الاثنين، 13 يونيو، 2011

الحب .. حريه



لما تحب حد حبه زى ما هو
كله على بعضه بكل تفاصيله
وحياته وروحه
انت مش بتعمل انسان جديد على ايدك
مش هينفع تغير روحه
وتغير تفكيره واقتناعاته وعاداته
ازاى اصلا حد يقدر يحب 
وهو جواه مخنوق
مخنوق بتصرفات معينه
مجبر عليها
علشان خاطر اللى بيحبه
ده مش حب
ده تغيير للإنسانيه
وكبت لطاقه الروح
الروح لازم تننفس علشان تعيش
وهواء الروح هو الحب
الحب هو ان اتنين يعيشو الدنيا الكبيره الحلوه سوا
ويقسمو الهم والوجع سوا
بس الاولويه للحاجات الحلوه
انهم يكونو بيفهمو بعض من غير ما يتكلمو
متواصلين روحيا وفكريا
روحهم بتحب بعض
مش بس القلب والعقل
طاقه الحب دى رهيبه
مينفعش نكتمها
والا هتنفجر فينا
وساعتها مش هنعرف نحب
اى حد
ولا اى حاجه
وهنخسر احلى احساس
لازم نحافظ عليه
إكنس اى ذكريات وحشه
ومشاعر سلبيه
وكره
وحقد
وسوء نيه
من قلبك وروحك وعقلك
عيش بروح نضيفه
عيش الحياه صح
وأدى دورك المطلوب منك فى الكون
بس أديه ب حب
مش وانت مخنوق
لأنك كده كده
عايش
حب كل الناس
 وكل الحاجات
لأنها بتحس بيك
واهم من كل ده
حِب نفسك
ومتقللش من انسانيتها
لانك تستحق كتير
 --------------
شكر خاص لصديقتى رشا انور

هناك 17 تعليقًا:

غير معرف يقول...

رائعه يا ساره وبسيطه كده
عجبني اوي الجزء ده/
الحب هو ان اتنين يعيشو الدنيا الكبيره الحلوه سوا
ويقسمو الهم والوجع سوا
بس الاولويه للحاجات الحلوه
انهم يكونو بيفهمو بعض من غير ما يتكلمو

بجد وصف رائع
masry asly

اسكندرانيه يقول...

شكرا يا خالد جدا بجد
:)

غير معرف يقول...

انا كمان باشكرها لانها كانت السبب فالكلام الحلو ده
جميل كلامك يا سارة
في تقدم دايما باذن الله
أماني

اسكندرانيه يقول...

شكرا يا منمن
تسلميلى يارب :)

رشا انور يقول...

جامدة مووووووووووووت
:))))

Bent Men ElZaman Da !! يقول...

جميله اوى يا ساره
الحب بيدينا طاقه ايجابيه
يخلينا نقدر نعيش الحلو والوحش
والحلو اكتر زى ماقولتى
ويخلينا نحول الوحش كمان يبقى فى نظرنا احلى وناخد منه مميزاته مش بس عيوبه
تسلم ايدك :))

اسكندرانيه يقول...

انتى اجمد يا روووشى

اسكندرانيه يقول...

شكرا يا بنوته من الزمان ده
انتى اجمل
فعلا يارب نقدر
:)

غير معرف يقول...

ايه الحلاوه دى ايه الجمال ده
انت بجد هايله بس الدنيا مش ورديه قوى كده ولما تحبى حد لازم تقبليه كله على بعضه لان مافيش انسان كامل او تفصيل على مزاجنا بس احلى حاجه قولتيها ان الواحد لازم يحب نفسه الاول
ومين رشا
بلبله

اسكندرانيه يقول...

شكرا يا بلبله على كلامك بجد
رشا صديقتى
مدربه تنميه بشريه
كنت معاها امبارح واتكمنا كتير
لازم طبعا الانسان يحب نفسه الاول والا مش هيقدر يحب اى حد

غير معرف يقول...

الانسان لما يحب بجد مبيشوفش عيوب فى اللى بيحبه وكمان بيحاول يرضيه حتى لو على حساب نفسه وهو راضى مش مخنوق بس بيكون مستنى من اللى بيحبه انه يعامله نفس المعامله فاطمه

دعوه للحب يقول...

بما ان الموضوع ماشى مع اسم الاكونت بتاعى فاحييكى من كل قلبى
المهم ندخل فى الموضوع
اهم شىء الاختيار السليم لو الاختيار صحيح وملائم كل شىء بعد كدا هتكون تمام
وبالتالى هنلاقى التفاهم والحب والتقدير بين الطرفين العقول متواصله التفاهم متبادل التضحيات ان وجدت هتكون بين الطرفين بل كل طرف هيسابق التانى فى التضحيه
واجمل الاوقات هتكون فى اللقاء هتحس انك فى الجنه فى مكان بعيد عن البشر
وفى نفس الوقت الحب الحقيقى الصادق هيزرع داخلك حب الناس حتى حب الاعداء
الحب شىء جميل لا يقدر بمال
واذا تواجد الحب تلاشت العيوب
مع تحياتى

اسكندرانيه يقول...

صح يا فطوم
لازم يكون فى تبادل
والا فى روح منهم هتنفذ والتانيه
تبقى زى ما هيه

اسكندرانيه يقول...

انا كمان بحييك يا عبده على كلامك
عنمدك حق فى كلامك فعلا
شكرا لمرورك
:)

غير معرف يقول...

ياريت تقابلى رشا مرة كل اسبوع
لو الإنسان حب نفسه بس باعتدال حبعرف يحب كل الكون
Eman karkora

خالد نور يقول...

مش عارف اقول أيه بس كلام حلو شكرا ليكي ولرشا انتم الاتنين احلى من بعض

Aya Mohamed يقول...

حب كل الناس
وكل الحاجات
لأنها بتحس بيك

عجبتنى دى جدا ومعاكى حق
وقت لما نحب كل حاجة حوالينا بنلاقيها
بنحس قد ايه كل حاجة بقت اجمل واكنها بترد علينا بحب
تسلم ايدك يا قمرايه :)