الأربعاء، 22 ديسمبر، 2010

انت مين وعاوز ايه ؟؟



هو احنا مين
انت مين
وانتى مين
وانا مين
كلنا انسان
كلنا بنى ادمين
اه
عايشين عاديين
بس هو يعنى ايه عاديين
يعنى عايشين
عاوزين ايه؟؟
ناكل
 نشرب
 نلبس
 ننام
نتفسح – اكتر حاجه الناس بتعملها حتى لو معهومش فلوس
نتجوز --  وده مبقاش متوفر لناس كتير
 نشتغل – مع ان ده مش كله بيعمله بمفهومه الصح
وهو ده اللى بيتكرر كل يوم
كأنه شريط واتسجل وكل يوم بيتعاد
الا من رحم ربى  طبعا
ما هو كمان ده طبيعى
انتى من كوكب تانى يعنى ولا ايه
مش عاوزانا ناكل ونلبس وننام ونشتغل
ما هى دى حاجات لازم نعملها
لا انا مبقولش كده
احنا هناكل ونلبس ونشتغل ونعمل كل حاجه
بس احنا ممكن نغير كتيييييير اوى
ركزو فى الجمله اللى جايه دى
احنا ممكن نغير حاجه للخير بعاده وحشه عندنا
اسمعونى بس
انا مش بهيس عليكو والله
بس مثلا انا عندى حاجه فى شخصيتى وحشه
انى مثلا مثلا عنيده
اوجه الطاقه اللى بستغلها فى العند جوايا
للعند فى الخير
يعنى اعند فى حاجه صح
اعند فى موقف يجيب حق حد
اعند فى انى هحقق احلامى
انا كده هبقى فيا الطبع الوحش  
بس بستغله صح وفى حاجه مفيده
لحد ما اتعود على انى استغله فى الخير
بعد كده الطبع الوحش هيروح لوحده
بالتعود على الصح والخير
بس ايه بقى ميجيش واحد ابن حلال دماغه خربانه
ويعند فى اى حاجه وكل حاجه
ويستغل كل طباعه السيئه فى انه يغلس على البشريه وخلاص
حد تانى مسرف
 يستغل اسرافه فى وجه خير
اهو لبى رغبه جواه بتقوله اصرف اصرف
 وفى نفس الوقت فى حاجه خير
حد تالت عيبه الرغى
بيتكلم كتير
ودى حاجه تيييييت طبعا
مؤذيه لصاحبها اكتر من اى حد تانى
طيب الحد ده اللى بيتكلم كتير
يفضل يتكلم كتير
بس يتكلم  فى حاجه مفيده
حاجه لما يتكلم فيها مع الناس تفيدهم وتفيده
خلاصه الموضوع ده
عشان متزهقوش منى
احنا مش كاملين وفينا عيوب كتير
يبقى نحاول نوجه الطاقه اللى بتطلع بيها عيوبنا فى الصح والخير
بجد حنتغير جدا
وقبل ده كله ياريت نبقى محددين ايه عيوبنا بالظبط
عشان نشتغل عليها صح
ودايما خلينا واثقين اننا نقدر نغير اى حاجه
 بس نبدا بنفسنا
:)
23 / 12 / 2010

هناك تعليق واحد:

غير معرف يقول...

انا مبقتش عارف انا مين دايمكا بجلم بكوابيس
فى الحقيقه انا طول الوقت اجلس مع نفسى حتى فى البيت
مع نفسى فى كل مكان حتى لو فى زمايل فى العمل يعنى بجاريهم بضحكتين وهزار ولكنى برا العمل مع نفسى مليش دعوه بقرايب ولا اصحاب ده كمان حتى لو هما اتصلوا وسالوا عليا ايه السبب معرفش
هل انا مريض الاجابه لا
هل انا لا املك مخ
الاجابه لا بل انا فى الجامعه الاول بامتياز على دفعتى كاملتا
ولكن لماذا يحدث كل هذا لى ولماذا لا استطيع ان اغير الوحده
لماذا لا احب انا السعاده
دائما انا ابحث عن الاحزان بل والغريب انى استمتع جدا بعيش جو الاحزان اما فى لحظات السعاده لا احبها
ولا اريدها رغم انى املك كل شىء تقريبا من نجاح ومن مال ولكنى فى نفس الوقت اشعر ان الحياه ليس لها قيمه ولست سعيد واشعر انى لا شىء ما هذا الاحساس
الاجابه لا اعلم لا اعلم لا اعلم حتى اموت
والكوابيس ستظل تطاردنى الى ان اموت ولا اعلم لماذا وماذا اريد انا اريد ماذا ستقول لى انى ليس لدى هدف
ساقول لك انا لم اجرى يوما وراء هدف او لم اقم بتخطيط لهدف ما وفى نفس الوقت ناجح بامتياز سواء فى الدراسه او العمل وذلك لانى ارفض ان اكون مركز تانى فى اى مكان ولكن ماذا يحدث لى لا اعلم اخس بطؤيقه مستمره مع انى ااكل باستمرار اشعر بالتشائم طول الوقت واكتئاب طوال الوقت بسبب او بدون سبب
لا شىء يسعدنى على الاطلاق مع انى اهدا شخص فى الكون !
على العموم دى مجرد كلمتين كده عنى وانا لسه شاب 22 سنه ومبحبش الجواز ومش هتجوز لانى بحب الحريه