السبت، 18 يونيو 2011

البعض يذهب للبحر خلسه




تناول ثمره طماطم بيديه .. مسحها جيدا فى قميصه الرمادى الذى يرتديه
ثم اكلها  مع طبق فول وخمس حبات فلافل
هذا القميص يغسله مره واحده فى الاسبوع ..
ويمسح فيه يوميا اى شىء قبل ان يأكله
ومع ذلك يثق فى نظافته
بعد انتهائه من الفطور .. نادى على بناته الأربعه
يلا ياخيبتى التقيله علشان نفرش الخضار
قامت البنات فى همه ونشاط  ولكن منكسرات
فرشن مع والدهن ما يبعن من خضار فى السوق
اثناء فرشهم للخضار .. قال لهم
كل يوم تصحو عايزين تجرو على البحر
لكن الشغل تقومو بالعافيه
خلينا فى اكل عيشنا
بلا بحر بلا قرف
تتناقل البنات بعض الغمغمات بصوت منخفض لكيلا يسمعهم والدهم
يمضين يومهن فى السوق.
بيع .. فصال .. يعاكسهم هذا .. يعتبرهم اخر رجالا
فهن يرتدين ملابس الرجال
رغم صغر سنهم الا انهم لا يبدو عليهم
لا ترى البراءه الا اذا نظرت الى اعينهم
بعد انتهاء اليوم
يقمن ب لم الفرشه .. وادخالها الى منزلهم
المصنوع من الخوص والخشب
قالت اصغرهم .. آبا عاوزين نروح البحر
رد عليها وقد تغير وجهه
البحر ده مش لينا .. احنا مش بتوع بحر
استسلمت البنات .. ليس لعجزهم عن اقناعه
ولكن لتحدثهم معه طويلا فى هذا الموضوع
ولكنه ابدا لم يستجب لهم
جاء الليل نام الاب من التعب ونامت البنات
ولكنهم نامو ليوهمو ابوهم فقط
بعد ان نام .. قامو فى شكل مرتب مسبقا
خرجو واحده تلو الاخرى
ذهبو الى الشاطىء الذى لا يبعد عنهم الا خطوات
لم يخلعو سوى شباشبهم
جرو على البحر وكانه سيحتضنهم بشده
احسو فيه بحنان امهم التى فقدوها
لم يتأخرو وعادو سريعا
ابدلو ملابسهم بخفه وسرعه
وعادو الى اماكن نومهم
ايقظهم والدهم
فقامو سريعا .. حتى لا يسمعو اسطوانه كل يوم
ولكنه لم ينس جملته اليوميه  ..
كل يوم تصحو عايزين تجرو على البحر
قالت له البنت الصغرى
فى سذاجه 
امبارح قلتلنا  البحر مش لينا ..
 بس البحر طلع طيب اوى و بتاع كل الناس

هناك 8 تعليقات:

غير معرف يقول...

هههههههههههههه
حلوة
Nevo

غير معرف يقول...

حلوة اوي يا سارة
أهو انتي كده مش بس عيشتيني فالمود لا ده انتي كمان غيظتيني عشان انا بقالي مدة عايزة أروح البحر
يعني انتي دلوقتي حتجيبيلي حاجة حلوة وحتديني حضن وكمان حتوديني البحر .. حاسبي لحسن كدة على آخر الشهر ده حتكوني فلستي ههههههههههههه
أماني

غير معرف يقول...

حلوه قوى ياساره بس البنت الصغيره فتانه صح ههههههههههه
بلبله

غير معرف يقول...

جميله ياساره بس على فكره فى ناس كتير بيشوفه ان البحر رفاهيه ربنا يوفقك
فاطمه

غير معرف يقول...

البحر مش حلو على طول ياساره انا واحده من الناس بازهق من القاعده عليه فترات طويله كوكى

غير معرف يقول...

حلوة اوي يا سارة...MASRY ASLY

غير معرف يقول...

مش على طول البحر بيكون طيب
بس التجديد فى الكتابة واضح
Eman karkora

غير معرف يقول...

الله

تخيلت المشهد وهما بيشوفوا البحر وبيحضنوه وبيلمسوه رهييييب

شكراً يا سارة

خالد نور