الثلاثاء، 24 مايو، 2011

حنيـــن



ده مش شعر ومش عارفه ده ايه

---------------------------

قلم وورقه ونسمه هوا
وحنين فى قلبى مالوش دوا
قعدت
فى نفس المكان
 سرحت
غمضت عنيا
واتنهدت من قلبى
وغصب عنى ابتسمت
لما افتكرت كلامنا سوا
كنا هنا
وسط الناس
بس كأننا
 على جزيره لوحدنا
فاكر يوميها
 الدنيا شتت
كل الناس قامت
وخافت م الشتا
واحنا مهمناش
الشتا كان بيغسلنا من جوه
كان مخلينا نشوف الدنيا
بشكل اوضح
حتى كنا شايفين بعض صح
من غير اى اقنعه
ولا ابتسامه مزيفه
كان مرسوم على شفايفنا ابتسامه
كانت بجد من قلوبنا
اتكسفت جدا لما قلتلى
ضحكتك حلوه اوى
بس فرحت اكتر
وضحكت اكتر
وانت بصتلى اكتر
وانا اتكسفت اكتر
احساسنا بالوقت كان معدوم
كان نفسى ساعات الارض كلها
تقف
عند اللحظه دى
كنت حاسه بتواصل رهيب
مع روحك
كنت حاسه انى لامسه
اعمق حته فى قلبك
كنت حاسه
إن
إنت
أنا
فتحت عنيا
وكان فيهم دمعتين
بس نشفو من الهوا
وفضلت إبتسامه
وحنين فى قلبى مالوش دوا

هناك 4 تعليقات:

ELMOSTAFZ يقول...

ده مش شعر...
دي لحظة من ضمن اللحظات اللي بنفتكر فيها ذكري حلوة بأدق تفاصيلها و فجأة نظبط نفسنا متلبسين و احنا بنبتسم إبتسامة خفيفة...

اسكندرانيه يقول...

حلوه نظبط نفسنا متلبسين دى
عندك حق
شكرا لمرورك
:)

Haytham Alsayes يقول...

خير فينك ع الفيس
قافلة بروفايلك ليه ..
يارب تكوني بخير :)))

اسكندرانيه يقول...

موجوده يا هيثم
الفيس بس بيعاقبنى فمش راضى يفتح الاكونت
انا بخير الحمد لله