الأربعاء، 15 يونيو 2011

يوميات فى المشروع – اللب والهريسه




سواق بيزمر لكل الناس وبيقف علشان يركب اى حد
معاه مكان او معهوش
اللى واقف عايز يركب او مش عاوز
بيقف لاى حد  واى حاجه
لو مشوارك بياخد ربع ساعه
فحضرتك هتأنسنا شويه زياده
ساعه كده بس .. وتحمد ربنا انك هتنزل سليم
سواق غريب
مشغل اغانى بصوت عالى
وبمشى بسرعه اوى
فجأه السواق وقف وقال كل الناس تقفل ازاز العربيه كويس
وقفل كل مفاتيح اللوك بتاعه العربيه – اللى هى المسوجر يعنى
الناس قالتله فى ايه
قالهم اصل فى خناقه قدام وممكن حد يفتح العربيه ولا يعمل حاجه فيها
الراجل خايف علينا كتر خيره
راجل محترم – بغض النظر عن اللى كان بيعمله
وهو ماشى وعدينا على الخناقه
اللى مكنتش خناقه ولا حاجه
كانت مجرد حادثه على الطريق
السواق قال كلام غريب
خلانى تنحت
قال : يادى القرف اللى احنا فيه
اهو ده اللى خدناه من الثوره واللى عملو الثوره
كان ماله حسنى مبارك
ما الراجل كان زى الفل
على الاقل كنا عايشين فى ضله
وكان مخلينا فى امان وهنا
مش كل يوم قرف وخناقات
لحظه كده
الراجل ده قال -- ضله
على اساس ان حسنى مبارك يعنى كان ايه
طائر رخ ولا ستاير قبنورى ضد الشمس
ضل مين يا ابو ضل  
واحد رد عليه قاله مين وكنا عايشين فى ضله ايه
قاله حسنى مبارك
الناس تنحت
وانا طبعا جالى هستيريا ضحك
المهم ان السواق مسكتش
قعد يعدد فى محاسن مبارك
محاسن ولا جمالات اهو كله محصل بعضه
هو كان فى زيه
ده راجل مخلناش ندخل فى حرب 30 سنه – يادى ام الجمله اللى حافظينها مش فاهمينها دى
الناس كانت عايشه مرتاحه بتاكل لب وهريسه
الراجل بيقول لب وهريسه
حد يقولى انه بيهزر ياجدعان
ده على اساس ان حسنى مبارك كان اللب والهريسه ضمن برنامجه الانتخابى
ولا كان بيوزعهم على الشعب ببلاش ولا ايييييييييه
وايه علاقه اللب والهريسه بالاستقرار والحريه والعادله والكلام ده كله
يادى الوكسه على الناس اللى مش فاهمه وعامله نفسها فاهمه
واللى فاهمه وعامله نفسها مش فاهمه
واحد قال للسواق على جنب
وهو نازل
قعد ينادى
امسك سواق فلول
امسك سواق فلول

هناك 11 تعليقًا:

غير معرف يقول...

ههههههههههههههههههههههههههههههههههه
تححححححححفففففففففففففة يا سارة
أنا مت من الضحك
هوه الكلام ده كله بجد؟؟

ساره جمعه يقول...

معظمه يعنى
:)

غير معرف يقول...

ستاير قبنوري؟؟
مبارك كان ضد المية ضد النار يعني؟
كنا عايشين في ضله آه... ما هو حيطة !!

انا هبلغ عن السواق ده.. فين نمر العربية؟

*******************

مها ميهوووو

Mahmoud Ahmed يقول...

ههههههههههههههه
امسك سواق فلول ههههههههههه
حلوه حلوه حلوه حلوه
هههههههههههههههههههههههه


هو تلاقيه بيقول كده بس عشان دخله قل و لا حاجه بعد الثوره
انا اعرف واحد غلبان قوي قوي قوي
كان بيتشغل بالاجره كل يوم
كان بيقبض 20 جنيه و هو مروح بيته
و كان من ضمن الناس الى نزلت في الميدان
دلوقتي بقي كل كام يوم على ما يعرف يجب 10 جنيه بس
و ده حقيقه بجد
دلوقتي تسمعيه بقي بيضرب نفسه 100 جزمه عشان نزل الميدان
لأنه كل الى يهمه انه يلاقي فلوس ياكل بيها ولاده
هي الناس الغلابه كده


ده لو اعتبرنا ان السواق ده غلبان يعني :(

ساره جمعه يقول...

ده كان ضد كل حاجه يا مهاميهو
يلا منه لله بقى
هبقى اجيبلك نمر العربيه
:)

ساره جمعه يقول...

سبايدر مان
السواقين غلابه والله بس مش كلهم اكيد
وحتى لو غلابه ماديا فهم دماغهم مودياهم ورا

غير معرف يقول...

مننكرش ان حستى مبارك عمل انجازات فى بدايه حكمه بس اخر 10سنين ودوه فى داهيه والسواق بيقول ده من خنقته من الانفلات الامنى اللى موجود فى الشارع لان بيحصل بلاوى وفى الاخر نطلب من الله ان يولى من يصلح
فاطمه

غير معرف يقول...

انا عاوزه اعرف انتى راحه جايه فى المشاريع وحاطه السواقين تحت الميكروسكوب وبتحللي كلامهم يابنتى جربى تركبى المشروع وتنامى فيه شويه هتلاقى السواق مثقف وثورجى درجه اولى ههههه
بلبله

غير معرف يقول...

ضله دا اللى كان مخلى بتوع المرور مقاسمينه فى رزقه ومبهدلينه المشكلة ان فى ناس كتير كده خصوصا اللى بيكسبوا رزقهم يوم بيوم ومش حيقدروا يصبروا لحد مايحسوا بنتايج الثورة وواضح انها حتتأخر

غير معرف يقول...

هههههههههههههههههههههههههه
Nevo

غير معرف يقول...

هههههههههههههههههههههههههههههههههههههه

مش ممكن الراجل ده ههههههههههههه بس فيه نه كتير برضه

خالد