او بقى شبهنا من كتر ما بنرميله همومنا لما حد مننا بيبقى زعلان من حد بيحبه اوى ممكن يضحك وهو قدامه ومعاه لانه كفايه انه موجود معاه بس لما بيسيبه بيرجع تانى للوجع للى جواه هى دى بقى السعاده اللى بيبقى شرط فيها وجود حد او حاجه عشان تترسم على وشنا يارب حد يكون فاهم حاجه من كل اللى انا كاتباه ده