الجمعة، 3 يونيو 2011

عيانه بيك


بجرى عالناس اللى منك
اللى شبهك
اللى زيك
واللى من دمك
اى حد بيعرفك
اى حد يعدى جنبك
كان فى يوم بينك وبينه
حوار طويل
فى اى حاجه
المعانى
والاغانى
وكل حاجه بتعجبك
 بلاقى نفسى بحبها
من غير سبب
نظرتك لاى حاجه
دى بقى ليها العجب
حتى ملامحك
مش بشوفها فيك انت بس
لا بشوفها فى كل حاجه
وكل حد
واى حد
حتى فيا فى المرايه
بشوفك انت
فى كل حته جوايا
الاماكن والبيوت
اللى عديت يوم عليها
وسبت فيها بصمه عينيك
الشوارع اللى خطيت انت فيها
فيها لمسه خطاويك
اى حاجه فيها ريحتك
اى حاجه تيجى منك
اى حاجه وكل حاجه  
حتى لو كلمه مكتوبه
بخط ايدك المنعكش
فى ورقه قديمه  بايشه
جوه اى  كتاب قديم
كافيه تخلى حياتى احلى
الصور اللى انت فيها
حتى وسط ناس كتيره
بتبقى كل الصوره
إنت
 كل حاجه واى حاجه
 بتبقى انت
علشان انت كل حاجه

هناك 24 تعليقًا:

Haytham Alsayes يقول...

تحفة بجد ياساره
معانيها وكلماتها و كل حاجة جمييييلة
ولو العيا كدة
انا عاوز اعيا


تحياتي :)

الشوكه الناعمه يقول...

ايه العيا الجميل ده تحفه يابت يا ساره
عجبتنى بجد

اسكندرانيه يقول...

شكرا يا هيثم بجد جدا
العيا ده متعب مش حلو علشان تتمناه
شكرا لمرورك :)

اسكندرانيه يقول...

مبسوطه انها عجبتك يا سمسم
شكرا يا جميل
:)

غير معرف يقول...

helwa awy oslobk bythassn bas kman ente konty tadary tktbeha ahla mn keda kaman

حَـبآيـۃْ.بـטּـدۉڷ يقول...

:)

جَمِيلَه بِجدْ يـآ سارهْ ..:)

البِـئرُ والظمّأْ يقول...

حلوه يا سارة
:)

أحمد عيسي يقول...

الله ينور...ايقاعها حلو قوي قوي
وتاخدك من اول سطر لاخر سطر
ببقي مبهور بالتدوينات اللي ايقاعها سريع
تحياتي

Mohamed Gabriel يقول...

الاماكن والبيوت
اللى عديت يوم عليها
وسبت فيها بصمه عينيك
الشوارع اللى خطيت انت فيها
فيها لمسه خطاويك

بجد جمييييييييييييلة اوى يا سارة واحلى حاجة ريتمها السريع بتشد الواحد يكمل معاها للنهاية
تحياتى ليكى
:))

اسكندرانيه يقول...

ربنا يخليكو بجد شكرا
مش عارفه اقولكو ايه على كلامكو اللى يرفع المعنويات ده
شكرااا

غير معرف يقول...

الخاطرة جميلة جدا بتبين جمال الذكرى الى انتى بتحكى عنها يا سارةلدرجة انى لما قريتها اتمنيت انى اكون انا صاحبة الذكرى الجميلة دى عند اى انسان
اختك رشا صلاح الدين

اسكندرانيه يقول...

يارب كل الناس تعيش سعيده يا رشا
وكل الناس تعيش حقيقه مش ذكرى كمان
شكرا لمرورك يا روشى

غير معرف يقول...

كل الناس يا سارة زى ما عندها حقيقة بتعيشها عندها كمان ذكريات سواء جميلة ولا مش جميلة بس المهم اننا نحاول نعيش الواقع بكل ما فيه ونخلى للذكريات جزء صغير جدا من مساحة تفكيرنا لانها عمرها ما هترجع تانى
اختك رشا صلاح الدين

غير معرف يقول...

تصور جميل للاحساس الداخلى واللى بتحسى بيه مع تمثيل بالاشياء الماديه بطريقه رائعه بس فى تعليق بسيط
كان من الممكن انك تكتبى احسن من كاد ويكون تعبيراتك اوضح من كدا ومترتبه اكتر لانك بجد مستواكى احلى من كدا مع ان ترتيبك هنا كويس بس فى احلى من كدا خلى احساسك هو اللى يتكلم وقلمك هو اللى يكتب متتحكميش فيه متقوليش ليه اكتب دا ودا لا خليه يكتب اللى بيحس بيه بكل حريه علشان تطلع احسن من كدا وانا متوقع انك هتكتبى احسن من كدا بكتير
جميل احساسك دا يا اسكندرانيه ربنا يكرمك ويوفقك يارب
عبده

اسكندرانيه يقول...

عندك حق يا رشا
ربنا يعينا كلنا يارب

اسكندرانيه يقول...

شكرا يا عبده
هاخد بالى حاضر من كومنتاتك
علشان الحاجات تطلع كويسه جدا بعد كده
:)

غير معرف يقول...

ربنا يشفيكى إذا كنتى حاسة إن دا مرض
EMAN KARKORA

Bent Men ElZaman Da !! يقول...

"الصور اللى انت فيها
حتى وسط ناس كتيره
بتبقى كل الصوره
إنت"

جميله اوووى
تسلم ايدك :))

غير معرف يقول...

ايه الكلام الكبير ده ياساره حقيقى حلوه قوى استمرى نحن ورائك
بلبله

اسكندرانيه يقول...

يارب يامامتى

اسكندرانيه يقول...

@ لبنت من الزمان ده
تسلمى ..شكرا لمرورك .. مبسوطه انها عجبتك

اسكندرانيه يقول...

بلبله يا منورانى ورافعه معنوياتى
شكرا تلمى

غير معرف يقول...

يعنى لازم تعرضى نفسك على دكتورمن دلوقتى قبل ما تتحطم احلامك على صخره الواقع فاطمه

اسكندرانيه يقول...

ما هى اتحطمت خلاص يا فطوووومه
بس برضه هعرض نفسى على دكتور