الجمعة، 29 أبريل، 2011

التأمين الصحى .. مصلحتك اولا .. هع هع هع


فى زياره غير متوقعه مجبره عليها الى احدى عيادات التأمين الصحى
وبما انى حد غير مهم اصلا
فكانو بيبيضو الحيطان ولسه مخلصوش
الظريف ان السلم اللى بيطلع للعياده ضيق جدا
وكل الناس اللى طالعه ونازله فى  الزحمه هدومهم اتبهدلت
والعامل اللى بيبيض سايب الفرشه وواقف يضحك عالنااس علشان هدومها باظت
اه يا تيييييييت طيب اكتب ورقه ... هات حد يكتبلك ورقه ان فى زفت بويه هنا
تقولش هيطلع فى الاخر برنامج الكاميرا الخفيه وهدومى متبقاش باظت بجد
ارجوكو .... هوافق انكو تذيعو بس تطلع الكاميرا الخفيه
طبعا بدايه مبشره وزى الفل
كل ده كوم واللى جاى كوووم تانى خااااالص
دفتر التأمين الصحى اللى انت بتدخل بيه للدكتور لو متجلدش شبه كتب المدرسه زمان
مش هتعرف تفتحه بعد زيارتين وختمين وطابعين وروشتتين وخناقتين مع اى حد هناك
وطبعا الدكاتره بيمسكوه وكأنه منتشل من المجارى
تستنى دورك وده حلو وطبيعى ومن مبادىء الديموقراطيه
طبعا لو الدكتور معاده الساعه 2 فحضرتك يا محترم تكون موجود من 10
 ولو الدكتور الساعه 4  تكون موجود من 12
اما بقى لو الدكتور معاده الساعه 10 الصبح فحضرتك مصلى الفجر معانا باذن الله
طبعا مع كل هذا الانتظار
الكراسى مريحه جدااا
المعامله كويسه جدااا
ولو سألت اى ممرضه على اى حاجه بترد باهتمام  جداااا
وطبعا مفيش حد بيكح فى وشك والناس كويسه جدااا
و المكان هادى جدااا
وبالتأكيد بعد كل ده
انا كدابه جدااا
طبعا بتدخل للدكتور بعد الانتظار الطويل ده فيك امراض الدنيا
وبتنسى اصلا انت كنت جاى ليه
طبعا هتقولى ما العيادات الخاصه كده
هقولك لا يا سيدى الفاضل
التأمين الصحى يختلف عن الاخرون
الدكتور بيدخل مريضين فى نفس الوقت
وبيكتب للاتنين روشته فى نفس الوقت
يعنى المريض الواحد بيستغرق وجوده فى غرفه الدكتور من 3 الى 5 دقائق
 ولو مش مصدقنى تعالى احسب
وممكن جدا بعد انتظارك ساعات قدام غرفه معينه يطلع دفترك فى غرفه تانيه
الله .. هو هيمشو ورا الدفاتر يعنى ..يقطعو نفسهم
طيب حتى لو دفتر التأمين الصحى بتاعك ضاااع
ايه يعنى
دفترك اللى بتاخد بيه الدوا بتاعك اللى لو مخدتهوش هتموت
اييييييه يعنى ياعم انت مكبر الموضوع ليييه
انا بس كان عندى استفسار صغير كده
هو يعنى ايه تأمين ويعنى ايه صحى
يادى مجانيه التعليم اللى ودتنا فى داهيه
هو مش تأمين صحى دى معناها تقريبا كده حسب المعجم الوجيز
حمايه صحه الفرد يعنى
طيب هو اللى  بيحصل هناك حمايه لصحه مين بالظبط
كل ده للناس اللى عندها تأمين صحى ... اللى هو المفروض اوبشن حلو يعنى
امال بقى اللى معندهوش وومعاهوش يعمل اييييييييييييييييييييييييييييه
ملحوظه هامه : كل ما سبق من قرف يشمل الاغلبيه العظمى من العاملين بالتأمين الصحى الا من رحم ربى


ملحوظه هامه تانيه  : نظرا لان مفيش اى فتحه تهويه مع البويه اللى قلت عليها فى الاول فالناس اللى داخله عند دكتور الصدر تقدر تتفضل عند العنايه المركزه لانها لحد ما الدكتور ييجى هيكونو ماتو

هناك تعليقان (2):

أحمد عمارة يقول...

أمال بقى لو شفتي عيادات التأمين في الأرياف هتفولي ايه؟

للأسف نظام التأمين الصحي به أوجه قصور كثيرة ومحتاج تعديل شامل في المفهوم عند المرضى قبل الأطباء

فيه ناس كتير بتستغل التأمين الصحي بتاعها بالتواطؤ مع أطباء وصيادلة إنهم يبيعوا الدوا
يعني يروح للتأمين ويطلب دوا هو لا يحتاج له عشان يخرج من التأمين ويروح يبيعه للصيدلي او الدكتور اللي اتفق معاه

والمشكلة ان الدكتور في التأمين ميقدرش ميكتبش الدواء والا هيتحول للتحقيق لأن إدارة التأمين تؤمن بمبدأ إن الزبون دائما على حق وعشان كده لما تيجي اي شكوى في اي دكتور بياخد اقل حاجة لفت نظر


والواحد لو اتكلم هيقول بلاوي اكتر من كده
بس المشكلة ان الحاجات دي كلها معروفة وحلها موجود
لكن القرار بيد من؟

اسكندرانيه يقول...

والله عندك حق
ان شاءالله الحل يكون قريب جدا