الأحد، 10 يوليو 2011

الفرح قبل الشقه والعفش

طبعا كلنا عارفين حال البلد دلوقتى 
 فى فجوه جامده جدا بين الطبقات فى المجتمع
فى ناس مش لاقيه فعلا تاكل ولا تجيب الحاجات الاساسيه
اللى هى الاولويات لاولادها 
وفى ناس عايشه فى ميه البطيخ وبتعمل اللى هى عاوزاه
وفى ناس نفسها تحل الموضوع ده وعندها خطط تنميه على المدى الطويل كويسه جدا
لكن انا احب اقولهم
وفورو خططكو لنفسكو .. الشعب المصرى يأبى ان يتحسن او يتطور
او حاله يتعدل
اه والله
هو عاجبه حاله كده
طيب مش مصدقين
اسيبكو مع الحكايه الغريبه اللى جايه دى
واحده ست عندها اربع بنات
اتنين متخرجين وواحده فى اعدادى وواحده فى ابتدائى
باباهم متوفى من فتره كبيره اوى
والست مش بتشتغل ...
طيب ياستى بتعتمدى على مصروفكو منين
قالت بناخد معاش من الشئون الاجتماعيه حوالى 300 جنيه
وفى جمعيات بتساعدنا ..
لحد دلوقتى كويس
الست صحتها كويسه ماشاء الله وصغيره ... يعنى ممكن جدا تشتغل تحسن دخلها
لكن هى مش بتشتغل
هى بتلف على كل الجمعيات اللى تقدر تاخد منها فلوس
القدر خلانى ابقى فى طريق الست دى
لما جه عرسان لبناتها الكبار واتخطبو
وقربو يتجوزو ... بقت بتطلب من الناس انهم يساعدوها فى جواز بناتها
حد يجيب حاجه من الاجهزه .. حد يجيب مفارش .. حد يجيب اى حاجه .. المهم حد يجيب
وفعلا فى وقت قليل  كانت مجهزه بناتها الكبار ... كل ده كويس .. هى الست يعنى هتجيب منين
وجه وقت الفرح ... ولقيناها بتعزمنا
وطبعا رحنا ... تن تن تاتن تن تن  
الفرح فى قاعه عالبحر .. فى كامب شيزار
للى ميعرفش اسكندريه هى حته حلوه  يعنى
يعنى فرح يتعمل فى قاعه بالشىء الفلانى
مش كان اولى الفلوس دى يتجاب بيها حاجه فى بيت بناتها
بدل الهبل ده .. انا مبقولش ميفرحوش
ولا علشان هما غلابه يبقى ميعملوش فرح
تؤتؤتؤتؤ
بس ده اسمه سووء تصرف
يعنى ايه أخد فلوس من الناس .. وانا معايا يجيب بس شايلاه للفرح
وحفترض معاكو كل الافتراضات
لو العريس هو اللى عامل الفرح  مش هما...
 كان ممكن الفلوس دى يحطها فى بيته أولى
هو لازم اصرف آلاااف علشان اعرف افرح  
مينفعش نفرح صح .. نفرح من غير غباء وتصرف غلط
محتاجين توعيه ..
محتاجين توعيه ثقافيه واجتماعيه واخلاقيه كمان
انا نسيت اقول ان فى الخطوبه والفرح العروسه كانت عريانه
 مش بس مش محجبه
مع انها اصلا محجبه وبتنزل فى  منطقتها لابسه عبايات
لا لابسه عريان جدا
احنا بقينا فى قمه التناقض
قدام الناس وقدام نفسنا
لازم يبقى فى حل علشان الدنيا كده بقت من كتر الغلط غامقه وماسخه
ومحدش يعزمنى على افراح من النوع ده تانى

هناك 8 تعليقات:

غير معرف يقول...

Eman karkora
التغيير عايز تعليم ولما يتصلح حال التعليم احسبى بعدها 12 سنة على الأقل ممكن تلاقى نتيجة
عايزة أسأل هى كل القنوات الدينية والمشايخ بيكلموا مين يبدو إن محدش بيسمعهم

Casper يقول...

في النهاية هي ثقافات غلط ومازالت تورث في مجتمعنا
لن نستطيع تغيير الكون لكن باستطاعتنا تغيير أنفسنا

________

خالص تقديري لفكرك وقلمك

غير معرف يقول...

احنا عايزين ثوره على مفاهيم الناس وبعدين احنا لو عندنا تنسيق بين الجمعيات الاهليه اللى المفروض تتبع جه واحده مكنتش الست دى اخدت مساعدات من كل الجمعيات فى وقت واحد وكانت اشتغلت وتعبت علشان تجيب القرش ساعتها كانت حتصرفه صح
ملحوظه:كل الناس البلدى يعتقدوا ان العريان هو الاستيل الراقى
فاطمه

غير معرف يقول...

فعلا يا بنتي والله حاجة تغيظ بجد
عندك حق يا فطومة احنا فعلا محتاجين ثورة تغير مفاهيم الناس
اعانك الله دائما يا سارة انت وكل من يسعى لخير ويحاول توصيل رسالة من خلال كلماته
موفقة دائما يارب
أماني

Radwa Ashraf يقول...

انا متفقة معاكى جدا بس للأسف دى حاجات مترسخة فيهم ..
يعنى احان فعلا محتاجين ثورة هدفها الوحيد .. التوعية و رفع ثقافة الشعب
عشان مش معقول بنطالب بكذا و كذا و فيه ناس ثقافتها متردية فعلا .. و مش ثقافة بمعنى التعليم بس
لا ثقافة بمعنى أسلوب حياة بأكمله ...
عجبتنى جدااا

Bent Men ElZman Da !! يقول...

ده من الحالات دى ياما دلوقتى
فى ناس على فكره بقوا متخصصين فى حكايه المساعدات من الجمعيات دى
لما بيلاقواانها فلوس بتجيلهم من غير اى تعب
بيستسهلوا ويبطلوا يفكروا انهم يشتغلوا او يساعدوا نفسهم بنفسهم ادام فلوس بتجيلهم من الهوا
انا كنت اعرف ناس من نفس النوعيه دى
بيطلبوا يجهزوا بنتهم من الناس المقتدره
ولما يجيبولهم الحاجه يبعوها سواء بقى تلاجه والا غساله مثلا وبفلوسها يشتروا اى حاجه تانيه هما عايزينها
ويروحوا يجيبوا جهاز بنتهم بالقسط
ماتفهميش ايه الفكره
بس اهو ياخدوا فلوس وخلاص
فى ناس عاجبهم حالهم وطريقتهم كده وماعندهمش استعداد اصلا يغيروها
دول محتاجين ثوره لوحدهم

غير معرف يقول...

عندك حق فعلا ايه لازمة كل ده
يمكن علشان الفلوس دى واخدينها من الناس
لو كانوا تعبانيين فيها احتمال مايكونوش عملوا حاجة زى كده

Tamer Moghazy يقول...

تاني مرة اقرا لك حاجة النهاردة ويعجبني طريقة وصفك... فوق ما تتخيلي..!!