الاثنين، 5 ديسمبر 2011

ثوره تحت المطر


ودعهم ونزل
يوم 28 يناير
صلى الجمعه فى وسط الناس
اول مره يحس براحه
مع انه طول عمره بيخاف جدا
حتى من الضلمه
وقف فى الصفوف الاولانيه
صامد تحت خراطيم الميه اللى تهد جبال
قاوم خوفه ... وحس لأول مره إن لحياته قيمه
هتف وغنى ودبدب فى الارض يعبر عن غضبه
مات جنبه اتنين وتلاته وسبعه
شال صاحبه بين ايديه ... وهو عمره ما كان بيقدر يبص لمنظر الدم
النهارده بس حس انه مكنش عايش
النهارده بس عرف يعنى ايه ممكن حد يضحى بروحه علشان بلده
ساعد المصابين ... وساعد اهل الشهدا
من يوميها منساش بلده .. وقرر ميسكتش عالظلم
نزل واعترض ... مره يتسمع .. ومره يتضرب
ولما ملقاش فيه اى جديد ... نزل تانى جمعه التسليم
يوم 18 نوفمبر ...
ما هو مش شايف اى تغيير
لقى المصابين لسه موجودين
محدش اهتم بعلاجهم .. ولا حتى فكر يساعدهم
وكمان مش من حقهم يعترضو
من تانى هتف ومخافش
وقرر ميروحش ...
 الا لما يجيب حق كل شهيد
والمطر طمنهم ... حسسهم  انهم صح
المطر غسل مصر بخطاياها كلها ... وبرضه  الثوار موجودين فى الميادين
لان الثوار مش خطايا ... ولا انتزاع الحقوق خطايا ...
صوت الهتاف بقى اعلى تحت المطر
وكأن المطر بيقويهم
كأن ربنا بيقولهم انا معاكو ... متخافوش .. اطمنو... وكملو
قعد يدعى ويهتف ... يارب اكرم مصر
هو يوم  مش اكتر ... وكان من ضمن الشهدا
بس قبل ما يموت
قالها كلمه ... اوعوا تسيبو حقهم ... حتى لو هتموتو زيهم
اوعوا تسيبو مصر  ...
---------------------------
الفيديو ده علشان متنسوش 

http://www.youtube.com/watch?v=cWzzDAOJ_xM&feature=share&fb_source=message

هناك 14 تعليقًا:

Unknown يقول...

قالها كلمه ... اوعو تسيبو حقهم ... حتى لو هتموتو زيهم
اوعو تسيبو مصر ...



جميله ..ربنا يفرجها من عنده

Ahmed El_Desouky يقول...

نقلتي احساس كل مصري نزل من بيته علشان يقول كلمة حق

جميلة أوي ياسارة

تسلمي بجد :)

أول مرة أشوف الفيديو ده كامل كده

مهما فضلنا في ضلمة وعتمة ,, هيجي يوم وتطلع علينا الشمس

ساره جمعه يقول...

شكرا يا احمد بجد
يمكن علشان نزلت وشفت بعينى
تسلم انت على كومنتك الجميل
منورنى
حلوه اوى الجمله الاخيره دى
:)

ساره جمعه يقول...

شكرا يا خااااالد
انت كتاباتك الاجمل طبعا
منورنى :)

الشوكة الناعمة يقول...

جميله يا ساره
امتى البلد دى هتبقى بتاعتنا
حسبى الله ونعم الوكيل

ساره جمعه يقول...

ان شاء الله هتبقىبتاعتنا يا سما
نورتينى
انتى الاجمل :)

غير معرف يقول...

حلوة جدا يا ساارو
قوييييية
ربنا يوفقك لكتابات أقوى دايما
وأسلوب أقوى

أماني

غير معرف يقول...

Eman karkora
إن شاء الله ربنا حينصرنا

نيللي علي يقول...

الحلو فى البوست بتاعك (صمود المصريين)

Haytham Alsayes يقول...

للدماء لعنة وحرمة
تطارد كل من اسالها وتسبب فيها
النصر من عند الله وهيجي النصر لما نشتغل ليه
وان شاء الله مصر هتقوم تاني
مصر مش بتموت

:)

Bent Men ElZman Da !! يقول...

"قالها كلمه ... اوعو تسيبو حقهم ... حتى لو هتموتو زيهم
اوعو تسيبو مصر ..."

ربنا يكملها على خير
عشان حق الشهداء دول مش يروح
بوست جميل تسلم ايدك :))

Zeinab Hataba يقول...

يا نجيب حقهم يا نموت زيهم.(

Emtiaz Zourob يقول...

عمرنا ماراح ننسى دماء الشهداء التي خضبت شوارع مصر .. ربنا يرحمهم يارب .. لولاهم لما قامت ثورة ..

حزينة ومؤلمة .. كحالنا بالضبط ..

ربنا يصلح الحال يارب ويحفظ لنا أوطاننا جميعا ..

rona ali يقول...

اه منك يا سارة كلامك بسيط بس واصل اوى

الواحد مش عارف يجييبها منين ولا منين

العياط زاد والواحد ضعيف قدام اهله مش قادر يعارض ربنا ينصرنا ويقوي كل اللي بيجري ورا حق مصر وحق شهدائها


:) تحياتى تدوينه جميله