بصو بقى علشان متقولوش البت دى بتخرف او بتقول اى كلام
الموقفين دول حصلو بجد حقيقى والله العظيم
تعالو معايا بقى
بس اوعو تندمجو اوى خوفا عليكو من العواقب الوخيمه للاندماج
واحده صاحبتى جالها عريس انما ايه اخلاق بقى عاليه وحاجه فل كده
طبعا انا قلت
هييييييييييييييه
اخيرا حد هيتجوز بقى والواحد هيحضر فرح ويهيص
راحلهم العريس فى اليوم المحدد
ومعاه الشيكولاته المتينه اللى هى اكلاشيه دى فى اى جوازه
ودخل وهوب جت العروسه وقعدت تتكلم معااه
وهنا كانت المفاجأه
سألها العريس انتى بتصلى
قالتله اه الحمد لله
طيب بتحفظى قران
اه كنت بحفظ بس دلوقتى مش بروح
طيب يعنى بتعرفى تجويد كويس
قالتله اه الحمد لله
قالها طيب سمعى ايه احكام النون الساكنه
احكام نون ساكنه ايه يا عم الحاج هى دى من شروط الزواج الناجح يعنى
------------
استنى عندك هنا
ده مش تأليف على فكره ولا من دماغى
ده بجد والنحمه
كاااااااااااااات
ونروح للموقف التانى الخرافه ده
استعدو
واحدده صاحبتى تانيه جالها عريس برضه ابن حلال كده
وراحت عشان تقابله بره بقى مع ولاد الحلال برضه اللى جايبينه
كل الناس بقت ولاد حلال واخلاق لو تلاحظو هه
قعدت صاحبتى مع العريس اللطيف الظريف ده
اللى بيسبلها من ساعه ما شافها
قعد يتكلم وبدأ يتكلم عن الحج والعمره
قالت فى سرها ماشاء الله ده باينه كويس والله ومتدين
فجأه وبدون مقدمات
قال ::: انا وانا رايح العمره اللى فاتت كنت بدعى ربنا من قلبى انى اشوف دينا
صاحبتى قالتله دينا مين اختك
قالها لا دينا الرقاصه
دى قنبله قنبله قنبله
يانهارك اسود ومهبب الهى تنفجر فى وشك يارب
انتى ساكته ليه انتى مش بتحبى دينا هو فى حد زى دينا وهى بترقص
دى رهييييبه
ولا الايرانيات اللى فى السعوديه انا اصلا بروح عشان اعاكسهم
انا ولا عمره عملتها اتقبلت اصلا بس ربنا يسامحنى بقى
ربنا يسامحك ايه يابعيد .. دينا ايه وايرانيات ايه
هوايه اللى بيحصل ده يا بشر
-----
حاولو تتمالكو اعصابكو لو سمحتو
لانى مش عارفه اتمالك اعصابى بصراحه
العريسين فى نفس السن تقريبا
والاتنين لبنتين فى نفس الاخلاق والمستوى
وهو فى حد فى اول لقاء مع عروسه يبقى اووووفر اوى كده
سواء فى التدين او التهيييس
ايه الكائنات الغريبه دى اللى الواحد بيشوفها
ارجوك لو كنت حد من الحالتين اللى فاتو
حاول تسامح اللى دعا عليك بقى
علشان هما اكيد كتيييييييييير
هناك 4 تعليقات:
هههههههههههههههه
ماهو يابنتى "البنات مش لاقية تتجوز ......
والشباب مش بيتقدمو لحد
والظروف فى البلد صاعبة"
.
.
.
دى احدى مقولات عريس راح يتقدم لواحدة صاحبتى "بجد مش هزار برضه"... يعنى بيقولها بالمختصر المفيد اقبلى يا بايرة لحسن مش هتلاقى زيي
وحسبي الله ونعم الوكيل
هههههههههه
المقولات كتير جدا
وحسبى الله ونعم الوكيل
:))
جامدة يا سرسور جداااااااا
حصل معايا موقفين بردو زى الفل و مع واحدة صحبتى العريس الفاضل جاى لابس بلوفر جاكار من اللى اتلغوا دول وبنطلون قماش بكسر بنى داخل على نبيتى - الحمد لله الذى عافانا - وبعد السلام والتحية بص فى وشهم هى ومامتها واختها وابتسم ابتسامة عريضة و واثقة وقال:
ها بقى .. مين فيكوا اللى جاية تتجوز ؟
الحمد لله طبعا الجوازة باظت .. وفى هذا اقول .. قعدة الخزانة ولا جوازة الندامة .. بلا نيلللللة
زوزو
بيتهيألى لو فى طرق للتعارف المحترم ولو عن بعد زى الفيس بوك مثلا او التواجد فى عمل تطوعى مشترك هتختفى الظواهر الغريبة دى ويمكن كمان ترجع تانى قصص الحب الشريف اللى اندثرت
احمد حسن
إرسال تعليق