ركبت المشروع بعد يوم مرهق جدا
ولفت نظرى الهدوء الغريب اللى موجود فى المشروع
قلت الحمد لله طبعا
وسندت راسى على الشباك ....والهوا بيخبط فى وشى – وسرحت بقى
ايه الجو التحفه ده
الناس قاعده ساكته
اللى نايم واللى متنح
الناس شكلها غريب جدا
بس احلى حاجه انهم هاديين على غير العاده
المهم كان فى بنت وولد قاعدين جنب بعض
وواضح انهم ان ريلاشن شيب ويز بعضيهم
مرتبطييين يعنى
شكلهم صغير جدا
المهم ركب شاب وقعد جنبهم
شويه صغيرين ولقيت الشاب ده بيقول للواد الحبيب ده ماتلم نفسك بقى
انا طبعا فوقت وقولت اوبااااااااااااا
ايه اللى بيحصل بقى
ماتلم نفسك ... انت راكب مواصلات مش قاد فى بيتكو
ايه قله الادب دى
ايه يا اسطى انت ازاى تركب ناس معاك كده
ايه اللى بيحصل ده
الواد الحبيب طبعا زعق
وانت مالك ياعم هو انا كلمتك
ومسكو فى خناق بعض
والموضوع وصل لضرب
والسواق نزل يسلك بينهم
والشاب يقوله عيب عليك .. فى ناس راكبه
والواد الحبيب معلق على كلمه واحده
خطيبتشى ياعم
خطيبتشى ياعم
خبطوك فى حيطه يابعيد
المهم الناس سلكت بينهم
راحت البنت قالت للسواق على جنب ونزلت
والواد الحبيب ده نزل وراها
احلى حاجه ان شكلهم ميجيش 16 سنه
لسه فى ثانوى مثلا
طبعا الناس قعدت تقول للشاب ده ربنا يكتر من امثالك
ربنا يحميك
هو طبعا زى الفل ومحبش يشوف حاجه غلط بتحصل
بس انا عاوزه اقول للواد الحبيب ده حاجه مهمه
ان الاخت اللى كانت معاه مش بس لو كانت خطيبتشه
حتى لو مراته
فعيب اوى كده
عيب اوى اوى
مع انى مش عارفه هو عمل ايه
وكنت هموت واعرف
بس برضه عيب
انا كنت هقترح على السواق
انه يتأكد ان اللى هيركبو معاه مش ان ريلاشن شيب ويز اى حد
علشان يبقى فى السليم
علشان يبقى فى السليم
وربنا يستر على ولايانا
:)
هناك 37 تعليقًا:
ههههههههههه
يا عم حصل خير
طبعا بعيد عن الحريات الشخصية
نيجي بقي لأخلاقيات المجتمع عايز تعديل
في تعديل بالقانون وفي تعديل من الناس
تعديل القانون ملوش لازمه لو الناس مبتفعلوش
أنا بختلف مع الليبرالية يمكن في النقطة دي
إن الحريات لو تعارضت مع الأخلاقيات يبقي هنا مأصبحتش حرية أصبحت تعدي علي حق الله قبل الجميع .
وحته لو كانت خطيبته كان زمانه خاف عليها من أي كلمة
الوضع الاخلاقى فعلا بقى مزرى
ايه مزرى دى ههههههههههههه
فعلا بقى سىء جدا
الا من رحم ربى طبعا
الموضوع عاوز ثوره داخليه جوه كل حد فينا
وربنا يتسر على ولايانا برضه
ههههههههههه
يا ا ا سيدي شباب مع بعتشيهم :))
الصراحة بجد أد ما الموضوع ده ضحكني بس شفته ياما ف الموصالات بجد مهازل مش قادر اقولك ، بس ده كان أيام جامعة القاهرة ، بعد ما حولت لحلوان دخلت لعالم المترو الوقور لدرجة ان لو بقا متاح ليا ارجع جامعة القاهرة مش هرجعها مخصوص عشان القرف ده مع انها اقربلي...
و ربنا يستر علي ولايانا :))
ههههههههههههههههههههه
ربنا يستر علي ولايانا
وبعدين نسيب الملك للمالك واحنا مالنا احنا
طبعا بهزر ومينفعش اساسا وزى ماقلتي كدةاحنا عاوزين حاجة تغيرنا من جوة وربنا يستر فعلا علي ولايانا
جميل البوست :)
استمري
ايه كبت الحريات ده
مالهومش حق
بس انا هموت واعرف كانوا بيعملوا ايه
:)
بدايه جميله يا ساره
@ elmostafez
عندك حق فعلا الموضوع منتشر
بس محدش بيعترض او يقول ايه ده
الفكره كلها ان حد اتكلم وقال ميصحش كده
@haytham
شكرا يا هيثم جدااااااااا
هستمر متقلقش وهزهقكو
كل يوم من ده
@ الشوكه الناعمه
انا كمان هموت واعرف والنبى يا اختى
لما اعرف هقولك متقلقيش
:))
جامدة ياسارة وربنا يستر على ولايانا حلوة اوى
شكرا يا بوب
يارب يا اوختشى
أنا حموت وأعرف كانوا بيعملوا إيه ؟؟
وانا حموت واعرف انت مين
ههههههههههههههه
بتحصل كتير :D وطبعا الأجابة الجاهزة دى خطبتى .. :D بداية موفقة ان شاء الله فى الحملة
فعلا ده حقيقى
شكرا يا احمد :)
شكرااااا سارة ربنا معاكي كملي
اسلوبك لذيذ يا ساره مستنيه اقرأ ليكي كتير
وان شاء الله اكتب عن تجربتي في المشروع برده ده الواحد بيشوف كتييييييييييييير :D
شكرا جدا بس اللى يعمل كومنت يقولى هو مين بالله عليكو
حتى لو غير معرف
بس يقولى تحت هو مين
شكرا ليكى يا ريهام
احنا هنقطع على بعض من اولها كده
نورتينى يا جميل
تابعينى بقى باقى الشهر
انا فى الاول عندى سؤال : ما هو المشروع ؟؟؟
ثانيا معتقدش انهم عملوا حاجة تستاهل كل ده
بصى فى حرية شخصية بس فى اداب عامة
بس ممكن اصلا يكون التانى اللى اتخانق شافهم ماسكيين ايد بعض مثلا فمش عاجبه و عمل فيها شهم او خد باله ان الاتنين راكبين مع بعض فحب يعمل فتك
فى مصر بالذات متقدريش تعرفى الاسباب اللى تخلى اى حد يعمل اى حاجة
قريت الكومينت اللي فات
لسه عن قريب عارفة ان المشروع ده يعني الميكروباص :D
حسيت اني توصلت لفكرة هتقلب تاريخ البشرية..هقلب اسكندراني يا جودعااااااااان :)
انا لو في يوم فكرت اعمل مشروع واشتري مشروع( وده مستحيل) فانا هاخد بطاقة كل اللي يركب زي اللجان الشعبية كده..وهحط بين كل اتنين واحد ميعرفهومش..ايه مشروعي وانا حرة :D
بجد شكرا عشان ضحكتيني وخرجتيني م المود
حلوه قوى بس هااموت واعرف كانو بيعملو ايه
اكيد اللى مايعرفوش المشروع دول مش اسكندرانيه
@اغانى الشتاء
المشروع هو الميكروباص
بس فى اسكندريه بنقول مشروع
وبعدين من امتى حد بيعهمل خناقه علشان حد ماسك ايد حد
للاسف ده بقى العادى اصلا
الموضوع كان اكبر من كده بكتير
الموضوع كان فيه خدش للحياء العام
@ طالبه مقهوره
تنورى الاسكندرانيه
والفكره بتاعتك تحفه جدا
يلا ننفذها سوا
:)
@ غير معرف
شكرا يا بلبله
ما خلاص بقى لازم تعرفى يعنى ربك حليم ستار ياستى
:)
استمرى ياساره احنا وراكى
بلبله
طول ما انتو ورايا مش هعرف ارجع
هههههههههه
خليكو بقى ورايا على طول ارجوكو
الله ينور بس ده الطبيعى علشان مفيش دين ولا تربيه
على فكره انا فاطمه
شكرا يا فطووووم
فعلا مبقاش فى دين صح ولا تربيه صح
ربنا يستر على ولايانا دى بتفكرنى بالست النمامة ف الأفلام القديمة وعموما ربنا يستر علينا كلنا
يااااااارب :)
:)
حملة التدوين اليومي دي فاجأتني بمدونات كتيرة جدا جدا :)
مبسوطة اوي انا :)
جميله ياساره جدا اجمل ما فى المدونه انك بتتحدثى عن الواقع اللى حواليكى وفعلا الموضوع اللى عرضتيه انهارده انتشر بشكل مخيف لدرجه وللاسف ان البنت بتقبل دا حصل مره فى المشروع (الميكروباص) وانا مسافر ولقيته بالنسبالها عادى قلت ممكن يكون خطيبها او جوزها لقيته نزل قبلهم سألتها قلتلها هو يقربلك قالت لا ليه؟ ووشها احمر واصفر قلتلها خلاص . لانى فهمت
لو كل بنت حافظ على نفسها بجد حتى لو جوزها مينفعش ان دا يحصل فى الطريق العام حفاظا على كرامتها امال بقى خطيبها اللى ملهوش حق فى الاسلام انه يلمسها ربنا يعافينا ويحمى بنات المسلمين لمستى جرح جوايا ياساره كان عمال ينزف من اللى بشوف بينتشر فى مصر
جميله بجد ربنا يوفقك وللامام
وانا كمان مبسوطه اوى اوى بجد
شكرا يا شيماء
وعاوزه واحد قهوه بالفانيليا هدخل عندك اشربه بقى
:)
شكراااااا جدا على كلامك بجد
فعلا الموضوع بقى صعب وكتير وميصحش وحرام
وللاسف فى ناس كتير مش عارفه ده وفى ناس عارفه ده وبتحاول تعمل نفسها مش واخده بالها
شكرا على كلامك جدا
بس عاوزه اعرف ميييين بقى ؟؟
كنت بحسبك هتعرفينى من كلامى
وفى كلام كتير ومواضيع اكتر ومواقف اكتر واكتر قبلتنى بالشكل دا للاسف ربنا يعافينا وربنا معاكى يااسكندرانيه
عوبد
إرسال تعليق