نزلت النهارده علشان اقابل واحده صاحبتى
وانا بعدى السكه عالبحر عند سان ستيفانو
والحته دى معروفه بانها مليانه حوادث
لقيت كل رصيف عليه اتنين عسكرى مرور
وواحد عند الاشاره
اول ما الاشاره تقفل
العسكرى يوقف العربيات خالص
العسكرى يوقف العربيات خالص
والناس تعدى من طريق المشاه المخطط ده
يااااااااااااه
الله .. دى البلد نضفت يا جدعان والله
كنت حاسه احساس رهيب بجد وانا بعدى
كان نفسى اجرى وانا مبسوطه
كان نفسى اجرى وانا مبسوطه
الشارع كان متنظم بطريقه تحفه بجد
ماشاء الله
دخلت سان ستيفانو وقابلت صاحبتى
اتكلمنا واتمشينا وكلنا وحلينا وجابتلى هديه
بتاعه عيد ميلادى.. متأخره اه .. هههههه ... بس كانت حلوه اوى
واحنا بنتمشى فى سان ستيفانو اذ فجأه عجبتنا اوى طرحه – ايشارب يعنى – فى محل
كان فعلا كأنه مرسوم عليه بالإيد .. لفت نظرنا جدا
وقفنا قدامه شويه
وبعدين قلنا نسأل على سعره
دخلت .. الراجل قالى ب 500 جنيه
والتانى ده بكام لو سمحت .. قالى ب 1500
قلتله 1500 ايه
قالى 1500 جنيه يا افندم
قلتله شكرا
ايه ده بقى اللى انا سمعته ده
ايشارب ب 1500 جنيه لييييه
واصلا كله قد كده .... صغير يعنى
امال باقى اللبس يبقى بكام بقى
يعنى الواحد يكون فى الشهر بيقبض كام مثلا
علشان يجيب الايشارب ابو 1500 جنيه ده
كده احنا عاوزين الحد الادنى للاجور 10 الاف جنيه
هى الناس دى مدركه ان فى ناس مش لاقيه تاكل
والله فى ناس مش لاقيه وجبه واحده فى اليوم
وفى اماكن فى مصر مش لاقيين يجيبو هدوم يسترو بيها نفسهم
مش ايشارب
طبعا لازم يكون فى طبقات فى المجتمع
ده شىء اساسى
بس كده فى فجوه رهيييييبه جدا بجد والله
هنقع فيها كلنا
بس فى حل ممكن نعمله
احنا ممكن نفرش الايشارب ابو 1500 جنيه تحت فى الفجوه
اهو نقع على حاجه حلوه برضه وغاليه
----------------
ملحوظه :: ده مش حقد طبقى والنعمه .. ده غيظ من السفه والتبذير
وعلى فكره الصوره المرفقه دى حقيقيه ومن مصر وبعد الثوره وسلملى على الفتره الانتقاليه
هناك 23 تعليقًا:
تييييت يعني اللي بيحصل دة
اساسا يعني في ناس مش لاقية 1500 جنيه كمرتب في وظيفة محترمة
دة بقي من بقايا نظام المخلوع المحروق باذن الله وعشان كدة لو فعلا عاوزين الثورة تنجح لازم نغير البلد دى
وزى ما طلعنا عشان عيش حرية عدالة اجتماعية لازم نلقيها علي الحقيقة عشان ميحصلش فوضي في البلد وربنا يسترها معانا جميعا
حلو ياساره البوست كالعادة
:))
تحياتي
قولهم والنبى يا هيثم احسن انا مرارتى اتفقعت خلاص
شكرا لمرورك
تسلم :)
لقد لمستى الواقع المرير الذى نعيشه فى كلامتك المليئه بالحزن والشجن رغم انك كنت مبسوطه جدا ولكن هذا هو حالنا فمنا من لم يجد قوت يومه ومنهم من لم يجد ما يغطوا به اجسادهم العاريه هذا هو حال الطبقات منهم من يصيف فى مارينا ليهرب من حراره الصيف ومنهم من ينحت فى الصخر تحت اشعه الشمس الحارقه ليطعم اطفاله الجياع يا من قلت حد ادنى للاجور انظر للفقراء والمحتاجين بعين العطف لنا الله يا مصر الحبيه سلمت يمناكى على كلامك الرائع استاذتى
كل سنة وانتي طيبة متأخرة مع الهدية
وللاسف 70% من الشعب المصري تحت خط الفقر ..والهوة الرأسماليه اللي صنعها النظام السابق مش حتنتهي في شهر ولا اتنين
وحشتني التفاصيل الصغيرة اللي بتتكتب في المدونات...
عايزه اقولك انا سالت من يييجي 3 سنين و سان ستيفانو على فستان سواريه قالي ب 3000 ومكنش يسوى اصلا
تقوليلي طرحه :D
يتهيالي كده المرتب مفروض يبقى 20 الف جنيه
بوست حلو
:)
والله الناس دى بتستعبط 1500 جنيه يعييش بيها اسره متوسطه الحال طول الشهر
ياسوسو المفروض كنتى اتصورتى جنب الايشارب ده وحطتيها جنب الصوره اللى فوق
بلبله
طبيعي جدا تلاقي الحاجات دي
مصر مش هتتغير بين يوم وليلة بعصاية سحرية
وكمان الراجل اللي بيبع الطرحة ب 1500 جنيه بيبيعها لأنه هيلاقي اللي هيشتريها منه
هو عرض و طلب
وواحد يا فندم بيدخله في الشهر مليون جنيه
هيصرفهم على ايه
تفاهات زي دي طبعا
يلا خير
محدش عارف الخير فين
ربنا يرحمنا و يعدي الفترة الانتقالية دي على خير و ربنا يرزقنا بحكومة محترمة بنت ناس
طبعا بأيدينا هنجيبها
^_^
وانت ايه اللى دخلك محل لعليه القوم لما موظف فى بنك ياخد25000جنيه ومتجوز زميلته فى البنك ميجبوش طرحه ب1500 جنيه هو ده التفاوت فى المرتبات علىفكره انا بشتغل بقالى 20سنه مرتبى موصلش 1000جنيه يعنى اعمل جمعيه علشان اجيب الطرحه دى فاطمه
والله الواحد مش عارف يضحك ولا يزعل :(
الصورة صعبة اوي
لكن ورغم ذلك..ومع ذلك..
انا مقتنعة ان الحاجات ديه هفكر اشتريها لما اسرق بنك الاول..ديه الحالة الوحيدة :D
قال طرحة قال...
@ استاذ حمدى دنقل
عندك حق فى كلامك فعلا
لنا الله
شكرا على مرورك وكلامك ... تسلم
@ استاذ احمد عيسى
وحضرتك بالصحه والسلامه
تابع المدونه كل يوم وحضرتكم تلاقى كل التفاصيل
شكرا لمرورك :)
@ البئر والظمأ
على رأيثك والله
ربنا يستر على اللى جاى
انتى احلى .. شكرا لمرورك يا جميل
تصدقى يابلبله عندك حق والله
فاتتنى دى ومتصورتش جنب الايشارب
بس ملحوقه فى اى وقت اروح اتصور هلاقيه زى ما هو
هههههههههههه
@ فتحى ابو الفتوح
انا عارفه ان طبيعى يكون فى كده انا اللى مدايقنى وجود الفجوه الرهيبه جدا فى المجتمع
وربنا يستر يارب
يافاطمه يا حبيبتى حتى موظفه البنك دى لما تجيب طرحه ب1500 جنيه يبقى باقى اللبس بكام؟؟
وفى ناس مش لاقيه اصلا تاااااااااااكل يا جودعان
@ طالبه مقهوره
اضحكى يا بنتى
لما تيجى تسرقى البنك ابقى قوليلى علشان اجى معاكى
:))
المحلات دى كانت معمولة يشترى منها الناس اللى بتسافر تعمل شوبينج وال1500 جنية تمن الإيشارب وجزء من تمن التذكرة
Eman karkora
يسافرو احسن بدل ما يفقعولنا المراره والله يا مامتى
لما يكون الايشارب للبنات 1500 جنيه امال شراب الشباب بكام 1000 جنيه يبقى باقى الطقم بكام يعنى الواحد يشتغل سنه علشان يشترى طقم كامل ليييييييييه هو مصنوع من ايه ؟ ربنا يسامحهم ويحرقهم مكان ما يكونوا هما اللى عملوا فينا كدا وخلوا الفجوه توسع جدا ربنا يرحمنا برحمته وانت مش اشترتيه ليه ياساسو انت فقيره يابنتى انت مرتبك فى الشهر ربع مليون جنيه ولا ناسيه المليار اللى سابه ليكى احمد عز ولا نص مليار اللى بعتته ليكى ماما سوزان فى عيد ميلاك ولا جدو حسنى فين المليارات دى كلها اعملى حسابك هبلغ عنك النائب العام ههههههههه خير ربنا موجود
متروحيش هناك تانى لتنصابى باحباط دول ناس مش من مصر دول من دوله تانيه
عوبد
أيوة .. :)
في محلات في مصر معمولة لناس معينة أوي :)
زي كل حتة ..
و في ناس ممكن تدفع فعلا ألف و خمسميت جنيه عشان يحلفوا إنه بألف و خمسميت جنيه :)
والله دي مهزلة فعلا ربنا يرحمنا برحمته
المفروض الحكومة تاخد من الناس اللي بتشتري الحاجات الخيالية دي وتدي الفقرا اللي مش لاقيين ياكلو حتى ...فعلا حسبنا الله ونعم الوكيل
وبالنسبة للصورة انا عندي امل كبي في ربا قبل اي حد ان بلدنا هتبقى كويسة واحسن بكتييير باذن الله
اعتقد يا سارة باننا لا زلنا نمر بالفترة الانتقالية بعد الثورة . اعتقد بان هذه الفجوة لن تنتهى فى يوم وليلة ولا حتى بمرور عدة اشهر بل ستاخذ مدة تتراوح من ثلاث لخمس سنوات لتبدا فى التلاشى . واعتقد بان جيلنا نحن هو من سيتحمل تبعات هذه الفترة .
اختك رشا صلاح الدين
إرسال تعليق