الأربعاء، 8 يونيو 2011

ممكن اضربك على قفاك



بقترح يتعمل اعلان فى التليفزيون عن تجميع تبرعات
على نطاق واسع جدا
ويكون هدفها المعلن تطوير البلد
وطبعا هيكون هدفا المتدارى مساعده مساجين طره الغلابه
اللى عندى احساس انهم هياخدو كلهم برائه
بعد شويه كده لما الناس تهدى
او هيتعمل اى فيلم والناس دى تهرب
مش تشاؤم والله بس ده المتوقع من الناس دى
وخصوصا انهم معاهم كل وسائل الاتصال
اللى تخليهم يظبطو نفسهم كويس اوى
انا عندى سؤال بيطرح نفسه
هو ليه مبقاش فيه فى التليفزيون اليومين دول اعلانات
لمستشفى 57357
كان الاعلان بييجى بمعدل 20 مره فى اليوم على كل قناه
دى كانت حاجه كويسه طبعا جدا
بس ليه اتقطع دلوقتى
يعنى هى المستشفى خلاص استكفت
ولا الاعلانات كانتت بتتعمل علشان يلمو تبرعات كبيره
وتيجى طنط سوزى ولا اونكل حسحس وياخدوها
بدل ما كانو بيقولو اتبرع ولو بجنيه اعتقد كان يبقى احسن لو قال
و ممكن اضربك على قفاك وبرضه هتدفع الجنيه  
المستشفى دى كل مصرى دفع فيها
انا فاكره كنت فى ثانوى ساعتها وكان فى ناس بتلف المدارس تلم من كل طالب اتنين جنيه تقريبا
كانو اجبار اصلا
يعنى مصر كلها باللى مش لاقيين ياكلو فيا دفعو
مش بعيد يكون المقاول اللى عمل المستشفى كان كارم الناس دى وعملهم تخفيض حلو
وباقى الفلوس اللى اتلمت دخلت فى اى كرش من الكروش الكبيره
وكان فين حسنى وسوزى وعز وسرور والشريف والناس اللى كانت نايمه عالفلوس دى
ساعه ما الشعب كله دفع فى المستشفى
متغاظه جدا وحاسه ان كلنا اتضربنا على قفانا حته قفا يعمى
 وعاوزه الاتنين جنيه بتوعى اللى دفعتهم فى ثانوى اروح اديهم بايدى للمستشفى
اهم من كل ده
لازم حد يقولى الاعلان وقف ليه

هناك 11 تعليقًا:

Haytham Alsayes يقول...

ههههههههههههههههههههههههههههه
ضحكتيني بجد
ينهار ابيض ممكن فعلا اخوانا البعدا يخرجوا من طرة كدة
فعلا يعني دي تبقي تيييييييت بعد كل دة
عموما ربنا يستر ياساره
لازم نبقي مصحصحين اخر حاجة مع العالم التييت دي

تحياتي

زوووو يقول...

....
حاجة تغم النفس
حاجة كده زى الايشارب الطبقى

غير معرف يقول...

ههههههههههههههههههه
سؤال يطرح نفسه
كان معكم
سارة جمعة
امام كشك عم محمد بتاع الحاجة الساقعة
الاسكندرية

Neven

غير معرف يقول...

هههههههههههههههههههههههههه

صح الواحد مبقاش يشوفهم

اكيد مهو عندو مليارات اللهم لا حسد كلو من عرق الشعب الاتنين جنيه دول موجودين فى البنوك بره لما يرجعو الفلوس هتاخديهم تانى ان شاء الله

Bent Men ElZman Da !! يقول...

دى حقيقه فعلا :D
احنا كلنا بنضرب على قفانا من زمان
الواحد اصلا كان شاكك فى حكايه تبرعات المستشفى دى
اصل كانوا بياخدوا تبرعات بالهبل وبردو المستشفى مش بتخلص الا بعد معاناه
كان الموضوع فيه انه
لما بتوع طره اتكشفوا الواحد فهم خلاص الفلوس كانت بتروح فين بالظبط :D

دعوه للحب يقول...

انا اتفق معاكم اللى عملوه اخونا اللى فى طره يخلونا نشك فى اللى حولينا
بس انا اعترض ايديهم موصلتش للمستشفى الفلوس موجوده فى حسابات المستشفى وبالملايين لتغطيه مصاريف المستشفى
ممكن تكونوا مش حاسين بيها لانكم ممكن تكونوا بعيد عنها ومش حاسين تكلفه علاج المرض الخبيث دا كام؟
المهم فعلا كل الشعب اتبرع للمستشفى بس مكنشى اجبار الاغلبيه اتبرعوا عن اقتناع
ثم ماتيجوا نفكر شويه لو الاعلان نزل دلوقتى احنا فى ايه ولا فى ايه؟
هيتبرعوا للمستشفى ولا لاسر الشهداء ولا للمشاريع الجديده ولا للاقتصاد ولا للمشؤوع القومى الجديد طيب فين نصيب الفقراء والايتام لازم نفكر مره واتنين وتلاته ونعرف الدنيا بدور ازاى من حولينا
وانا معاكى ياساره ممكن نزلاء برتو طره يخرجوا بعد ما يضحوا بالكبش بتاعهم طول ما معاهم شركة اتصالات جوه برتو طره وطول ما معاهم فلوس هيفتحوا لنفسيهم السكك
لكن كلنا بنبص لكدا طيب من غير فى نفسينا وفى بيتنا وفى اللى حولينا لو اتغيرنا بجد اللى جوه دول هيتحكموا صح وهناخد حقنا وهنحاسبهم
طول ما الناس متغيرتش من وجهه نظرى انهم يخرجوا احسن
كل واحد بيعلق مشاكله على الثوره لو عاوز يهرب من التزاماته يقول امال الثوره عملت ايه؟
ربنا معاكى يامصر
ساره مستواكى بيقل وانا مش متعود على كدا منك قوة مستواكى معتمد على الموضوع اللى بتختاريه واحساسك بيه
اتمنى ليكى الافضل

غير معرف يقول...

حلوة ياسارة
عندك حق فعلا للأسف شكلها هتبقى كده
وحشتنا الخواطر والاشعار الحلوة اللي تمس القلب
لو الهام مشيت خدي فايزة المهم تكتبي حاجات حلوة على طوووووول

غير معرف يقول...

ههههههههههه هو انتى معاكى حق ياساره بس اكيد هم ماسرقوش الفلوس دى كلها لان المستشفى شغاله وبتعالج ناس كتير ببلاش وعلاج الاورام مكلف جدا جدا يعنى ممكن يكونوا اخدو نسبه بس منها عشان القفه يبقى خفيف مانحسش بيه
وبعدين ليه بتتراجعى انتى امبارح اوحش من اول امبارح والنهارده اوحش ليه كده بس من غير زعل
بلبله

ساره جمعه يقول...

يا جماعه طبيعى ان المستوى يبقى متذبذب فى ناس بتحب الحاجات اللى بالعاميه وفى ناس بتحب الفصحى
وهكذا ... ولولا اختلاف الاذواق لبارت تدويناتى
ده غير انى بكتب كل يوم
فطبيعى انى اتعلم فيكو
شكرا لملاحيظكو الجميله
:)

دعوه للحب يقول...

دا مش مبرر حتى لو بتكتبى كل ساعه دورى على اللى جواكى مش فارقه بالعاميه ولا بالفصحى الاهم التعبير اللى بنحس بيه من جوانا

غير معرف يقول...

كده حرعل منك يا ساره المستشفى ده يتصرف على المريض الواحد الالوف وانا اشهد بكده لانى لمست ده بنفسى لما كنت بعالج ميدو هناك الله يرحمه
فاطمه