الأربعاء، 30 يونيو 2010

يوميات فى المشروع (ميكروباص يعنى )


مش عارفه ليه كانت طالبه معايا رخامه النهارده وقلت بقى ارخم على مين ارخم على مين جت بقى فى سواق المشروع ركبت المشروع زى كل يوم فى طريقى للشغل اول ما ركبت قعدت جنب الباب مع ان جوه كان فاضى راح السواق قايلى ما تدخلى جوه يا ابله نرفزتنى اوى كلمه ابله دى فقررت اعمل عبده ومردش عليه خالص راح قايلى تانى ادخلى جوه يا ابله ---- قلت لا بقى ده قاصد ينرفزنى وبيقولها تانى قصد --- رحت غلست عليه وقلتله انا حقعد هنا ولما يبقى حد يركب حبقى اقعده جوا قالى وعلى ايه العطله دى يا ابله ما تدخلى جوا وخلاص --قلت لا بقى ده بيستعبط وياانا يا هو النهارده --- قلتله مش قاعده جوه الشمس بتدايقنى اصل انت متعرفش انا عندى مرض جلدى معدى بيتأثر بالشمس وخلى بالك على نفسك بقى سكت يا عينى وزمانه قعد يفكر ياترى عندها ايه وحتعيدنا فعلا ولا ايه وحسيت انه حيتشل يا عينى المهم انى كنت قررت خلاص افضل غلسه فمفيش مجال لانه يصعب عليا كمان بقى كل حد عاوز ينزل مش بفتحله الباب راح قايلى ما تفتحى الباب يا ابله واقفلى الباب يا ابله قلتله يا عم انا مش ابله مش ابله انت شايفنى ماشيه بسبوره قالى ما هو يا تقعدى جوه يا تقعدى ورا قلتله مش قاعده الا هنا قالى خلاص انزلى متخنقناش قلتله لا حخنقك ومش نازله ويلا بينا عالقسم قالى يلا بينا عالقسم والناس تقوله معلش وتقولى صلى عالنبى وانا راسى والف جزمه اروح القسم اصل انا مدخلتش اقسام قبل كده يا جماعه وحموت واشوف عمو الظابط والناس تهدى فينا واحنا نزعق ولا حياه لمن تنادى وفجأه الاصوات بقت عامله زى الشريط اللى بيسف وصحيت من النوم مصدعه بسبب السواق المزعج ده بس غالبا عقلى الباطن عاوز يبقى رخم اعمل ايه بقى المهم ان السواق ده لو جالى تانى فى الحلم مش حركب معاه المنبه ده مكنش يستنى شويه لما اروح القسم واشوف ايه اللى حيحصل بكره اكمل الحلم بقى

الثلاثاء، 29 يونيو 2010

القرار


ايه العنوان العجيب ده قرار وبتاع صباح جديد ويوم غريب وحر غير طبيعى وتلزيق كان يوم بدايته مشرقه قلبت بالروتين الطبيعى والملل ولكن كسرته وقضيت عليه وده مش كالعاده طبعا ولكن ده نتيجه ان جوايا طاقه ايجابيه مستمده طبعا من حاجه او حد (هى مستمده وخلاص وغالبا ليها اكسبير ديت زى النسكافيه اللى كان فى فيلم احمد حلمى هو ليه احمد حلمى فى كل النوتس بتاعتى كده الناس حيقولو انه بيدينى فلوس او حيطلعنى فى فيلمه الللى جاى المهم ان الطاقه الايجابيه دى خلتنى منتشيه كده يعنى مستقره نفسيا شويه الحمد لله ومحدش يحسد بقى ولايقر لان دى طفره اصلا والطفره هى تغير مفاجىء فى ال............................ر ايه ده؟؟ايه ده هى قلبت على سكشن فسيولوجى ليه كده المهم محدش يحسد عشان دى طفره والحسد مش حيحوق اصلا المهم ان الطفره دى خلتنى فكرت وقررت الاتى تؤمم الشركه المصريه ..........تؤتؤتؤتؤ ايه ده الجلاله خدتنى ولا ايه قررت بجد انى اكون غيرى انا (وش مندهش ده مش كلام عبيط بجد قررت انى اكون اكتر صبرا وتحملا وتفهما وتفكرا وعقلا (ايه كميه التنوين دى كلها ) طبعا ده قرار بس مين بقى ينفذه هو غالبا كان نفسى اطلع قرار اشمعنى يعنى كل الناس فى البلد بتطلع قرارات وقت ما هى عاوزه وكمان قرارات تودى فى داهيه ويقولك ايه اصل ده مكنش الوقت المناسب لاتخاذ القرار او ان القرار مكنش مدروس صح ده ايه النصيبه دى وحلها بقى من عندك يارب انا بقترح كده مش قرار ده اقتراح ان يعملو وزاره حلوه جديده كده اسمها وزاره القرارات ويقعدو فيها واحد ببدله كده زى الفل او انا ممكن امسكهالهم انا فاضيه بعد الظهر ياجدعان اصل كلمه قرار دى مش كلمه صغيره وخصوصا لو كانت تخص الناس كلها يعنى كلمه فيها حرف (ق) وحرف (ر ولو بالانجليش ديسيشن برضه جامده مش قليله يا جماعه يبقى لازم اى قرار يكون محسوب ومدروس وعشان كده ومن موقعى هذا انتخب الريس لمالانهايه انفينيتى يعنى وده قرار طبعا مدروس (وش بيغمز عامه انا بقول من هنا انى كتبت القرار ده وكان فيه اتنين مخبرين واقفين وقالولى يا اما اقول كده يا اما حيبلعونى القلم اللى بكتب بيه واموت انا باسفكسيا الاقلام وانتو تعملو وقفات واحتجاجات وتتعبو نفسكو طب ليه الجبن سيد الاخلاق سيد سيد سيد هو كان سيد ولا حسين ولا ايه بس سيد وحسين كانو معانا اكيد فى الوقفه اللى فاتت ومش جبنا ولا حاجه ياجدعان سيبونى متبلوعنيش القلم حكتب حكتب الحقوووونى ابقو اسئلو عليااااااااااااااااااااااااااااا

الثلاثاء، 22 يونيو 2010

حرامى النص جنيه


يوم عادى ظريف مفيهوش اى حاجه غريبه وماشى كويس شغل وحر وزحمه وناس ومصيفين وناس مش لاقيه هدومها تقريبا او اتسرقت منهم ناس رايقه اوى ودماغها فى الطراوه وناس شايله الهم ومن اول يومها شقيانه ولد بيجرى بين الشوارع من بدرى بيبيع مناديل اسمر مش لونه بس ده من شمس الصيف وولد صاحى متاخر رايح النادى ومعاه الموبايل وبيحط صن بلوك ومهيص عالاخر شويه ملل على شويه حرقه دم على ناس بجد محترمه على ناس معندهش دم ناس بتستسهل وناس بتستعبط وناس عاوزه الضرب خلص اليوم فى الشغل وبدا يومى مع المواصلات الكائن الى بيعيش وسطينا كانه واحد مننا وهو المشروع (الميكروباص ) زى ما ناس بتقول عليه ركبته وقعدت جنب الشاك وكان نفسى اقعد فوق على كرسى شبه احمد حلمى فى جعلتنى مجرما عشان فعلا الحر كان حيجعلنى مجرمه طبعا الزحمه والحر والسواق مش طايق نفسه اصلا وواحد قاعد جنب الباب ميعرفش تقريبا ان اللى بيقعد جنب الباب مسؤوليته انه يفتح ويقفل مش من اسكندريه شكله وطبعا على اخر الخط كان اتعلم خلاص واى حد ركب يدفع على مزاج السواق مش زى ما هو معروف الاجره كام لاااا السواق بيقول ايه بقى:: دى عربييتى وانا اخد اللى يعجبنى واللى مش عاجبه ينزل من عربيييتى وبيتك اوى على عربيييتى (السواق ده حيتشل على اخر الخط نزلو الناس وركبو ناس تانيين كتير والمفروض الاجره نص جنيه الناس لمت الفلوس طبعا وعطوها للسواق والسواق دماغه والف جزمه ان الفلوس ناقصه نص جنيه وكل واحد فى المشروع بيقول دفع طب يعنى شوف انت يا عم السواق يمكن انت اللى مدفعتش طب يهديكو يرضيكو السواق وقف وقفلت معاه انه يعرف مين اللى مدفعش (حاجه تيييت يعنى فى الموقف ده المفروض كنا نجيب كرومبو او سرحان ونفيسه او وزيرنا الغالى غالى اهو يحسب الحسبه ويمكن يطلع السواق مديون لمصر فى الاخر يا جماعه ما هو كده مينفعش الواحد حران وعلى اخره وعاوز يروح بيتهم بس بتكلم مين النص جنيه بقى حوار الساعه والسواق بقى صحابه السواقين يقفو وفى حاجه يا معلمى وكله عاوز يخدم قلت ربنا يستر والراجل ده مياخدناش رهاين لحد ما يظهر حرامى النص جنيه والناس تقوله يلا يا عم مستعجلين وهو يقولهم مانتو مش حاسين بحاجه طبعا السواق مشى على مضض وهو عمال يشتم ---شتايم محترمه طبعا وكان واحد قاعد ورايا معاه موبايل غالبا صينى من اللى اتوقفو دول وفتح التليفزيون عليه وصوته عاااااااالى يعنى حر وسواق حزب وطنى وحرامى النص جنيه وكمان انت تفتح التلفزيون كان نفسى الف واقوله شكلك انت اللى مدفعتش النص جنيه وبتغلوش على الموضوع ولما وصلت بجد اتشاهدت وقلت الحمد لله عالم الميكروباص ده عالم غريب كل يوم الواحد بيكتشف فيه حاجه جديده الواحد بيفكر يعمل كتاب ويسميه يوميات فى المشروع بس كان نفسى اعرف مين ابن اللذينه اللى مدفعش النص جنيه

الأحد، 13 يونيو 2010

حوار مع الأمل


رايح فين استنى شويه

مش انت قلتلى خليكى قويه

واوعى اليأس يقرب منك ثانيه ولو كان يوم بياثر فيا

كنت بقوه بتقضى عليه

وانت اللى قايلى حتتعدل

مش كده ولا انا بتخيل ؟؟

جاى دلوقتى بتهرب منى

ياخبر ابيض يادى الوكسه

حتى انت حصلتلك نكسه

لا استنى هنا وكلمنى

رد عليا وطمنى

قولى انك بتهزر حبه

وانك بس حاسس بغربه

فى وسط حاجات بقت متناقضه

جاوب طيب رد عليا

انت بقيت لليأس صديق ؟؟

ولا خلاص حسيت بالضيق؟؟

بينى وبينك هى تعل

وتجيب ضغط وسكر وتشل

بس ازاى ده يحصل معاك انت

ده انت معنى الحاجه الحلوه

معناك هو صبر وحكمه

برضه مش حترد عليا

طب والناس اللى انت مليتهم

وافتكرو انك راح تنجدهم

فجأه تسيبهم

اخر حاجه كانت فاضلالنا

حتاخدها وتمشى وتسيبنا



(((((مش قادر انطق ولا ارد

بقيت حاسس قدامى حيطه سد

لا عارف ادى امل لحد

ولا عارف حتى للياس اصد

تفتكرى بعد كل ده امشى ولا اقعد ))))))


عندك حق فى كل كلامك

احنا نحاول وانت تحاول

اصل احنا ملناش غير بعض

لا احنا لينا حاجه حلوه غيرك

ولا انت ليك حاجه تسكنها غيرنا

وربنا يعيننا ويعينك

السبت، 12 يونيو 2010

اخر مفتاح


لو معانا سلسله مفاتيح فيها كذا مفتاح شبه بعض فى الشكل العام ومش عارفين انهى واحد اللى بيفتح الباب حنجربهم كلهم بس غالبا بيطلع اخر مفتاح هو اللى بيفتح كتير مننا حصل معاهم الموقف ده دايما بيطلع اخر مفتاح هو الصح نفضل نجرب ونجرب واخر واحد هو اللى بيفتح معانا المفاتيح دى عامله زى اى حاجه فى حياتنا بنحاول ننجح وبناخد بالاسباب ونفشل ونقوم ونجرب تانى دايما لو فكرنا حنلاقى ان لسه فى مفتاح معانا هو اللى حنفتح بيه باب حلمنا مش عيب ولا غلط اننا نحاول ونفشل وممكن المفتاح يضيع مننا ونلاقيه وممكن كمان نخلى حد يطلع عليه ونديله خبرتنا وتجربتنا عشان يتعلم منها بس اهم حاجه اننا منيأسش لان يأسنا مش حيخلينا نشوف المفتاح الصح اللى فى ايدنا اللى حيوصلنا للى بنحلم بيه

الجمعة، 11 يونيو 2010

لماذا؟؟؟


لماذا وصلنا لهذه الحاله من اللا مبالاه والاستسلام بالذى نراه لماذا غابت عنا كثير من القيم والمبادىء التى هى اساس الحياه لماذا اصبحنا هكذا ومتى وكيف كانت نقطه التحول لقد اصبحت كلماتنا المعتاده مفيش فايده حنعمل ايه هو احنا اللى حنغير الكون هى بقت كده وربنا ينتقم منهم واصبحنا لا نفعل اى شىء مع اننا نستطيع فعل الكثير من بضعه ايام انتحر شاب من فوق كوبرى قصر النيل فقد قام بعمل مشنقه على سور الكوبرى وربطها جيدا ثق وضعها حول رقبته وقفز من فوق الكوبرى الوقت الذى اخده فى عمل هذه المشنقه كان يكفى ان الناس تمنعه بدلا من ان يشاهدوه ويراقبوه حتى اخر لحظه ولكنهم تركوه حتى انتهى ومات واخذو يضربون كفا بكف ومن يومين تعرض شاب فى الاسكندريه للضرب المبرح حتى الموت من قبل ظابط شرطه ومخبرين لمجرد انه قال( بتفتشونى ليه ) وضربوه ضربا مبرحا واهانوه فى شارعه وسط اهله وجيرانه واخذوه على قسم الشرطه التابع له وقتلوه ثم عادو فالقوه فى شارعه وسط ذهول الجميع كيف سكت الناس فى الحالتين وماذا حدث للشعب المصرى الذى كان يقف بجوار اخيه قبل ان تخرج منه كلمه اه الشعب المصرى الذى كان يقف يد واحده امام اى شىء بدات بالسكوت امام القضايا الكبيره وكان المبرر انه لا علاقه لنا بها -ومنهم لله الكبار واكلين البلد ثم اصبحت هذه هى العاده حتى امام اصغر الاشياء الشىء الذى كان يميزنا حقا اختفى الشخصيه المصريه الطيبه المضحيه الامان بين اهلك وفى شارعك ماذا تبقى للسكوت اكثر من ذلك

الأربعاء، 9 يونيو 2010

وصفه اليوم


اهلا بيكو معانا يا جماعه فى حلقه جديده من برنامج طبق اليوم والنهارده حنعرف مع بعض طبخه جديده يارب تعجبكو او بمعنى اصح هى حتعجبكو غصب عنكو اصلا لانكو ياما اكتو منها وياما حتاكلو منها طريقه تحضير الاكله --------------------- حنجيب 80 مليون بنى ادم (ياريت يكونو مصريين عشان بيسكتو ) وش بيغمز ونبدا بتسويتهم على نار هاديه بعد كده نحط شويه زيت ولو مفيش مش مهم خليهم يتحرقو حتاخد بعد كده اللى متحرقش ونحطهم فى حاجه تانيه ونحط عليهم شويه مشاكل على شويه تلوث وزحمه وخنقه وشويه حاجات من اللى تجيب المرض دى ونقلب كويس اوى واللى يموت يموت وناخد اللى حيعيش ونحطه فى حاجه تانيه ونحط عليه شويه فقر على بطاله ونقلب تانى لحد ما نقطع نفسهم وناخد اللى يعيش منهم فى حاجه تانيه بس تكون ضيقه عليهم عشان نخنقهم شويه عشان الخطوات اللى فاتت كانت دلع اوى ونحطلهم شويه بهدله على مرمطه عشان مع الخنقه يعملو شغل جامد ومفعول صح وحنسوى بقى على نار عاليه لحد ما كله يتحرق ومش بالهنا والشفا ملحوظتين ممهمين جدا طبعا الوصفه دى مش كل الناس تعملها دى ناس معينه كلنا عارفينهم ممنوع منعا باتا اضافه اى شىء من الاصناف التاليه لانها حتبوظ الطبخه خالص وهى (الامل والحب والخير والتفاؤل والراحه والاطمئنان والاستقرار ) عشان دى حاجات غلط واخيه :)

الثلاثاء، 8 يونيو 2010

الحنين للماضى

طالعه سلم عمارتنا وانا راجعه من الشغل اصل احنا معندناش اسانسير المهم ان فى دور مبيبقاش فيه حد دايما الا فى الصيف وانا معديه فى الدور ده لقيت واحده ست كبيره قاعده وفاتحه الباب وبتتفرج عالتليفزيون وبتشتغل تريكو لما لمحتها كده جه فى بالى حاجات كتييير اوى من اول ما شفتها ولحد ما وصلت لشقتنا وحسيت ان الوقت كبير الللى طلعت فيه مع ان الفرق دورين بس بس حسيت كانهم عشرين دور مش عشان تعبانه ومش قادره اطلع السلم بس عشان اللى جه فى بالى اكتر من انى افتكره فى دورين افتكرت لما كنا صغيرين والوقت ده اللى هو قبل المغرب بساعه كده كنا بنبقى اتغدينا بقالنا كتير ونمنا شويه بعد الغدا وقاعدين بنتفرج عالتليفزيون وبناكل بطيخ ونسمه الهوا الحلوه اللى قبل المغرب دى كانت داخله من البلكونه ومن الشباك(وش بيضحك)و وكان مفيش غيرالقناه الاولى والتانيه والخامسه وكان بيبقى وقت جميل اوى اوى واحنا قاعدين فى البيت مع بابا وماما بجد كان احساس ميتوصفش وراحه بال وهدوء واستقرار والدنيا حلوه كده دلوقتى بقى (وش مكشر ) مفيش بيت فى مصر بابا وماما فيه بيرجعو قبل بالليل ده عشان يقدرو يخلو ولادهم يعيشو مرتاحين وكمان بيرجعو مهدودين ومرتبهم مش بيكفى لاخر الشهر وكمان بقى مبقاش فيه بطيخ كويس مش بيجيب تسمم ده البطيخ ده زمان كان احلى حاجه تاكلها فى الصيف اهو اتضرب هو كمان والقنوات فى التليفزرون بقت على قفا من يشيل ومن كترها بقت تموع النفس وتقرف واهم حاجه بقى مبقاش فيه نسمه الهوا اللى قبل المغرب دى اللى تحسسك بانتعاش فى عز الصيف حتى الهوا سحبوه ...الاكسجين بتاع ربنا خلصو عليه وراحه البال والهدوء والاستقرار بقى حاجه صعب الوصول ليها الا كل فين وفين وساعتها بتبقى صدفه ومفاجاه غيرمتوقعه الحدوث بجد ربنا يستر على اللى جاى بعد كده وعلى الاجيال اللى جايين بعد كده احسن لو باظت اكتر من كده يبقى كتير كده

الأربعاء، 2 يونيو 2010

معنى الوجود


يعنى ايه وجودك فى الحياه اكيد الوجود هو الحياه بس انهى حياه انك تعيش واهى زى ما تيجى تيجى وبكره زى النهارده والنهارده زى امبارح وكل حياتك تبقى لا مبالاه ومش حاسس بقيمه حاجه فيها واللى جاى جاى واللى رايح رايح وحاجات حلوه تضيع مننا ونندم عليها بعد ما تروح ومناخدش بالنا من حاجات كتير اوى قدامنا مع ان بنبقى فى ايدنا نعمل كتير ولا انك تعيش ندمان على اللى فات منك وتضيع النهارده وبكره وايامك اللى جايه فى حاجات وجعاك حاجات لو قعدت تفكر فيها يبقى عمرك اللى باقى حيضيع منك يبقى اللى فات واللى جاى ضاع منك ولا نعيش نفكر فى بكره ونفتكر اللى فات بس عشان نتعلم منه لو كان يوجع ونفرح بيه لو كان حلو نفكر فى بكره بثقه فى ربنا انه حيبقى احلى نفكر بحب وامل فى اللى جاى نفكر ازاى نسعد حد فى الدنيا ازاى نعمل خير ونريح ناس نعمل حاجه نسيبها بعد ما نموت ساعتها بس حيبقى وجودنا ليه معنى