اخر العنقود

زى ما بيقولو دايما اخر العنقود .. سكر معقود
دى اخر تدوينه ليا فى شهر يونيو
كل الناس لما بدأت الحمله
اول تدوينه كتبوها
كانت كلها بتتلخص فى موضوع مهم
احنا هنكتب ايه طول شهر بحاله
هنجيب منين مواضيع نكتبها طول الشهر
وهنكتب امتى وهنلاقى وقت ولا لا
وناس انسحبت بعد كام يوم وناس كتبت يوم ويوم لا
انا بقى عايزه اكتب فى اخر يوم ليا فى حمله دوّن
الف شكر لريهام مقترحه الحمله وصاحبه الايفنت
شكرا لكل المدونين اللى شاركونى برأيهم
شكرا لكل الناس اللى قرتلى واهتمت وتابعت واستنت معاد التدوينه
شكرا لكل حد عجبه كلامى او انتقدنى علشان يوصلنى للاحسن
انا بدأت اكتب من سنه ونص بس
بس النهارده انا حاسه انى بكتب من زماااااان اوى
مبسوطه بانغماسى فى عالم التدوين
اتعلمت حاجات كتير اوى
ولسه بتعلم اكتر
مدونتى هتنزل مسابقه
مشروع كتاب المائه تدوينه
وهاختار تلات تدوينات ليا  وانزلهم فى المسابقه
وهيتم التصويت على كل التدوينات
حبيت فى اخر تدوينه ليا  اتكلم عن الحمله والشهر كله
يارب دايما متجمعين فى التدوين
:)

خالد سعيد بكره يا يعيش يا يموت

بكره جلسه النطق بالحكم فى قضيه مقتل خالد سعيد
مات بقاله سنه وشهر تقريبا ولسه متحكمش على اللى قتلوه 
 خالد كان فتيل الثوره
وكان سبب كبير جدا فاللى حصل
كان القشه اللى قسمت ظهرنا كلنا
نزلنا وقفات كتير علشان نطالب بحقه وحق كل حد اتظلم من الشرطه 
وقانون الطوارىء والقرف اللى كان مالى البلد
ومع حاجات كتيييير تانيه
حتى بعد الثوره وبعد ما قلنا خلاص كل حاجه هتبقى صح
والحق هيرجع لصحابه 
لقينا برضه ان الحق بيتاخد من صحابه
يعنى ايه قاتل يتساب حر
يعنى ايه واحد ضيع حياه شباب كتير يعيش كده من غير اى مشاكل
يعنى ايه قضيه قتل تتأجل سنه
يعنى ايه
القضاء المفروض انه اعدل حاجه بتجيب للناس حقوقها 
لما يبقى فيه الاستهتار الرهيب ده  يبقى ايه 
الشهدا اللى ماتو فى الثوره
فين اللى قتلهم ... فين اللى امر بقتلهم ...بيصيف فين ولا هرب على انهى بلد
المصابين الكتير جدا جدا ... عايشين بيتعذبو .. واللى عمل فيهم كده عايش حياته
احنا عايزين الحق والعدل
مينفعش نسكت على الحق والعدل واحنا نقدر نجيبهم
لان ربنا هيحاسبنا
مينفعش اللى قتلو خالد سعيد يطلعو براءه
مينفعش

هـــذيان

تدور الارض ولكنى اشعر بها متوقفه
اجرى عليها بكل قوتى
لأوهم نفسى انها تتحرك
اتمنى ان اقفز من عليها
اطير مع الطيور
 او اغوص فى عمق البحر مع الاسماك
اخرج من دائره المجره الكونيه 
اغمض عينى واشعر براحه الفراغ
راحه اللا شىء
اشعر انى مكبله .. مقيده 
بقيود من حديد .. لا استطيع التغلب عليها
استنزفت كل ما لدى من قدره
على اى شىء
ولم اصل
وقفت
لا اعرف اين انا ولا الى اين ذاهبه
فقدت نعمه الادراك
تبا لهذا الاحساس اللعين
عندما تدرك انك  اصبحت لا تدرك
او تدرك انك فى قمه ادراكك ولذلك لا تدرك
يتعقد كل شىء
لا تعرف كيف تختار 
او تفكر
 او تصل الى اى حل او قرار
كل ما تفعله ان تهزى ببعض الكلمات
التى تجعلك تبدو مثل بقيه البشر
الى ان يقضى الله امرا كان مفعولا 

فنَـــاء الإدراك

هل كنت أعلم

يوم بدأت أدرك الحياه
ما يجب وما لا يجب
كنت ورقه بيضاء
إما ان تكتب فيها كتابه منظمه
او تملأها خطوطا سوداء

او تقطعها ..
اى شخص موجود فى حياتى 
علمنى شيئا

بكلمه او بفعل
نعم .. فالافعال تعلم اكثر من الكلمات
كيف تكون شخصا مؤثرا فى حياتى

وتلومنى على فشلى 
وانت من ساهم فى ذلك

والأكبر

أن اسامحك على مساهمتك فى فشلى
ولا تسامحنى على فشلى
كيف يكون ذلك !!.

انا

كتله من المشاعر والاحاسيس

انساان
أمتلىء حبا لكل شىء حولى
 روحى تشع  بالحياه
امتلك العالم كله عند فرحى
ويمتلكنى هو عند حزنى
امتلكه ويمتكلنى يوميا

مئات المرات
ولا اعرف

 من سينتصر فى النهايه  

وجعى ..

يعنى خروج جزء من روحى
سقوط قطعه من مشاعرى
فى بئر عميييييق
افقد شيئا ما كلما احزن

افقد طمأنينه

 وحب
وثقه

افقدنى انا تدريجيا
وامتلىء خوفا

وزهدا فى الحياه

اتمنى ان افقد القدره

على الحزن ذاته
اشعر أنى افنَىَ يوما بعد الاخر
حتى سيأتى يوم
اموت فيه

وانا على قيد الحياه  

كرتونه حياه

النهارده اشتريت ست كتاكيت
مولودين بقالهم كام يوم بس

لونهم اصفر وراسهم من فوق برتقانى
صغننين وشكلهم جميل اوى اوى

لما جبتهم حسيت انى شايله بيبى صغنن
طبعا  اول ما روحت بيهم البيت
بابا وماما قالولى انتى مجنونه والله
الناس خلاص اتأكدو انى مجنونه
هتحطيهم فين وتأكليهم ازاى
طبعا انا مسكتهم فى العلبه اللى اشتريتهم فيها
واحتست .. ومبقتش عارفه هعمل ايه  
مش عارفه انا ليه جبتهم
يمكن حسيت انى نفسى الاقى حاجه اهتم بيها

نفسى الاقى حد محتاجلى
نفسى احس انى براعى كائن حى
فيه روح الحياه بفطرتها
دورتلهم على كرتونه كبيره تكفيهم
وسألت خالتى أأكلهم ايه  -- لانها كان عندها كتكوت قبل كده
وعملتلهم اكل .. وحطتلهم ميه .. ووقفت اتفرج عليهم
حسيت ان الكرتونه الورق بقت مليانه حياه
اتكلمت معاهم وقلتلهم يخلو بالهم من بعض
ومحدش ياكل اكتر من حد علشان كلهم يعيشو
شكلهم كان  جميييييييل
مليانين حياه وحب وتفاؤل
صوتهم الصغنن جميل جدا .. وبرىء جدا
يارب ميموتوش ..

 علشان هزعل اوى  بجد

انهيـــار

لحظه

رأيتك وقتها مثلهم

ترتدى قناعا

يرعبنى

توقف الزمن

دارت بى الارض

 تمنيت وقتها ان

 اتعلق فى رقبتك

ابكى

واترجاك بكل ما املك من قوه

أن تكف

لا تكن كذلك

 لا تكن مثلهم

أرجوك

لا تشوه صورتك

 استقر صوتى داخلى

 تجمدت فى مكانى

 انهرت داخليا

هى لحظه

بحساب الزمن

لحظه..

كفيله وقادره

على انهاء

اى شىء

وكل شىء

لحظه ..

 تصطدم فيها بواقع

قادر على ان يجعل

 احلامك

ومبادئك وطموحاتك

تنهار كليا

اصبحت الان

مجردا من كل الاحاسيس

سواه هو فقط

أبشع احساس مر عليك

 أن تجد نفسك ضالا

لا تعرف الطريق

لا تعرف سوى انك لا تعرف اى شىء

 تختلط عليك الامور

 تسير فى طريق طويل مظلم

 فى عقلك الف سؤال

تبحث عن شخص

 يساعدك.. يحتضنك
يحتويك.. يخلصك

من كل مشاعرك السلبيه

يعيد لك اتزانك

يعيد لك ايمانك بمعتقداتك

 يجعلك اكثر قوه

 يلملم اجزائك المنهاره

ويرممها

 يتقاسم معك ما انت فيه

 او يحمله عنك

 تتوحد بروحك

تجلس فى ركن بعيد

فى محاوله منك

 للهروب من نفسك

 تنكمش

مسندا راسك على ركبتيك

تغمض عينك

فى محاوله للنوم

 ولكنك لا تنام

 فأنت لا تستطيع

ان تنام بعد الان

لأن اجزاءك المنهاره

مستيقظه للابد ...

قطن اسود

ساعات الواحد مبيبقاش عارف هو بيعمل ايه
وساعات بيبقى عارف هو بيعمل ايه ورايح فين
وساعات بيبقى عارف انه رايح فى حته غلط ومع ذلك بيكمل
لما تجيب قطن ابيض نضيف
وتحطه جنب مدخنه عماله تطلع هباب وزفت 
ما هو طبيعى القطن هيبقى اسود
وتبقى اهبل معلش يعنى لو تخيلت انه هيفضل ابيض
المشكله دلوقتى فيك انت 
انت اللى جيت وحطيت القطن ولا هو راح لوحده
ده المكان الطبيعى للهباب .. 
هو اه احيانا كتير بيكون الهباب نتيجه لتصنيع حاجه مفيده
بس انت متروحش لمكان التخلص من عوادم تصنيع الحاجه المفيده 
وتبقى عاوز تستفيد
اكيد مش هيحصل
انت اللى غلطان
كان لازم تاخد بالك ومتحطش القطن فى مكان زى ده
وحتى لو مقدرتش تعمل كده ورحت وحطيت القطن
مينفعش تشوفه لونه بيتغير وتسيبه
لازم تشيله قبل ما يبقى اسود
وميبقاش ليه اى لازمه ولا اى قيمه
لان قيمته فيه وهو ابيض
-----------------------------
يارب حد يفهمنى

جلد بيلمع

بيت قديم .. اول ما تدخل ..

 تشم ريحه الحياه .. ريحه عيش ..

ريحه حب ..كل بيت فيه فرن ..

 كل بيت ريحته حلوه .. كل بيت ريحته حياه
بيت جدتى .. سقف عالى ..

 ناس كتير .. بس البيت مكفى ..
فاكره زمان ..وانا صغيره ..
يوم العيد الصبح .. اول ما نروح بيت العيله
اقعد جنب جدتى ..
واقولها بصى .. بابا ادانى عيديه ..
ماما تبصلى .. وتقولى بنت عيب
بس انا مش بيهمنى .. اه بصراحه عاوزاها تدينى عيديه

تقولى روحى هاتى شنطتى من الدولاب

لما كنت فى اولى ابتدائى كانت بتدينى خمسه جنيه

كنت بفرح بيهم جداااا

دولاب جدتى .. ريحته .. شكله.. صوته وهو بيتفتح ويتقفل
مش قادره انساه
شنطه جدتى
سودا جلد بتلمع .. شنطه من بتوع السبعينات دى
الشنطه لوحدها كان ليها ريحه عبقريه
الظاهر انى كنت بشم شنط وانا صغيره
اجرى عليها بالشنطه .. وانسى اقفل الدولاب
تقولى قفلتى الدولاب .. اقولها لا .. مش انا هرجع الشنطه تانى
تقولى لا ..خليها علشان ادى العيديه لولاد عماتك
اول ما اخد العيديه اديلها حضن وبوسه .. لا بوستين
واروح بقى احط الفلوس على بعضها
واقول لبابا عاوزه اتمرجح
هى دى الحاجه الوحيده اللى كنت بعملها فى الشارع
كان امنيتى وانا طفله انى العب فى الشارع
معرفش ليه كان عيب .. ومينفعش
كنت بستنى العيد علشان بابا ياخدنى يمرجحنى
واشترى حاجات حلوه .. وارجع البيت تانى
العيد كان يعنى شنطه ضغننه اوى يادوبك تكفى العيديه
وخناقه كل عيد
ادى الفلوس لماما علشان متضيعش منك
وانا مرضاش
يااااااااااااه .. كانت ايام جميله  اوى
البيت واللمه والجو
وجدتى .. الله يرحمها 

أنت .. الحياه

لا أتذكر ما مضى من تفاصيل
قبل أن اعرفك
احيانا اشعر انى مثلك
نصفك
شىء ينقصك
واحيانا اخرى اشعر انى
 طفلتك المدللَه
التى تتعلم منك
وتخطو خطواتها ممسكه بك
ليست خائفه من شىء
تدعى فقط خوفها
لتظل ممسكه بك
خوفا عليك
اشعر انى اسمعك
عندما تكون صامتا
اسمع صوت افكارك
اسمع احساسك
واحيانا اشعر انى
 قرينك الروحى
توأمك
اشعر بما ستفعله
قبل ان تفعله
وافرح بشده
عندما اجدك تفعله
لأنى عندها اشعر
انى  انا
انت
 مشبعه بك
لأقصى حد
فى كل تفاصيلى ..
اجدُك
أراك فارس هذا الزمان
اؤمن بك وبقدراتك
اكثر من ايمانك بها
أرى بك اشيائا
لا يراها احد غيرى
ليس لأنى احبك
لكن
لأن هذه الاشياء
لا يراها الا من
يرى روحك بعمق
متأثره بك حتى النخاع
اعرفك منذ بدأت أدرك الحياه
فأنت الحياه 

الإراده الكونيه وغباء الانسان

ساعات نلاقى حد بيقول لحد تانى
ده انت ربنا بعتك ليا فى الوقت المناسب
حسب دراسه علميه تقريبا

او حتى مش دراسه انا مش فاكره 

 بس هو كلام منطقى جدا بصراحه

ان الناس بتدخل فى حياه الناس  لتلات اسباب 

ياإما بيكونو   FOR A REASON  يعنى لسبب
ياإما بيكونو     FOR A SEASON  لموسم او فتره
ياإما بيكونو   FOR A LIFE TIME   طول العمر
يعنى فى ناس ممكن تدخل حياتك لسبب
ربنا ممكن يبعتلك حد يساعدك فى حاجه معينه مكنتش عارف تعملها

او تبقى فى ازمه وحد يقف جنبك ويساعدك عالخروج من الازمه دى
مينفعش انت ساعتها بمخك الصغير تحول وجوده ل SEASON  يعنى لوقت اطول
مينفعش اللى موجود لسبب فى حياتنا نبقى عاوزين نخليه شويه زياده

ولما يخلصو الشويه الزياده نبقى عاوزينه اكتر

ما هو ممكن ناس تظهر فى حياتك فى فتره معينه فى عمرك

شهرين تلاته او سنه سنتين  مش اكتر من كده

برضه بيبقى ليها سبب وليهم دور  بس مده وجودهم فى حياتك اطول
ودول برضه مينفعش نحاول نخليهم غصب عنهم وعننا

فى منطقه ال LIFE TIME
ودى المنطقه اللى بيبقى موجود الناس اللى زى اهلك واولادك وبعض أصحابك

ناس موجوده طول حياتها معاك
مينفعش نحاول نغير الاراده الكونيه

 لاننا ساعتها بنعمل خلل فى الطبيعه البشريه 

 بيضرنا احنا فى الاخر
زى بالظبط لما بنت وشاب يعرفو بعض

 ويحبو فى قصه حب ويبقو ان ريلاشن شيب مع بعض
وفى الاخر ميتجوزوش
اصل ربنا كاتب من قبل ما نتولد مين الشخص اللى اى حد هيتجوزه

لما كل الناس بقت بتحاول تغير الاراده الكونيه

وبقينا نعند مع قدر ربنا

وكل حد ياخد حاجه بتاعه حد تانى

 والبنت دى ترتبط بالولد اللى فى الاخر مكتوب لواحده تانيه

والولد ده يرتبط ب تلاتين بنت قبل ما يتجوز
كل ده بيبوظ النظام اللى ربنا خلقه

وبيخلى  الحاجات الصح تبقى ابعد
يعنى احنا السبب فى الكوارث اللى احنا فيها

من الاخر ..

كل القرف اللى احنا فيه سببه احنا
علشان بنحاول نغير المشيئه اللى ربنا كاتبهلنا

لازم نثق فى مشيئه ربنا

ونثق ان فيها الخير لينا

 لازم نثق فى قدره واختيار ربنا
وبعدها نثق فى نفسنا 

كلاكيت تانى مره .. شكر خاص لرشا انور  :)


الفيديو ده تحفه يستحق المشاهده 
http://www.youtube.com/watch?v=bLltt5cPDOc

تنقذنا الأبواب احيانا

صوت طرقات على الباب
نائمه هى .. لا تستطيع التمييز اذا كان الصوت حقيقيا ام فى احلامها

ولكنها استيقظت تهرع ناحيه الباب بعد ان اكتشفت انه حقيقى
تذكرت انها بملابس النوم .. ولا تستطيع ان تفتح هكذا
ارتدت شيئا فوق ثيابها بسرعه .. وضعت ايشارب على رأسها
نظرت من العين السحريه .. وجدت رجلا يعطيها ظهره
لم تميز من هو .. خافت ان تفتح فى البدايه.. وظلت تنظر من وراء الباب
استدار ليطرق الباب مره اخرى
فرأت وجهه
مستحيل ..

هزت رأسها حلم ام حقيقه ما هى فيه

 أهو فعلا أمام باب بيتها
ماذا عليها ان تفعل .. اتفتح له ..

لكنه ماذا يريد
 تذكرت انها وحدها .. لا يوجد احد معها
قررت ان لا تفتح الباب
طرق الباب مره اخرى وعندما لم يجد استجابه قرر ان لن يكررها

اخرج ورقه وقلم وبدأ يكتب شيئا
كل هذا وهى خلف الباب
استنفذت كل ما بجسمها من ادرينالين وسيراتونين

ماذا اتى به الى هنا

وهل ما زال يتذكرها بعد كل هذه السنين
صدمتها جعلتها لا تستطيع التصرف
غالبا بعد ان يمضى ستكتشف انها كان من الممكن ان تتصرف تصرفا اخر

لكنها وفى هذه اللحظه لا تعرف ماذا تفعل

كل ما تعرفه انها لا تعرف اى شىء
بعد ان انتهى من كتابه الورقه
ادخلها من تحت الباب .. ومضى
نظرت للورقه على الارض وكأنها تحولت للوح من الثلج
لا تقوى على الحركه
مرت ثوان ولكنها كساعات

التقطت الورقه .. فتحتها
وجدت جملتين فقط
اشعر أنك ِ خلف الباب مصدومه من وجودى هنا
 لكنى علمت انى مريض بمرض خطير و اريد رؤيتك قبل ان اموت 

فوبيا الموت

قالت لى صديقه يوما ان جدتها قبل ان تموت بثوان قالت لهم من هذا الذى يدخل على
فبعد ان ماتت خمنو انه ملك الموت ..

هل يرى الميت ملك الموت ام يشعر به ام لا يشعر بأى شىء

هل كل ما يقال من اشياء تحدث لحظه الموت حقيقه ام اجتهاد

هل هناك احد يشعر انه سيموت قبل ان يموت

اسئله كثيررره جدا تدور بداخلى .. ولا اجد لها اى اجابه

وانا استسلم للنوم الذى غلبنى بشده بعد يوم طويل مرهق
ذهبت الى سريرى .. قلت دعاء النوم كما علمتنى امى قديما
لا اتذكر انى نسيته يوما
حتى مع اسوء حالاتى فى علاقتى مع الله
هناك اشياء تظل ثابته

قالت لى صديقه ذات يوم
انتى متأسسه صح يابت يا ساره .. ومهما عملتى انتى عندك اساس سليم

اثناء تعمقى فى النوم وفى اللحظه التى تسمع من حولك ولكنك لا تستطيع الحراك
احسست ان روحى  تريد ان تتحرر منى

تحدثت الى نفسى فى غموض

بسم الله الرحمن الرحيم .. قلبى مقبوض .. وروحى بتروح
فتحت عينى مفزوعه لا اعرف ما هذا الشعور الغريب
استعذت بالله من الشيطان ونمت مره اخرى
ولكن تكرر الاحساس مره اخرى .. بطريقه اقوى

جعلتنى انطق الشهاده خوفا .. وانظر حولى لارى هل ملك الموت جاء ليقبض روحى

مر عمرى امامى كشريط يجرى بطيئا بتفاصيله 
اغضبت الله منى كثيرا .. ولكنى احبه جدا
عصيته ولم انفذ كثيرا من اوامره .. ولكنى اخافه جدا
احسست بالموت مقتربا جدا .. فزعت من مكانى .. توضأت وصليت
ودعيت الله ان يكتب لى حسن الخاتمه

بكيت بشده .. فقد كان احساسا رهيبا
ذهبت للنوم مره اخرى ولكن ايضا راودنى نفس الشعور

افترضت موتى وتخيلت ما يحدث بعده
وجدت نفسى اريد ان اغير اشياءا كثيره
قررت ان اكتب وصيتى

ظللت افكر  حتى ظهر اول شعاع لنور الصباح ..

 وكانت قواى قد انهكت .. نمت
استيقظت متأخره .. شعرت ان روحى نظيفه ..

 حمدت الله انه مد فى عمرى يوما اخر

أعطانى فرصه اخرى

هل كان اختبار .. ام مجرد احساس حولته انا الى فكره بخوفى
تمنيت لو كان متاحا ان يحكى الاموات ما يحدث لهم

كى اعرف ما يدور بالتفصيل فى حياتهم الاخرى

لكنى كنت أثق بشده ان الله ارحم واحن علينا من انفسنا
كنت اظن انى مريضه بفوبيا الموت ..

اضافه الى الفوبيات الاخرى التى تلتهمنى
لكننى الان تأكدت  انى مريضه بفوبيا الحياه

  

البعض يذهب للبحر خلسه

تناول ثمره طماطم بيديه .. مسحها جيدا فى قميصه الرمادى الذى يرتديه

ثم اكلها  مع طبق فول وخمس حبات فلافل
هذا القميص يغسله مره واحده فى الاسبوع ..

ويمسح فيه يوميا اى شىء قبل ان يأكله

ومع ذلك يثق فى نظافته

بعد انتهائه من الفطور .. نادى على بناته الأربعه

يلا ياخيبتى التقيله علشان نفرش الخضار

قامت البنات فى همه ونشاط  ولكن منكسرات

فرشن مع والدهن ما يبعن من خضار فى السوق

اثناء فرشهم للخضار .. قال لهم

كل يوم تصحو عايزين تجرو على البحر

لكن الشغل تقومو بالعافيه

خلينا فى اكل عيشنا

بلا بحر بلا قرف

تتناقل البنات بعض الغمغمات بصوت منخفض لكيلا يسمعهم والدهم

يمضين يومهن فى السوق.

بيع .. فصال .. يعاكسهم هذا .. يعتبرهم اخر رجالا

فهن يرتدين ملابس الرجال

رغم صغر سنهم الا انهم لا يبدو عليهم

لا ترى البراءه الا اذا نظرت الى اعينهم

بعد انتهاء اليوم

يقمن ب لم الفرشه .. وادخالها الى منزلهم

المصنوع من الخوص والخشب

قالت اصغرهم .. آبا عاوزين نروح البحر
رد عليها وقد تغير وجهه

البحر ده مش لينا .. احنا مش بتوع بحر

استسلمت البنات .. ليس لعجزهم عن اقناعه

ولكن لتحدثهم معه طويلا فى هذا الموضوع

ولكنه ابدا لم يستجب لهم

جاء الليل نام الاب من التعب ونامت البنات

ولكنهم نامو ليوهمو ابوهم فقط

بعد ان نام .. قامو فى شكل مرتب مسبقا

خرجو واحده تلو الاخرى

ذهبو الى الشاطىء الذى لا يبعد عنهم الا خطوات

لم يخلعو سوى شباشبهم

جرو على البحر وكانه سيحتضنهم بشده

احسو فيه بحنان امهم التى فقدوها

لم يتأخرو وعادو سريعا

ابدلو ملابسهم بخفه وسرعه

وعادو الى اماكن نومهم

ايقظهم والدهم

فقامو سريعا .. حتى لا يسمعو اسطوانه كل يوم
ولكنه لم ينس جملته اليوميه  ..
كل يوم تصحو عايزين تجرو على البحر

قالت له البنت الصغرى
فى سذاجه 

امبارح قلتلنا  البحر مش لينا ..

 بس البحر طلع طيب اوى و بتاع كل الناس

رائحه الطفوله

ميس سهام

مدرستى فى الحضانه

حضانه ما قبل المدرسه

حين كان عمرى وقتها 5 سنوات تقريبا

كانت ميس سهام  طويله ..

جميله ..

 نشيطه .. 

مبتسمه دائما

كانت تسير بخطوات ثابته .. مرحه  ..

مخلفه ورائها رائحه مميزه

هى رائحه عطرها

كنت وقتها لا احمل سوى البراءه ..

الطفوله المغلفه بالسذاجه ..

 الحلم المطلق  ..

حب كل العالم وكل الناس

كانت ميس سهام تستقبلنا بحفاوه عند بدء اليوم

تعطينا جرعه الحب لليوم كله
وتصنع لنا بايديها فراشات وورود من الورق

كنا نتصارع للحصول على مكافئه ميس سهام

عندما نجيد قراءه الحروف او نقوم بالعد بطريقه صحيحه

او نرسم رسومات جديده

او نقوم بتسميع بعض ايات السور الصغيره من القرآن التى حفظتنا اياها

مكافئتها كانت عباره عن حضن كبير بابتسامه رائعه وقطعه حلوى

ونتسابق من سيفوز بحضن ميس سهام اليوم

كثيرا ما كنت انال هذه المكافئه وما كان يشغلنى قطعه الحلوى ابدا

كبرت .. وتركت الحضانه ولكنى ما زلت اقابل ميس سهام ولكن صدفه

هى ايضا تتذكرنى جيدا .. فقد كنت انا صاحبه اغرب اسئله

ميس ميس .. هو انتى عندك اولاد

انا لسه مش متجوزه ياحبيبتى

طيب هتتجوزى امتى

تضحك.. واضحك انا ..على ضحكتها
وتضمنى اليها بحنان .. مع دفىء عطرها

مرت سنين كثيره جدا

كنت ارى فى بدايتهم ميس سهام صدفه

لكنى الان لا اراها  

فقط اشم رائحه عطرها فألتفت .. ولا أجدها

مقطوعه الصمت

جاء متأخرا كعادته

وقف أمامها

كادت ان تعاتبه

نظر بعينيها

ولم يتكلم

ابتسمت بخجل

لم يتكلم

تعجبت من صمته

سألته عن حاله

لم يتكلم
كان مثبتا نظره عليها

سألته ما به!

لم يتكلم

قالت له لماذا لا ترد علىّ

أبِكَ شيىء تخفيه عنى

ظل صامتا لا يتكلم

غضبت

ادارت وجهها عنه

وقامت لتذهب

امسك بيدها ليوقفها

استدرات

إنتظرت منه ان يتكلم

ويفسر لها ماذا به

طبع قبله حانيه فى حضن كفها

وأحكم اغلاق يدها عليها

وقال لها

بحبك .. تتجوزينى ؟
من شده فرحتها

لم تتكلم