الأحد، 26 يونيو، 2011

كرتونه حياه


النهارده اشتريت ست كتاكيت
مولودين بقالهم كام يوم بس
لونهم اصفر وراسهم من فوق برتقانى
صغننين وشكلهم جميل اوى اوى
لما جبتهم حسيت انى شايله بيبى صغنن
طبعا  اول ما روحت بيهم البيت
بابا وماما قالولى انتى مجنونه والله
الناس خلاص اتأكدو انى مجنونه
هتحطيهم فين وتأكليهم ازاى
طبعا انا مسكتهم فى العلبه اللى اشتريتهم فيها
واحتست .. ومبقتش عارفه هعمل ايه  
مش عارفه انا ليه جبتهم
يمكن حسيت انى نفسى الاقى حاجه اهتم بيها
نفسى الاقى حد محتاجلى
نفسى احس انى براعى كائن حى
فيه روح الحياه بفطرتها
دورتلهم على كرتونه كبيره تكفيهم
وسألت خالتى أأكلهم ايه  -- لانها كان عندها كتكوت قبل كده
وعملتلهم اكل .. وحطتلهم ميه .. ووقفت اتفرج عليهم
حسيت ان الكرتونه الورق بقت مليانه حياه
اتكلمت معاهم وقلتلهم يخلو بالهم من بعض
ومحدش ياكل اكتر من حد علشان كلهم يعيشو
شكلهم كان  جميييييييل
مليانين حياه وحب وتفاؤل
صوتهم الصغنن جميل جدا .. وبرىء جدا
يارب ميموتوش ..
 علشان هزعل اوى  بجد

هناك 9 تعليقات:

EL pRiNcEssA يقول...

حلوين اوي
بس بعد اما يكبروا هتعملي فيهم ايه
لو عاوزة تربي كائن اليف
اشتري قطة صغيرة
هتحسسك بالحب والدفا بجد

Casper يقول...

جميل ان الانسان يهتم بالآخرين حتى وإن كانوا حيوانات فغالبا سيُخلصون لنا على النقيض من البشر

_________

بوست مختلف وفكرته راقية جدا
خالص تقديري لفكرك وقلمك

غير معرف يقول...

شكلهم حلو أوي بجد يا سارة
ربنا يسعدك دايما يا رب
تدوينة مختلفة فعلا
أماني

غير معرف يقول...

شكلهم جميل لما يكبرو ويبقو فراخ ابعتيلى واحده
بلبله

reham يقول...

نضفي الكرتونه علي طول عشان مايجلهمش حشرات وجيبي فيتامينات حطيهالهم في المياه او الاكل عشان يكبرو .وعرضيهم للشمس عشان عظامهم ماتضعفش ولازم درجه الحراره تكون 35 وتقل كل لما يكبرو

غير معرف يقول...

ربنا يخليهم للك وخلى بالك منهم علشان هما بيحسوا بالحب والحنان اكتر من البنى ادمين
فاطمه

AbDeLrHmAn SaMi يقول...

هههههههههههههههههههههه
طبعا لو حلفتلك بأيمانات الدنيا كلها اني عملت نفس الحركه من يومين مش هتصدقي
ههههههههههههههههههه

وبرضو نفس الاسباب بتاعتك :d

احييكي علي هذه التدوينه الرائعه

غير معرف يقول...

انت فعلا فاضيه اتسلى بيهم ولما يكبروا ابعتى لى الديك اللى فيهم عشان اعمل عليه ملوخيه مهى دى اخرتهم يافالحه كوكى

Sara يقول...

مجنونة انتي :P ما تعرفيش إن في أنفلونزا طيور ؟
هههه
بضحك معاكي
فعلا فكرة تربية كائن حي دي رائعة
بس صدقيني هتزعلي لو حصل ليهم حاجة
أنا مجرباها كتير =(
ربنا يخليهم ليكِ =)