.jpg)
نفسى اقابلها صدفه
تفتكرو هتعرفنى
متقابلناش من 11 سنه
بس اكيد شكلنا متغيرش
يمكن كبرنا شويه
بس زى ما احنا
بروحنا
بإحساسنا
تفتكرو اصلا فاكرانى ؟
اكيد مينفعش تنسانى ..
فضلنا صحاب 5 سنين
اعدادى
وثانوى
مات باباها
وإحنا فى تالته ثانوى
جالها عريس
مامتها جوّزتها
وقعّدتها من المدرسه
رحت فرحها
انا فاكره نظرتها
كانت بتقولى انا اسفه
مش هفضل معاكى
ملامحها كبرت فجأه
بس عينيها كانت زى ماهى
عينيها اللى ياما عيطت
لما كنا بنتخانق
خناقات عبيطه
الحقينى يا ماما
جهاد شتمتنى
ومامتها تتصل وتصالحنا على بعض
مذاكرتنا سوا
نومنا فى الفصل على التخته
حبنا لحصه الرسم
مشاغبتنا مع المدرسين
كتابتنا الأغانى فى الكراسات
بدل الدروس
حكاياتنا اللى مكنتش بتخلص أبدا
الناس اللى كانو دايما يقولولنا
هو انتو اخوات ؟
طيب قرايب ؟؟
كنا نضحك ومنريحهمش
بس ساعتها خلاص
كان ده أمر واقع انها مش هتكون موجوده
فضلت وقتها أعيط كتير
مش فاكره قد ايه بالظبط
كل اللى فاكراه
عينيها وهى بتقولى
إوعى تنسينى
هناك تعليقان (2):
مفيش أحلى من الصداق الحقيقية
والي انتي اتكلمتي فيه صداقة حقيقية
والحضور والغياب شيء والحب الحقيقي بين الأصحاب شيء ثاني
جميل جدا ما خط قلمك أثار دموعي وشجوني
تحياتي
كانت هنا
حكاية
:((
إرسال تعليق