الجمعة، 10 يونيو، 2011

اربع سمكات وقطه



طبعا لأول وهله الاسم ينفع فيلم تجارى هابط
يقوم بتمثيله باقه من الفنانين الهابطين .. الى اقدر اسميهم دلوقتى فلول النظام او الثوره المضاده
بس لو اتكلمت بجد .. الاسم ده له معنى كبير
عندى انا طبعا
انا مكنتش بهتم باى كائنات حيه اخرى ولا بقتنع بالاهتمام بيهم  
مكنتش حاساهم كائنات حيه بجد زينا
لازم نخاف عليهم ونهتم بيه .. مكنتش بأذيهم بس مكنتش بهتم اصلا
كنت احب اشوف القطط وصحابى بيربوهم
السلاحف والسمك
الحاجات الظريفه دى اللى ممكن تعيش مع الانسان فى البيت
كان عندنا حوض سمك كبير فاضى بقاله سنين مفيهوش حاجه
ولان اختى الصغيره بتحب تربى سمك
جبنا سمك صغير ظريف
مات منه  واحده وجبنا غيرها
وهكذا
لحد ما بقى عندنا اربع سمكات فى الحوض
ماما بقى كل يوم تقولنا حد يأكل السمك
كلنا نكسل
وهى تأكلهم
هى اللى بتهتم بيهم وتنضفلهم الحوض وكل تفاصيلهم هى اللى بتعتنى بيها
بصراحه مع انى مقصره مع السمك جدا
الا ان اهتمام ماما بيهم ككائن حى خلانى استغرب
طبعا لازم نأكلهم وكل حاجه بس ادراكى ان فعلا ده روح
بيحس زينا بالظبط مكنش موجود قبل كده
نروح للقطه بقى
واحده صاحبتى عندها تلات قطط لسه مولودين
واحده منهم وقعت من البلكونه بس فضلت عايشه
صاحبتى كانتت هتتجنن  وراحت بيها للدكتور واشعه وادويه
ونفسيتها تعبت وكانت حالتها وحشه اوى – هى والقطه
اللى مشترك فى الحالتين ان السمك كله مات والقطه ماتت
السمك مات فجأه وكله مره واحده
والقطه ماتت بعد ما كانت تعبانه جدا
رد فعل ماما وصاحبتى تجاه الكائنات الحيه دى
غير نظرتى اصلا لاى كائن حى اخر غير البنى ادمين
غير ان الواحد بياخد ثواب لو اهتم بيهم
فكره التعامل والتأقلم مع وجود كائن حى مبيتكلمش
حسيت ان زى ما الكائن ده محتاج للانسان
الانسان كمان محتاجله جدا
لانه بجد بيغير فى طبيعته وانسانيته كتير اوى
انا مبسوطه بالاحساس الجديد اللى وصلتله
ياريت كلكو تربو اى كائن حى – اليف طبعا
:)

هناك 14 تعليقًا:

زوووو يقول...

فعلا يا سووو محتاجاه جدا
الله يرحمك يا كريكيت يا قطتى ويارب تكونى سامحتينى
تعرفى انى كنت بافكر انهاردة هل ممكن ربنا يجمعنى بيها لو دخلت الجنة واتمنتها ولا لا

جميلة يا سووو اووووووى
:)

غير معرف يقول...

حلوة يا سارة وتاثرت بيها فعلا خليتيني ادايق اني بخاف مالقطط بصراحة
في تقدم اكثر واكثر باذن الله

غير معرف يقول...

جمييييييييييلة وجدييييييييييدة
ربنا يوفقك

Bent Men ElZaman Da !! يقول...

اجمل حاجه يا ساره ان احساس مامتك وصاحبتك وصلك من الموقف ده وخلاكى تغيرك فكرتك
صعبه اوى ان حد يبقى مهتم بكائن حى شايفه قريب منه اوى كده ويموت
الانسان بطبعه بيتعلق بأى حاجه اتعود على وجودها فى حياته
تخيلى لو كمان كائن حى

reham يقول...

كلامك صح جدا
انا عندي قطه وسلحفاء بموووووووت فيهم :)

فتافيت يقول...

يااااااااااااااااه وجعتي قلبي بجد
انا بعشق القطط.. وعندي قطتي روحي فيها
مرة تعبت وكنت هاتجنن عشانها وجالي اتكئاب لحد ما خفت
ورغم اكتئابي الا ان اهتمامي بيها متاثرش
الكائنات الحية وخاصة الحيونات الاليفة حساسة جدا
جربي ربس قطة او هامستر او حتى ارنب
وشوفي هايحبك قد ايه.. ويحس بيكي وانتي طالعة السلم
ويشم رحتك من بعيد ويكون هايتجنن وتشليه
ولما نزعلي بيبكي معاكي.. ولما بتفرحي بيكون مظأطط
عجبتني التدوينة.. عشان انتي وصلتي
لخبرة جميلة اوي... لايـــــك :)

غير معرف يقول...

حلوه ياساره فكرتينى بننش الله يرحمها
بس ياريت ماتكونيش انتى اللى موتى الاربع سمكات بتوعكم
بلبله

اسكندرانيه يقول...

شكرا لييييكو كلكو على احساسكو
وكلامكو وتجاربكو
نورتووونى
:)

غير معرف يقول...

الموضوع مش ارتباط بالكائنات الحية دى لكن مسئوليتنا عنها لأنها زى طفل مش عارف يعبر عن نفسه إذا كان مريض أو جعان ويمكن يكون ربنا بيرحمنا ويرزقنا بيهم
Eman karkora

غير معرف يقول...

الانسان يحتاج لوجود كائن حى فى حياته غير البنى ادمين لان وجوده بيعلم الانسان الاحساس المرهف والرحمه مش فاكره يا ساره لما كان عندنا 11قطه كانوا جمال
فاطمه

اسكندرانيه يقول...

فعلا يا مامتى عندك حق

اسكندرانيه يقول...

اه يا فطوووم وكان خالو الله يرحمه بيسربهم
:)
انا نفسى اجيب قطه

خالد نور يقول...

مستمتع بما أقرأ

شكرا سارة

ممتن ليكي انا

:)

خالد نور يقول...

خاطر صغير سارة :

إحنا بنهتم بإحساس حيوان أليف صامت ومش بنهتم بإحساس إنسان لما يكون صامت رغم إن إهتمامنا بإحساس الإنسان أهم بكتيرر يا صديقتي

أكرر شكري وإمتناني سارة

:)