الثلاثاء، 7 يونيو، 2011

يوميات فى المشروع -- مين خالد سعيد ده --




بعد يوم طويل ومرهق بره البيت
بحب لما اركب مواصلات ملاقيش دوشه
ولو لقيت دوشه بتنرفز وببقى عرضه لاى خناقه من اى نوع
خناقه صغيره يعنى ...مش خناقه كبيره
ما هما اللى بينرفزونى بقى .. الله
ركبت المشروع ومكنش زحمه الحمد لله
الواحد كان متنح من التعب
طلع السواق ابن ناس ومش رغاى
بس ازاااااى ... ازاى يسكتو ويعدى اليوم بهدووء
نهار خارجى
من داخل المشروع
اتنين  ركاب بيتكلمو عن الثوره
زووووم إن عليهم
تلاقيهم بيتكلمو كلام عادى وزى الفل
واحد فيهم بيقول للتانى انا نزلت ال 18 يوم كلهم قبل التنحى
التانى قاله انا نزلت حتى بعد التنحى
وقعدو يتكلمو على اللى حصل
وعلى خالد سعيد وانه سبب التغيير
انا مش راميه ودنى .. لاااا خالص .. بس هما اللى صوتهم عالى
هما كل الرجاله كده .. صوتهم فى المواصلات عالى – مش عارفه ايه السبب بصراحه
وخصووووصا لما يتكلمو فى التليفون ...يوووووه
ما علينا
فضلو يتكلمو عن الثوره وخالد سعيد والظلم اللى اتعرضله
وان لو هو مكنش كويس ..كان ازاى هيبقى كل الناس دى بتدافع عنه ويتعمل وقفات عشانه
واترحمو عليه وسكتو
زوووووم أوت
وزووووم إن تااانى
 على راجل كبير يعنى يجيله فوق السبعين
قاعد نايم على نفسه كده ومش قادر يرفع راسه
سابهم يتكلمو للاخر وبعد كده قالهم
خالد سعيد مين ... ((خد فى بالك ان الراكب ده كمان سكندرى اومال اللى فى القاهره وباقى المحافظات يعملو ايه ))
قالوله نعم
قالهم مين خالد سعيد ده
وثوره ايه اللى بتتكلمو عنها
هى دى كانت ثوره .. دى شويه عيال بنت كلب خربت البلد .... نعتذر على الشتيمه بس والله هو اللى قال كده
الراجل قاله خربو البلد ايه يا حاج .. انت مكنتش حاسس بالى كان بيحصل قبل كده ولا ايه  .. ولسه الثوره هتحقق كتير بس احنا نصبر ونشتغل
الحاج اللى مش حاج ده قاله بس حسنى مبارك ممشاش
الراجل قاعد فى شرم الشيخ واخد اجازه بس شويه
راح رد عليه الراجل من نرفزته قاله  اولا خالد سعيد ده الشرطه موتته ظلم وبهدلوه وبيبوظو سمعته  ومبارك مشى يا حاج وهيتحاكم على الفلوس اللى سرقها والشعب اللى قتله
الحاج قاله وكمان بتقول سرق فلوس
انت بتصدق حكايه ال 70 مليار دى .. تؤتؤتؤتؤ
طيب انت تعرف يا ابنى انه مكنش معاه فلوس .. خد منى الكلام ده ثقه
طبعا انا كنت عاوزه اعرف الراجل جاب الثقه دى منين
الراجل قاله عرفت منين ياحاج
الحاج قاله ده كان بياخد منح من الدول التانيه يبقى ازاى معاه كل المليارات دى
صدقونى ده غلبااان ومضحوك عليه
انا كنت عاوزه اتكلم طبعا  بس مسكت نفسى بالعافيه
الحاج ده قريب القذافى ولا اييييه يا جدعااان
الاتنين الركاب كانو هيتشلو يا عينى
والحاج ده مصمم ان حسنى مبارك غلبان ومغلوب على امره يا عينى
وهو نازل من المشروع .. دعى على الاتنين اللى كانو بيتكلمو .. وقالهم بكره ربنا يظهر الحق
-------
احييييييييييييييه بجد
طيب ده حتى الراجل الكبير ده اكيد شاف السادات وعبد الناصر
ازاى مش حاسس بالكارثه اللى كان عاملها مبارك فى البلد
ياعينى عليكى يابلد
وسمعنى سلام انا مش عارفنى انا توهت منى انا مش انا
وسلملى على الثوره المضاده 

هناك 10 تعليقات:

الحلم العربي يقول...

:)) للأسف فيه منه شوية لسة مش عارفين يستوعبوا اللى حصل ، و دول أحسن حل ليهم انك تسيبيهم مسيرهم يعرفوا في يوم إن شاء الله

Haytham Alsayes يقول...

تييييييييييييييت
هههههههههههههههههههههههههههه
بجد عالم في الطراوة والضايعون
عالم مهاش عايشة ولا حاسة باللي موجود في البلد في عالم عن جهل متعمد وفي عالم مش مقتنعة ان في ثورة
هما عادتهم يعني ماهما قالوا علي ثورة عرابي هوجة عرابي يعني خلوها هوجة وراحت لحالها
اه يابلد محتاجة ولد

حلوة اوى ياساره
برافو جون ان استمرى

تحياتي :))

أنا المصرى يقول...

انا مش عارف حاسس ان الراجل ده كان عم انور بتاع اعلانات ميلودى , انا ها اجيبك يا يابن التيييييييييت

زوووو يقول...

هههههههههههههههههههههههههه
القذافى له عائلات هنا
ربنا يستر
زووو

غير معرف يقول...

فى ناس كتير عايشه فى مية البطيخ بس عايزه اقولك ان نص الشعب المصرى ناس بسطاء عايشه اليوم بيومه كل اللى يهمها قوت يومها وبس لايهمها ثوره ولاحسنى ولاخالد فاطمه

دعوه للحب يقول...

اولا مش كل الرجاله صوتهم عالى فى المواصلات وخصوصا التليفون امال البنات تعمل ايه دول رغايين جدا
ثانيا حوارات المشروع كتييييره وبطلع اراء اكتر ووجهات نظر مختلفه
ثالثا عم الحاج اللى كان نايم وفاق مره واحده دا فى منه عينات وتنرفز بجد عمى كان منهم دخلنا فى حوارات واختلافات معاه قبل التنحى وبعد التنحى كان مصمم ان حسنى مافيش احسن منه وهو الافضل لحد ما ثبتنا ليه انه حرامى ونصاب
كالعاده ياساره تعبيراتك تمام وكلامك مقنع بالتوفيق

Bent Men ElZaman Da !! يقول...

يمكن لانه راجل كبير
ماكنش فاهم ايه اللى بيحصل قبل كده ومازال مش عايز يفهم
ومش يهمه تقريبا التغيير اللى هنوصله مستقبلا
فى ناس لسه مش مستوعبه اللى حصل واللى لسه بيحصل
لانهم مش متخيلين كم الصدمات فى شخصيات كتير فى البلد
وكميه الفساد اللى كانت موجوده قبل كده

غير معرف يقول...

حصاد الثورة عايز صبر وأكيد الراجل دا كان مصدق من أجلك أنت ومن أجل مستقبل أولادك ووووووو
كمان بعد الثورة مش شايف ولا سامع غير مكلمة ف كل مكان وبعدين مين خالد سعيد
Eman karkora

غير معرف يقول...

ياساره يمكن الراجل كان فى غيبوبه ولسه صاحى من كام شهر بس
على فكره هى حلوه ياساره بس مش بقوه اللى قبلها ومن غير زعل اللى قبلها كانو احلى
بلبله

غير معرف يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه.....................................................لا تعليق