الأربعاء، 22 ديسمبر، 2010

انت مين وعاوز ايه ؟؟



هو احنا مين
انت مين
وانتى مين
وانا مين
كلنا انسان
كلنا بنى ادمين
اه
عايشين عاديين
بس هو يعنى ايه عاديين
يعنى عايشين
عاوزين ايه؟؟
ناكل
 نشرب
 نلبس
 ننام
نتفسح – اكتر حاجه الناس بتعملها حتى لو معهومش فلوس
نتجوز --  وده مبقاش متوفر لناس كتير
 نشتغل – مع ان ده مش كله بيعمله بمفهومه الصح
وهو ده اللى بيتكرر كل يوم
كأنه شريط واتسجل وكل يوم بيتعاد
الا من رحم ربى  طبعا
ما هو كمان ده طبيعى
انتى من كوكب تانى يعنى ولا ايه
مش عاوزانا ناكل ونلبس وننام ونشتغل
ما هى دى حاجات لازم نعملها
لا انا مبقولش كده
احنا هناكل ونلبس ونشتغل ونعمل كل حاجه
بس احنا ممكن نغير كتيييييير اوى
ركزو فى الجمله اللى جايه دى
احنا ممكن نغير حاجه للخير بعاده وحشه عندنا
اسمعونى بس
انا مش بهيس عليكو والله
بس مثلا انا عندى حاجه فى شخصيتى وحشه
انى مثلا مثلا عنيده
اوجه الطاقه اللى بستغلها فى العند جوايا
للعند فى الخير
يعنى اعند فى حاجه صح
اعند فى موقف يجيب حق حد
اعند فى انى هحقق احلامى
انا كده هبقى فيا الطبع الوحش  
بس بستغله صح وفى حاجه مفيده
لحد ما اتعود على انى استغله فى الخير
بعد كده الطبع الوحش هيروح لوحده
بالتعود على الصح والخير
بس ايه بقى ميجيش واحد ابن حلال دماغه خربانه
ويعند فى اى حاجه وكل حاجه
ويستغل كل طباعه السيئه فى انه يغلس على البشريه وخلاص
حد تانى مسرف
 يستغل اسرافه فى وجه خير
اهو لبى رغبه جواه بتقوله اصرف اصرف
 وفى نفس الوقت فى حاجه خير
حد تالت عيبه الرغى
بيتكلم كتير
ودى حاجه تيييييت طبعا
مؤذيه لصاحبها اكتر من اى حد تانى
طيب الحد ده اللى بيتكلم كتير
يفضل يتكلم كتير
بس يتكلم  فى حاجه مفيده
حاجه لما يتكلم فيها مع الناس تفيدهم وتفيده
خلاصه الموضوع ده
عشان متزهقوش منى
احنا مش كاملين وفينا عيوب كتير
يبقى نحاول نوجه الطاقه اللى بتطلع بيها عيوبنا فى الصح والخير
بجد حنتغير جدا
وقبل ده كله ياريت نبقى محددين ايه عيوبنا بالظبط
عشان نشتغل عليها صح
ودايما خلينا واثقين اننا نقدر نغير اى حاجه
 بس نبدا بنفسنا
:)
23 / 12 / 2010

الأحد، 19 ديسمبر، 2010

رباعيات ثلاثيه


بدأت بتهريج
وقلبت بجد
رباعيات
مشتركين فيها تلاته

كل واحده فيهم فيها طعم 3 افكار
فينا اللى بدأ واللى نها
وفى اللى قالها من نصها
-------------------------------- 

الطريق مضلم مفيهوش اِشاره
والشوارع وخدانى من حاره لحاره
لا فى نور عمود ولا حتى نور عماره
مبقتش فارقه مفتح ولا اعمى ولا لابس نضاره


--------------------- 
من حبك بقيت ملووح ومحتاس
والكون مبقاش ينداس
وصعبت على كل الناس
واحزانى بقت ملهاش مقاس
--------------------
ناس فى الشوارع فى عز الشتا
احاسيس فى البرد متثبته
حكاوى حب عالرصيف مش ملفته
وانا وانتى لسه عايشين حكايتنا المحبِطه
-------------------
خبلتنى الدنيا بألوانها
وانا لسه صغير على جنانها
اعرف منين عنوانها
وانا معرفش غير مقاش فستانها
---------------------- 
كترت حروفى واتملت كراكيب
واللغز طول واصبح عجيب
انا اللى كنت دايب فيكى امبارح
احساسى بيكى النهارده بقى مريب
-----------------------
 رباعيات ثلاثيه من تأليف
---------------------------
محمد عبد الغنى
محمد سلطان
ساره جمعه

الخميس، 16 ديسمبر، 2010

عدت سنه

عدت سنه


والليه هطفى شمعه الجرح ال..
تؤتؤتؤتؤ
هى ليه قلبت على هانى شاكر كده
وبعدين جرح ايه يا عم انت
لالالالالالالا
بجد عدت سنه
احلى سنه
اجمل سنه
اغرب سنه
سنه مختلفه بكل المقاييس
يمكن هى اهم سنه
من سنه اشتغلت فى شغلى اللى انا فيه
بعيد عن مجال دراستى بس بحبه جدا
واول مره اقعد سنه فى اى شغل اصلا
وده انجاز حسسنى انى اقدر ابقى قد المسؤوليه
ومن سنه اشتركت فى حاجه
وقتها دخلتها عشان اضيع وقت ومبيقاش عندى فراغ
بس اكتشفت انها غيرت فيا كتير اوى
بجد الحاجه دى دلوقتى مهمه عندى بشكل كبييير اوى
رابطه خريجى زراعه الاسكندريه (عشان الناس اللى مش من اسكندريه
والنهارده الرابطه كملت سنه
عرفت ناس كانو دفعتى ومكنتش اعرفهم
وبنات بقو اصحابى جدا وبقينا نخرج ونتكلم كتير
مع اننا مكناش نعرف بعض كويس قبل كده
وناس تانيه كتييير
بقو بجد اقرب ناس ليا
ناس مهمه اوى فى حياتى
وجودهم غير كتيييير اوى فيا
اكتر سنه مليانه ناس فى حياتى
بس بجد ناس بحبهم اوى
ومن سنه بدا تفكيرى يتغير
بدات افكر بطريقه مختلفه
ابص للحاجات من حته تانيه
غير اللى الناس شايفينها منها
وكنت مبسوطه اوى بكده
من سنه بس بدات اكتب
اه من سنه بس
كتبت كتير
وقريت كمان
ووصلت ان كتاباتى بقت بتعجب اللى حواليا اوى
وكأنى بكتب من سنين
بدون مبالغه دى احلى سنه عدت عليا فى حياتى
سنه مختلفه
غيرتنى وغيرت فيها
اه احنا نقدر نغير
منبقاش عاديين
وانا من سنه قررت مبقاش عاديه
اه انا قربت اكمل 25 سنه
يعنى بقالى ربع قرن عايشه فى الدنيا العجيبه دى
بس انا فعليا عندى سنه واحده
هى دى بجد السنه اللى تتحسب من عمرى
ياترى هتفضل احلى سنه فى عمرى
ولا هيبقى فيه احلى منها
بحبكو اوى اوى اوى – هما عارفين هما مين
------------------------------------------------------------


كلام اتقال عليا فى السنه دى
بتكتبى حلو
تفكيرك اتغير خالص
انتى مش زى ما كنتى ايام الكليه خااااااااااااااالص
انتى انسانه معقده وتخنقى


فتاة ذات طبيعة نصف ملائكية تتخير رقم شيطانى بحت .. مثير للفضول جدا ..بحب حبك وأخلاصك لأصحابك وألتزامك الحق وحبك للحياة أوى وفرحتك الهادية البريئة..الحزن والكأبة مش بيليقوا عليكى خالص وبتمرى عليهم مرور سريع خفيف وده بيطمنى عشان بخاف على ضحكتك الصافية اوى لتتجرح
على فكرة ف لسه عندى كلام كتير اوى عليكى بس الفيس الشرير مش راضى ينشره.. بس ممكن ألخصه فى نص سطر
أنتى حد نادر جدا و بحبه لله ف لله جداااااااااا
--------------------------------------
الأوركسترا في بداية العزف كان ادائه ضعيف والجمهور ماكانش عارف يركز . . بس الأداء دلوقتي بقى أحسن كتير . الاوركسترا خد باله ان الجمهور مش مركز وجايز ده زعله
بس الجهور دلوقتي مبسوط بالأداء ومش عايز الاوركسترا يزعل منه ويركز بس فى العزف
---------------------------------
حد جميييييييييييل اوى
اجمل صاحبه ف الدنيا كلهاااااااااااااا
بحبها اووووووووى ويمكن هى متعرفش انا بحبها اد ايه
بتوحشنى كتير
مينفعش اقابلها مرة من غير ما نضحك كتير اوى ... وبعدها نتعارك
وهذا هو الراعى الرسمى للمقابله بتاعتنا
ههههههههههههههههههههه
بحبها وبحب ضحكتها
بحببببببببببببببببببببببك اوووووى
اينعم فى حاجات كتير حاولت اغيرها فيها
فى منها الى اتغير ومنها الى لسه
بس هى دلوقتى مفيش شك احسن من الاول بكتير
ليها معايا ذكريات كتير اوى هى عارفها
ومش ممكن لا انا ولا هى ننساها
مهما مرت الايام و السنيين
من الاخر
عشششششششرة عمرى


تشوف صورتها تحس انك شايف كوكتيل من البراءة والشقاوة فى نفس ذات الوقت
انتى اجمل ما انتى متخيله بكتير
انتى جدعه جدا ويعتمد عليكى
انتى بنت بميه راجل
بثق فيكى جدا
انتى خنيقه
انتى طيبه اوى على فكره
انتى غلسه جدا
انتى ذكيه ولماحه

الثلاثاء، 14 ديسمبر، 2010

آن وقت الرحيل







 
اًن وقت الرحيل

ولم يتبق سوى القليل

وقت يكفى بالكاد لجمع اغراضى

ابحث عن وعاء يكفيها

واتخير منها ما سأَخده معى

فمنها الجديد ومنها القديم

جمعتها كلها وحزمتها جيدا

فانا لا اعلم ماذا ينتظرنى

امشى بخطوات ثقيله

اجر اقدامى

لا اعلم من ثقل ما احمل

ام من رعب المجهول

ابحث عن مكان لى

ارض تحتوينى

اتنقل بحقيبتى من مكان لاخر

لعلى اجد ملاذى الاخير

الذى تستقر فيه نفسى

ويبعث فى قلبى الامان

كلما اعتقدت انى وصلت اليه

اجد نفسى ما زلت فى الطريق

الى ان وصلت لمكان

به كل انواع الراحه

والسكون

والهدوء

والحب

ابتسمت من قلبى

وكدت اضع اغراضى لاستريح

ولكنى تنهدت فقد كان

مجرد سراب

لولا بقايا الامل بداخلى

لكنت استسلمت للموت فى الحال

اخذت نفسا عميقا

وبدأت رحلتى من جديد

لعلى اجد سعادتى

حقيقه وليست سراب

الثلاثاء، 7 ديسمبر، 2010

كبسولاتى

اخرجت مفكرتى



اكتب اليك اخر كلماتى


فلقد تعودت ان اتكلم اليك


بينى وبين نفسى


مسكت القلم وابتسمت


...كتبت


وكتبت


انتهيت


ثم بكيت


وكدت ان اضع الورقه جانبا


لفت نظرى لأول وهله


العدد المهول لاوراقى المكتوبه اليك


ابتسمت ثانيه


لشعورى بانك ستقرأها


فى يوم من الايام


كبسولاتى

واحد كافيه لاتيه مع اغانى فرانك سيناترا والتكييف والهدوووء



واااااااااااااااااااااااو بجد


كان نفسى فى الجو ده

كبسولاتى

فى كل مره يتحدثان



تقطع نظراتهم حديثهم


ويلتفت اليهم من حولهم


فى شك يتسائلون ما بينهم ؟؟؟


يقولون تفضحهم نظراتهم


...اعينهم تقول ما فى قلوبهم


لكن الحقيقه لا شىء بينهم


او هكذا يوهمون نفسهم ومن حولهم


فأعينهم تقول ما لا تقوله ألسنتهم

كبسولاتى

رائحه احتراق البراءه والامانه



تخرج من جميع مدارس جمهوريه مصر العربيه


-------------------------


الا صحيح


هما ليه بيعملو الانتخابات فى المدارس


...بيقذزروها ليه بس بقرفهم وتزويرهم


ما يسيبوها نضيفه يمكن العيال تنفع

كبسولاتى

عندما تقع فى فخ ان المستحيل اصبح جزء من احلامك



حينها فقط تتمنى لو لم تعرف الاحلام طريقك


كبسولاتى

خدعنى قناعك الذى ترتديه



كنت احسبك غير بقيه البشر


:(:(


كبسولاتى

الشطاره انك تسرق من السنين احلامك







ومتخليش السنين تسرقها منك وانت مش حاسس


الأربعاء، 24 نوفمبر، 2010

ربينا ياحكومه


ندااااء الى كل الاهالى
لا تقلقو
الحكومه بتربيلكو عيالكو
يعنى انتو مش حتتعبو اوى فى تربييتهم
-----------------------------------------
الظابط : رخصك
السائق : كل سنه وانت طيب يا باشا
الظابط : رخصك واركنلى على جنب وتعالالى
السائق فى سره: حسبى الله ونعم الوكيل اهو اللى عملناه طول النهار حييجى ياخده هو
الظابط : مش ماشى فى خط سيرك ليه ياض
السائق : السكه زحمه والناس مستعجله
الظابط ممسكا بأذن السائق : هو انتو لازم تتشد ودنكو عشان تتلمو ولا نديلكو بالجزمه يعنى
طيب مانتاش واخد الرخص ولا هتاخد وصل كمان
وابقى قابلنى لو عرفت تجيبهم
السائق : والله ياباشا ما حتتكرر تانى اخر مره
الظابط صافعا السائق بالقلم على وجهه : لا هتكررها ما انت تيييييييييييييت ( طبعا مقدرش اقول قاله ايه
-------------------------------------------------------
كفايه اوى الحته ده بلاش اكمل
بس ده اكبر دليل ان الحكومه بتربى ولادها
اقلام وشد ودان وشتيمه
شوفو واحنا اللى كنا فاهمينها غلط انها مش بتحبنا
ربينا يا حكومه ما احنا اللى نستاهل

السبت، 20 نوفمبر، 2010

لحظاتى

لا يوجد تشابه بين كلماتى وبين الواقع
-----------------------------------------

توقف الزمن للحظه
لحظه بحسابات الزمن
ولكنها ساعات بحساباتى
توقف الزمن
توقف كل شىء من حولى
عندما رايته
تنهد قلبى
وكتمت ابتسامه عن شفتى
لكن عينىّ خانتانى و ابتسمتا
دق قلبى سريعا
تاه الكلام منى
كدت اغرق
فى بحر عينيه
عندما نظر الىّ
كانت نظره خاصه
مميزه لى وحدى
اوغالبا تمنيتها كذلك
شعرت بعينيه تحدثنى
تاخذنى من مكانى
من وسط الحضور
لمكان بعيد
سويا فيه وحدنا
وظل يحدثنى
ويحدثنى
ولم املّ من الحديث معه
كنت انظر اليه وهو يتحدث
كانى اراه لاول مره
يجذبنى بكل ما فيه
كلامه
صوته
اسلوبه
ارائه
حتى سكوته
تكفينى اللحظات البسيطه
التى اقضيها معه
وان كنت اعتقد فى النهايه
انه مجرد حلم جميل
فالحلم لحظات قليله
ولكنك عندما تستيقظ
تشعر انه طوييل
هى كذلك لحظاتى معه
تشبه الحلم الجميل

الاثنين، 8 نوفمبر، 2010

حبطل السجاير



حبطل السجاير
واكون انسان جديد
ومن اول يناير
خلاص حشيل حديد
--------------------------
دى مش بس اللى بيدخنو يغنوها
الى مش بيدخنو كمان يقدرو يغنوها
لان احنا بنشرب سجاير غصب عننا اصلا
مين مش بيركب مواصلات ويقول جمله
السجاير لو سمحت
مين مش بيعدى واحد جنبه فى الشارع وينفخ السجاير فى وشه
مين فى مكان شغله مش بيدخله ناس بيدخنو
مين مفيش حد فى قرايبه بيدخنو


بس بجد كده كتيير
من فتره تعبت وبدأت اكح
واخدت دوا وبرضه مش بتحسن
اكتشفت انى بكح جامد اوى لما بشم ريحه السجاير
هى كانت السبب فى اللى انا فيه
يعنى الناس تشرب سجاير وانا اتعب واعيا
فقررت انى ابطل السجاير
مش حخلى حد يدخن جنبى
واللى حيدخن جنبى حقوله عاوزه فلوس اجيب دوا
اشمعنى بتشربنى سجاير غصب عنى
بجد الموضوع بقى زياده اوى عن الطبيعى
وقال بيقولو اسكندريه بلا تدخين
طيب يا عم
والناس اللى قارفانا دى بالسجاير ايه مثلا
يبقى السواق معلق فى العربيه ممنوع التدخين
وهو بيشرب سجاير ودخانها مالى العربيه كلها
وطبعا انت لو قلت للسواق السجاير لو سمحت
يااما حيقولك تعفر يا بيه ( وده لو غبى طبعا
يا اما حيقولك دى عربيييييتى واللى مش عاجبه ينزل منها
شوارع زحمه ودخان عربيات
ودخان سجاير
وحر معظم ايام السنه
وحاجه بجد بقت تتيييييييييت يعنى
------------------------------------------------
مش مع الاعتذار للمدخنين
ارجوكم بقى ارحمونا وبطلو تدخين
وش قرفان وزهقان وبيكح

الثلاثاء، 2 نوفمبر، 2010

دموع السماء




صوت المطر
منظره من النافذه
رائحته
.لسعه البرد التى تصاحبه
خفقان قلبى لمنظره
صوت اختى تقول لى
بصى بسرعه الدنيا بتشتى ازاى
ينهمر المطر
يمنعك من رؤيه الاشياء
ولكنك مستمتع بمشاهدته
تظل تنظر وتنظر
تسرح فى عمرك
فى ما مضى منك
فى الشتاء الماضى
ومن عده سنوات
عندما كنت صغيرا
تهاجمك الذكريات
تدمع عيناك
فلا تفرق بين دموعك ودموع السماء






الاثنين، 1 نوفمبر، 2010

لحد امتى ؟؟؟؟



بنركب تاكسى ومشاريع ومش بنعبر الاتوبيسات ونقول متبهدلين
بنقعد فى كافيهات ومطاعم وناكل ونشرب ونهيص ونقول جعانين
بنشترى هدوم صيفى وشتوى وخريفى وربيعى ومدراس وعيد ونقول مش لاقيين
بنشترى كماليات مالهاش اى تلاتين لازمه كل يوم واحنا مش حاسين
اه صحيح قبل اخر الشهر بتلاتين يوم بنبقى مفلسين
بس لما بنزهق بنقول زهقانين
ولما متعجبناش حاجه نقوم متظاهرين
كل ده وبرضه مش ساكتين
طماطم غليت
بطاله زادت
عيال اتشردت
مش لاقيين ياكلو
وغاز بيروح لاسرائيل
انتو مالكو يا مخفيين
ما تتلمو واسكتو خليكو ملهيين
فى اللى بتاكلوه وتشربوه وتشتروه
بس لحد النظام وتقولو امييين
عاوزين تتكلمو
يبقى فى اللى احنا نقول اتكلمو فيه
اكتر من كده وزودتو حتبقى اخرتكو طين
هى دى الحقيقه للاسف واحنا متغميين
بيترمالنا شويه حاجات تلهينا واحنا مش دريانين
بنضرب على قفانا وراضيين
لازم نتغير
من جوانا
نفسنا
حوالينا
لحد امتى حنتفرج واحنا متكتفين

الاثنين، 25 أكتوبر، 2010

حاجه توجع



بلد تخلى العاقل يلسع
وتقول عالمجنون مبدع
ولو جيت واعترضت
هأأأأأأو
يبقى انت جاحد وتتشيع
بلد تخلى النفس تموع
ولو جتلك نفس تبقى بتتدلع
اخس عليك
احنا حنجيبلك منين
اياك تطمع
مش حاسس بينا
عاوز عيش
عاوز ميه
عاوز نور
دى كماليات سعرها مولع
ولو انت قدها وقادر ما تدفع
عاملين فيها فقرا !!!
والمرض ماليكو !!!
وانتو زى القرود اللى بتبرطع
مين دول !!!!!!!
بيقولو ايه
ييجو يشوفو
الشباب اللى بيخلع
يسيب بلده وارضه
يسيب اهله وعرضه
ويهج
ومن هدومه يطلع
يقولك ده اللى اخده من بلده
يخليه يتهنى و يشبع
ويعيش مبسوط ومتمتع
الناس بتاعه القرارات
والحوارات
والكلمات
والحكومات
والافشات والافيهات دى
عايشين فى حته تانيه
بلد تانيه
تلاقى الواحد منهم
ييجى يمضى ورقه ويرجع
ويوم ما تحصل حاجه يقولك
البلد زى الفل
انت ايه يا اخى
مشربتش من نيلها
طب جربت تغنيلها
بجد بقت حاجه توجع

الجمعة، 22 أكتوبر، 2010

خريف الاحلام




تتسابق الكلمات على شفتى



تتصارع لتخرج وتعبر عن ما بداخلى


ولكنها تُقتل قبل ان تخرج


كالطفل الذى يولد ميتا


لانه مكث اكثر من اللازم فى رحم امه


وقفت مندهشه


ليس لحال كلماتى التى فُقدت


ولكن لحال كلماتى التى سوف تولد


شعرت فجأه انى عاجزه عن التعبير


هربت افكارى


توقف الزمن


ماتت الاحاسيس


يأست الاحلام


ضاع تخطيط المستقبل


كاوراق الشجر فى الخريف


التى تضيع تحت أقدامنا


استسلمت للعادى


الذى طالما تحدثت عنه بسخريه


دائما ما كنت ابحث عن المختلف


عن الجديد والغير تقليدى


ولكن شيئ ما اوقعنى فى براثن الواقع


الواقع الذى اكرهه وانكره


الواقع الذى دائما اغيره بكلماتى وخيالى


الى عالم خاص بى وحدى


مشاعر متضاربه


احاسيس مختلفه


صراع داخلى رهيب


كطفل صغير يمسك بيد امه


وفجاه جاء احد اخر ليأخذه


من عالمه


من برائته


من احلامه


من انطلاقه


اخذه هذا الشخص ومشى


وهو ينظر خلفه لأمه


ينظر لها بعينين تملأهما الدموع


ويتحدث بلغه الصمت


اتتركينى هكذا


اتتخلين عنى بكل سهوله


لا يصرخ


لانه يعلم انه لا فائده


الى ان تختفى عن بصره


فينظر امامه


ليجد عالم اخر


عالم غير الذى عاش فيه


عالم لم يحلم به ولكنه وجد نفسه به


وكعاده الاطفال


اندمج وهو غير راض


ضحك وهو حزين بداخله

لكنه لا يعلم انه فرح مؤقت
اكمل طريقه فى عالمه الجديد وهو غير مقتنع به


لم يشعر بكيانه ووجوده


استسلم بضعف لحاله


وماتت بداخله روحه وهو مازال على قيد الحياه

الخميس، 7 أكتوبر، 2010

شعب اللبس والفيس والبيبس والتيبس




صباح التلزيق والجو الخنيق


هو فين الشتا السنه كلها بقت صيف ولا ايه


ما علينا


انا اكتشفت حاجه وعندى احساس انها صح


فكر تنزل الشارع


قرر يوم تخرج تتفسح مع صحابك


تنزل مكان شيك او مول او حتى حته بيئه او تركب بس مواصلات حتى


حتلاقى الناس فى الشارع كتيييييييييييير


واغلبهم فى محلات الهدوم


او شاريين هدوم


او بيتكلمو على انهم رايحين يشترو هدوم


اللبس لحس دماغ الناس


سمعت بنتين راكبين الترام


واحده بتقول لصاحبتها انا رايحه اشترى هدوم صاحبتها بتقولها ليه يا بنتى


ما انتى لسه جايبه


قالتلها لا كل الهدوم اللى عندى متصوره بيهم عالفيس بوك


عاوزه حاجه جديده


انا تنحت اصلا وفضلت فى حاله غريبه من السرحان شويه


فيس ايه يا جدعان اللى تجيبله هدوم جديده


يعنى دلوقتى الناس تشترى لبس عالعيد الصغير والكبير والكليات والفيس


يانهار الوان


الفيس بوك لحس دماغ الشباب والله وكله بقى مدمن خلاص فيس بوك


ده حتى عالفيس بقى فيه انك تشترى اى حاجه من اى حته فى العالم


ومطاعم وتطلب وعييييش


واللى يلفت النظر بقى اوى


ان كل المطاعم بتعمل بيبسى كبيييييييييير ييجى 800 ميللى على الاكل


كل المطاعم لازم تلاقى عندها وجبه عليها اوفر ايوه اوفر يعنى عرض


انها عليها بيبسى هديه


البيبسى بقى لازم مع الاكل مع انه خطر جدا


بس بقى ادمان لكل الناس


روح اى مكان بقى واطلب اكل او اطلب اى حاجه تتشرب حتى


ويجيلك الفاتوره -- الحساب يعنى


حتلاقى طبعا متضاف ليها 300 % خدمه


وادفع يا معلم وياويلك لو مدفعتش تيبس – بقشيش يعنى


الويتر – الجرسون يعنى هيبصلك حته بصه


اى حد بيعمل اى حاجه من صميم شغله بينتظر عليها تيبس واحنا كلنا بندفع


مش بعيد اللى بياخد تيبس نفسه يكون بيدفع لحد تانى


عايشين احنا فى دايره غريبه


بناخد على قفانا ومبسوطين وبنبوس ايد اللى بيضربنا على قفانا كمان


حاجه بجد


تييييييييييييييييييييييييييييييييييييييييييييييييييييييييييييت

الاثنين، 4 أكتوبر، 2010

عيب بقى


اسمك ايه



عندك كام سنه


سامعنى


غيرك نفسه بجد يسمع حتى لو بسماعه


بتعرف تقرا


وفاهم انا بقول ايه


وتقدر تجاوبنى


احمد ربنا


غيرك بيدعى على اهله انهم معلمهوش


ويبقى الشارع اللى عاوزه قدامه


ويمشى كتييييييير عشان مش عارف يقرا


تعرف ربنا


يعنى فيك عقل ومش مجنون


احمد ربنا


انك عارف ربنا وقادر تلجأله وتشكيله


فطرت النهارده


طيب اتغديت


طيب شربت شاى او نسكافيه


وطبعا حاجات حلوه


احمد ربنا


غيرك مش لاقى ياكل عيش حاف


وفى ناس بتقعد باليومين والتلاته متاكولش


ايه ده رايح تنام


يعنى عندك بيت


وكمان سرير وغطا


احمد ربنا


والله فى ناس بتنام فى خرابات


وتحت عربيات


وتحت الكبارى


وعالارصفه


فى عز السقعه


وعارف تنام


معندكش مرض مصحيك


احمد ربنا بجد


فى ناس لازم تاخد ادويه عشان تنام


بتشتغل


وتاخد مرتب


احمد ربنا


ولو قاعد فى البيت


برضه احمد ربنا


عندك ايدين ورجلين وعنين


مفيش حاجه فيهم مش موجوده


احمد ربنا غيرك بيتمناهم


عندك اهل وقرايب وصحاب


يااااه احمد ربنا


فى ناس ملهاش اى حد فى الدنيا


عندك مشكله


مشكلتين


تلاااااااته


مش هتكون زى اللى مش لاقى فلوس يعالج ابنه


ولا لاقى ياكل عياله


ولا اللى حيتطرد من بيته عشان الايجار


ولا اللى مسجون ظلم بدل حد من الكبار


ولا زى اللى عنده 10 سنين وبيشتغل ميكانيكى


احمد ربنا


احنا فى نعم ملهاش عدد بجد مش ممكن نعرف نقولها كلها


بس لازم نعرف قيمتها


قبل ما نتبطر وربنا ياخدها مننا ونرجع نندم


لازم نعرف ان احنا اغنيا اوى اوى بنعم ربنا دى علينا


بس برضه فى الاخر بنكتئب ونزعل ونتهم ونتغم


ازاااااااااى بجد


ربنا عاطينا كل ده ومش عاجبنا


ايه الاستعباط ده


ولا احنا طماعين ولا ايه


لازم نفوق ونعرف النعمه اللى احنا فيها


لازم بجد


لازم


----------------------------------------------


الكلام ده ليا


قبل ما يكون لاى حد


السبت، 2 أكتوبر، 2010

كلمه السر -- مكتبه المدرسه


ايوه يا عم احمد



ايوه يا هندسه


ها يا عم احمد الكتاب جالك


اه يا هندسه موجود


ماشى يا عم احمد هاجى اخده اللنهارده


لاااااااااااا


استنى يا هندسه


بص لما تيجى تعالالى على الرصيف اللى قدام المكتبه بلاش تجيلى فى المكتبه


ورنلى اول ما توصل


ليه يا عم احمد فيه ايه


اسمع بس كلامى خلينا ماشيين جنب الحيط يا هندسه


ماشى يا عم احمد خلاص حجيلك الساعه 5


----------------------------------------


ايه يا عم احمد ازيك


خد يا هندسه وهات الفلوس


اوعى تقول لحد انك واخده من عندى


سلام ياهندسه






استنى يا عم احمد


عم احمد


عم احمااااااااااااااااااد


-------------------------------------------






طبعا الحوار اللى فات يقول ان عم احمد بيبيع مخدرات


دراجز


هههههههههههه


الراجل ده للاسف كان بيبيع كتاب خارجى


اه والله


كتاب خارجى


بيبيعه سرقه


ومش جوه المكتبه لا ده على الرصيف اللى قصادها


وفى كيس اسود


اصلها حاجات عيب دلوقتى الكتب الخارجيه






ياجدعان دى الكتب الخارجيه زمان كنا بناخد الواجب بتاع المدرسه منها
اخر الدرس تلاقى المدرس يقولنا


س .ت


يعنى سلاح التلميذ


وسؤالين تلاته منه


والكتاب كان يطلع من المكتبه عليه الختم بتاعها للدعايه للمكتبه يعنى


الكتاب يطلع رافع راسه


دلوقتى الكتاب بقى بيطلع متهرب وفى كيس اسود


هى حاجه كويسه ان كتاب المدرسه يتعمله قيمه


بس لو كان فيه معلومات واسلوب يستاهلو بجد قيمته دى


ربنا يستر بكره ومنلاقيش الاقلام الرصاص ممنوعه فى المكتبات والعيال يكتبو بصوابعهم بقى


:)






الأربعاء، 29 سبتمبر، 2010

جمال مات



جدى راجع من بره هو وخالتى اللى اصغر من مامتى من عند الدكتور


فى يوم من الايام


ماشيين فى الشارع مروحين البيت


الراديو كان جايب قران


والساعه مش 8 اللى هو الميعاد بتاع اذاعه القاهره اللى بتجيب فيه القران كل يوم


وصلو البيت لقوهم برضه مستغربين ان طول اليوم فى قران فى الراديو


والناس عاوزه تعرف فى ايه


بعدها بساعات اعلنو ان جمال عبد الناصر مات


جمال مات


وناس تصوت


وناس تعيط


واللى يطلع فى الشارع مش مصدق


والناس كلها لبست اسود


شوارع مصر كانت لابسه اسود


ساعتها مكنش فيه وسائل نقل واتصال بالتطور اللى فيه دلوقتى


على ما جه كل رؤساء العالم كان عدى يومين


واتدفن جمال عبد الناصر


وسط دموع مصر كلها


اللى مكنش بيحبه قبل اللى كان بيحبه


اللى مكنش بيحب عبد الناصر قال عليه مكنش فيه زيه


مابالك باللى كانو بيحبوه وفاهمين سياسته


قعدو الناس فى حزن


متخيلين يا جماعه مصر كلها حزينه


الناس كلهم متفقين على الحزن على شخص واحد


جدتى يوم الجنازه معملتلهومش يتغدو قالتلهم لما جنازه عبد الناصر تخلص


والمدارس والمصالح قفلت كام يوم


ومحدش كان بيعمل اى حاجه


كلو كان حزين


ولما الاطفال رجعو المدارس كانو كلهم حاطين شريطه سوده على المرايل بتاعتهم


وفضلو الناس قلقانين ياترى مين اللى حييجى بعديه


ايام بتعدى والناس خايفه ومرعوبه


لحد ما جه السادات
                                                                 يتبع فى ذكرى وفاه السادات :)


الخميس، 23 سبتمبر، 2010

احترم نفسك -- بلاش قله ادب



لما تبقى راكب مواصلات وتلاقى بنت بتزعق فجأه


وبتقول


ايدك يا حيوان


وشتيمه وبهدله واللى بيتشتم فى نص هدومه


وكل الناس تبهدله ومش بعيد ياكل علقه مكلهاش حمار


ده يبقى اسمه ايه


المعاكسات مبقتش يا جميل انت يا اللى ماشى


ولا احلى واحده اللى لابسه جزمه حمرا


واحلى واحده اللى فى النص وهما اتنين بس اصلا


لا بقت بالفاظ متتقالش


ومد ايدين


ورعب للبنت اللى ماشيه فى الشارع


وحاجات بشعه بجد جدا


اه بيبقى فى بنات لبسها زى الزفت


وتخلى اللى قدامها يعمل كده


بس اللى ماشيه محترمه ولابسه كويس لما يتعمل فيها كده


يبقى اسمه ايه


يعنى ايه واحده راكبه مواصلات وقاعده فى حالها وتلاقى واحد حيوان مد ايده عليها


الواحد بقى ميركبش مواصلات


ولا يمشى فى الشارع


وبعدين كلام من نوعيه انت معندكش اخوات بنات


ولا ترضى حد يعمل كده فى اختك


اللى الناس بيقولوه للى بيعمل كده


مبقاش بيأثر خلااااص


هى هى


كان زماان


بجد فى حاله من الاخلاق المهببه متفشيه فى البلد


ايه متفشيه دى -- منتشره يعنى


لا والمصيبه الكبيره اوى بقى


انى شفت بنتين بيعاكسو ولد


اه والله العظيم


البنات اللى بتعاكس


ده ايه الخيبه والوكسه اللى بقينا فيها دى


تؤتؤتؤتؤ


لا تقولى حياء ولا خجل ولا ادب


متحاولش


الكلام ده اتلغى من القاموس


بجد احنا محتاجين دلوقتى سفينه سيدنا نوح ويبقى فيه طوفان ياخد كله


واللى يفضل بس الكويس


عشان كده بقت حاجه


تييييييييييييييييييييييييييييييييت خالص


ولو سمحت احترم نفسك – بلاش قله ادب (اتق الله )